Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 16: Isak Nya Ɔyere Pa

Adesua 16: Isak Nya Ɔyere Pa

WUNIM ɔbea a ɔwɔ mfonini yi mu no? Wɔfrɛ no Rebeka. Na ɔbarima a ɔrekohyia no no yɛ Isak. Ɔrebɛyɛ ne yere. Ɛyɛɛ dɛn na ɛbae saa?

Isak papa Abraham pɛe sɛ onya ɔyere pa ma ne ba no. Na ɔmpɛ sɛ Isak ware Kanaanfo mmea no bi, efisɛ na saa nkurɔfo no som abosom. Enti Abraham frɛɛ n’akoa na ɔka kyerɛɛ no sɛ: ‘Mepɛ sɛ wosan kɔ baabi a m’abusuafo te wɔ Haran kɔware yere ma me ba Isak.’

Ntɛm ara Abraham akoa no faa yoma du twaa kwan tenten no. Bere a ɔbɛn baabi a Abraham abusuafo te no, ogyinaa abura bi so. Na ɛrekɔ anwummere, bere a kurom hɔ mmea bɛba abɛsaw nsu. Afei Abraham akoa no bɔɔ Yehowa mpae sɛ: ‘Ma ɔbea a ɔbɛma me nsu no bi anom na wama yoma no bi no nyɛ nea wobɛpaw no sɛ ɔyere ama Isak.’

Rebeka rehyia Isak

Ankyɛ na Rebeka bae sɛ ɔbɛsaw nsu. Bere a akoa no srɛɛ no sɛ ɔmma no nsu nnom no, ɔmaa no bi. Na ɔsan kɔsaw bi brɛɛ yoma a na nsukɔm de wɔn no nyinaa. Na ɛyɛ den efisɛ yoma nom nsu pii.

Bere a Rebeka wiei no, Abraham akoa no bisaa no ne papa din. Ɔsan bisae sɛ ebia obenya baabi ada wɔ wɔn fie. Ɔkae sɛ: ‘Me papa ne Betuel, na wubenya baabi ada wɔ yɛn fie.’ Ná Abraham akoa no nim sɛ Betuel yɛ Abraham nua Nahor ba. Enti ɔkotow daa Yehowa ase sɛ wakyerɛ no kwan akɔ Abraham abusuafo nkyɛn.

Saa anadwo no Abraham akoa no bɔɔ n’amanneɛ kyerɛɛ Betuel ne Rebeka nuabarima Laban. Wɔn nyinaa gye toom sɛ Rebeka betumi ne no akɔ akɔware Isak. Bere a wobisaa Rebeka no dɛn na ɔkae? Ɔkae sɛ ‘Yiw,’ ɔpenee so sɛ ɔbɛkɔ. Enti n’adekyee no wɔtratraa yoma no so fii ase twaa kwan tenten no san kɔɔ Kanaan.

Wokoduu anwummere. Rebeka hui sɛ ɔbarima bi nennam wuram hɔ. Na ɛyɛ Isak. N’ani gyei sɛ ohuu Rebeka. Ná mfe abiɛsa ni a ne maame Sara wui, na na ɔda so di awerɛhow. Nanso afei Isak ani begyee Rebeka ho pii, na ne werɛ kyekyee bio.

Genesis 24:1-67.



Nsɛmmisa

  • Ɔbarima ne ɔbea bɛn na wɔwɔ mfonini no mu no?
  • Dɛn na Abraham yɛe de nyaa ɔyere maa ne ba, na adɛn nti na ɔyɛɛ saa?
  • Ɔkwan bɛn so na Onyankopɔn tiee Abraham akoa no mpaebɔ?
  • Bere a wobisaa Rebeka sɛ ɔbɛware Isak anaa no, dɛn na ɔkae?
  • Dɛn na ɛmaa Isak ani gyee bio?

Nsɛmmisa foforo

  • Kenkan Genesis 24:1-67.

    Suban pa bɛn na Rebeka daa no adi bere a ohyiaa Abraham akoa no wɔ abura no ho no? (Gen. 24:17-20; Mmeb. 31:17, 31)

    Adepa bɛn na Kristofo betumi asua afi nhyehyɛe a Abraham yɛ maa Isak no mu nnɛ? (Gen. 24:37, 38; 1 Kor. 7:39; 2 Kor. 6:14)

    Adɛn nti na ɛsɛ sɛ yɛpɛ bere de dwennwen nsɛm ho sɛnea Isak yɛe no? (Gen. 24:63; Dw. 77:12; Filip. 4:8)