Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 19: Yakob wɔ Abusua Kɛse

Adesua 19: Yakob wɔ Abusua Kɛse
Yakob ne ne mmabarima

HWƐ saa abusua kɛse yi. Eyinom ne Yakob mmabarima 12 no. Ná ɔwɔ mmabea nso. Wunim mmofra no mu binom din? Ma yensua bi.

Lea woo Ruben, Simeon, Lewi ne Yuda. Bere a Rahel hui sɛ ɔnwo ba biara no, ne werɛ howee pii. Enti ɔde n’abaawa Bilha maa Yakob, na Bilha ne no woo mmabarima baanu a wɔfrɛ wɔn Dan ne Naftali. Na Lea nso de n’abaawa Silpa maa Yakob, na Silpa woo Gad ne Aser. Akyiri yi Lea san woo mmabarima baanu, Isakar ne Sebulon.

Awiei no Rahel woe. Ɔtoo ne din Yosef. Akyiri yi yɛbɛka Yosef ho asɛm pii, efisɛ ɔbɛyɛɛ onipa titiriw. Mmabarima 11 a Yakob woe bere a ɔne Rahel papa Laban te no ni.

Yakob woo mmabea bi nso, nanso wɔn mu biako pɛ na Bible bɔ ne din. Wɔfrɛ no Dina.

Bere dui a Yakob yɛe sɛ obefi Laban nkyɛn asan akɔ Kanaan. Enti ɔboaa n’abusua kɛse no ne ne nguan ne anantwi no nyinaa ano, na wosiim kotwaa kwan tenten no.

Bere a Yakob ne n’abusua no beduu Kanaan no akyi bere tiaa bi no, Rahel woo ɔbabarima bio. Ɛbae bere a wɔnam kwan so no. Rahel awo no mu yɛɛ den, na akyiri yi owui bere a ɔrewo. Nanso abofra ketewa no anwu. Yakob too ne din Benyamin.

Yɛpɛ sɛ yɛkae Yakob mmabarima 12 no din efisɛ wɔn mu na Israel man no nyinaa fi bae. Nokwarem no, wɔde Israel mmusuakuw 12 no mu 10 too Yakob mma no na wɔde baanu too Yosef mma. Isak traa ase mfe pii bere a wɔwoo mmarima yi nyinaa akyi no, na ebetumi aba sɛ n’ani gyei sɛ onyaa nananom pii saa. Nanso ma yɛnhwɛ nea ɛbaa ne nana Dina so.

Genesis 29:32-35; 30:1-26; 35:16-19; 37:35.



Nsɛmmisa

  • Dɛn ne Yakob mmabarima baasia a ɔne ne yere a odi kan, Lea, woe no din?
  • Mmabarima baanu bɛn na Lea abaawa Silpa wo maa Yakob?
  • Dɛn ne mmabarima baanu a Rahel abaawa Bilha wo maa Yakob no din?
  • Mmabarima baanu bɛn na Rahel woe, na bere a ɔwoo nea ɔto so abien no dɛn na esii?
  • Sɛ wohwɛ mfonini no a, Yakob mmabarima no yɛ ahe, na dɛn na efi wɔn mu bae?

Nsɛmmisa foforo

  • Kenkan Genesis 29:32-35; 30:1-26; ne 35:16-19.

    Sɛnea Yakob mmabarima 12 no din kyerɛ no, dɛn na na Hebrifo gyina so to wɔn mma din wɔ tete mmere no mu?

  • Kenkan Genesis 37:35.

    Ɛwom sɛ Dina nkoaa na ne din wɔ Bible mu de, nanso yɛyɛ dɛn hu sɛ na Yakob wɔ mmabea binom nso? (Gen. 37:34, 35)