Esau

ƐSONO mmofra baanu a wɔwɔ ha no koraa, ɛnte saa? Wunim wɔn din? Nea okura agyan no yɛ Esau, na nea ɔrehwɛ nguan no yɛ Yakob.

Esau ne Yakob yɛ ntafo a Isak ne Rebeka woo wɔn. Wɔn papa Isak pɛɛ Esau asɛm, efisɛ na ɔyɛ ɔbɔmmɔfo pa, na na ɔde aduan bɛbrɛ abusua no. Nanso na Rebeka pɛ Yakob asɛm kɛse, efisɛ na odwo.

Na wɔn nana Abraham da so te ase, na yebetumi ahu sɛnea na Yakob ani gye sɛ obetie Yehowa ho asɛm afi ne nkyɛn. Akyiri yi Abraham wui a na wadi mfe 175, bere a na ntafo no adi mfe 15.

Bere a Esau dii mfe 40 no ɔwaree yerenom baanu fii Kanaanfo mu. Eyi maa Isak ne Rebeka werɛ howee pii, efisɛ na saa mmea yi nsom Yehowa.

Na da koro, asɛm bi sii a ɛmaa Esau bo fuw ne nua Yakob kɛse. Bere dui a na Isak behyira ne ba panyin. Esiane sɛ na Esau yɛ panyin sen Yakob nti, Esau hwɛɛ kwan sɛ ne nsa bɛka nhyira yi. Nanso na Esau adi kan atɔn hokwan a ɔwɔ sɛ ne nsa bɛka nhyira no ama Yakob. Afei nso, bere a wɔwoo mmofra baanu no Onyankopɔn kae sɛ Yakob nsa bɛka nhyira no. Na saa na ɛbae. Isak de nhyira no maa ne ba Yakob.

Yakob

Akyiri yi, bere a Esau tee eyi no ne bo fuw Yakob kɛse. Ne bo fuwii araa ma ɔkae sɛ obekum Yakob. Rebeka tee eyi no ɛhaw no pii. Enti ɔka kyerɛɛ ne kunu Isak sɛ: ‘Sɛ Yakob nso ware Kanaanfo mmea no bi a ɛbɛyɛ awerɛhow kɛse.’

Enti Isak frɛɛ ne ba Yakob ka kyerɛɛ no sɛ: ‘Nware Kanaan babea. Mmom no, kɔ wo nana Betuel fie wɔ Haran. Ware ne ba Laban mmabea no mu biako.’

Yakob tiee ne papa, na ntɛm ara osiim twaa kwan tenten kɔɔ baabi a n’abusuafo te wɔ Haran.

Genesis 25:5-11, 20-34; 26:34, 35; 27:1-46; 28:1-5; Hebrifo 12:16, 17.



Nsɛmmisa

  • Esau ne Yakob yɛ henanom, na ɔkwan bɛn so na ɛsono wɔn mu biara?
  • Ná mfe ahe na Esau ne Yakob adi wɔ bere a wɔn nana Abraham wui no?
  • Dɛn na Esau yɛe a ɛmaa ne maame ne ne papa werɛ howee pii?
  • Adɛn nti na Esau bo fuw ne nua Yakob kɛse?
  • Asɛm bɛn na Isak ka kyerɛɛ ne ba Yakob?

Nsɛmmisa foforo

  • Kenkan Genesis 25:5-11, 20-34.

    Nkɔm bɛn na Yehowa hyɛe wɔ Rebeka mmabarima baanu no ho? (Gen. 25:23)

    Nsonsonoe bɛn na ɛwɔ Yakob ne Esau su wɔ abakan hokwan no ho? (Gen. 25:31-34)

  • Kenkan Genesis 26:34, 35; 27:1-46; ne 28:1-5.

    Dɛn na Esau yɛe a ɛkyerɛ sɛ na ommu akronkronne? (Gen. 26:34, 35; 27:46)

    Sɛnea ɛbɛyɛ a Yakob benya Onyankopɔn nhyira no, dɛn na Isak ka kyerɛɛ no sɛ ɔnyɛ? (Gen. 28:1-4)

  • Kenkan Hebrifo 12:16, 17.

    Ɔkwan bɛn so na Esau nhwɛso no da nea ɛbɛto wɔn a wobu akronkronne animtiaa no adi?