Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 6: Ɔba Pa, ne Ɔba Bɔne

Adesua 6: Ɔba Pa, ne Ɔba Bɔne

HWƐ Kain ne Habel. Wɔayɛ mpanyimfo. Kain abɛyɛ okuafo. Oduadua awi, nnuaba ne afum nneɛma ahorow.

Kain ne Habel rebɔ afɔre ama Onyankopɔn

Na Habel abɛyɛ obi a ɔhwɛ nguan. Na ɔpɛ nguamma asɛm. Wonyin bɛyɛɛ nguan akɛse, enti ankyɛ na Habel benyaa nguan pii a ɔhwɛ wɔn.

Da koro Kain ne Habel de akyɛde brɛɛ Onyankopɔn. Kain de n’afum nnuan no bi bae. Na Habel de oguan a wadɔ sen biara a ɔwɔ no bae. Yehowa ani gyee Habel ne n’akyɛde no ho. Nanso n’ani annye Kain ne n’akyɛde no ho. Wunim nea enti?

Ɛnyɛ sɛ ebia na Habel akyɛde no ye sen Kain de no ntia. Nea enti ne sɛ na Habel yɛ onipa pa. Ná ɔdɔ Yehowa ne ne nua. Na Kain yɛ onipa bɔne; na ɔnnɔ ne nua.

Enti Onyankopɔn ka kyerɛɛ Kain sɛ ɛsɛ sɛ ɔsakra n’akwan. Nanso Kain antie. Ne bo fuwii efisɛ Onyankopɔn ani gyee Habel ho kɛse. Enti Kain ka kyerɛɛ Habel sɛ, ‘Ma yɛnkɔ afum.’ Na bere a wɔn nkutoo wɔ hɔ no, Kain de adi bɔɔ ne nua Habel. Ɔbɔɔ no kɛse araa ma owui. So na ɛnyɛ bɔne kɛse sɛ Kain bɛyɛ saa?

Kain reguan bere a okum Habel wiei no

Ɛwom sɛ Habel wui de, nanso Onyankopɔn da so kae no. Ná Habel yɛ onipa pa, na Yehowa werɛ mfi obi a ɔte saa da. Enti da koro Yehowa Nyankopɔn de Habel bɛba nkwa mu bio. Saa bere no ɛho renhia sɛ Habel wu. Obetumi atra asase so ha daa. So ɛrenyɛ papa sɛ yebehu nnipa te sɛ Habel?

Onyankopɔn ani nnye nnipa a wɔte sɛ Kain ho. Enti bere a Kain kum ne nua no akyi no, Onyankopɔn pam no fii baabi a n’abusuafo a aka no wɔ no kɔɔ akyirikyiri de twee n’aso. Bere a Kain kɔtraa asase yi fã baabi foforo no, ɔde ne nuanom mmea no mu biako kɔe, na ɔbɛyɛɛ ne yere.

Bere bi akyi no Kain ne ne yere fii ase sɛ wɔrewo mma. Adam ne Hawa mmabarima ne mmabea afoforo nso fii ase warewaree, na wɔn nso wowoo mma. Ankyɛ na nnipa bɛyɛɛ pii wɔ asase so. Momma yensua ebinom ho asɛm.

Genesis 4:2-26; 1 Yohane 3:11, 12; Yohane 11:25.



Nsɛmmisa

  • 1. Na Kain ne Habel yɛ adwuma bɛn?
  • Akyɛde bɛn na Kain ne Habel de brɛɛ Yehowa?
  • Adɛn nti na Yehowa ani gyee Habel akyɛde no ho na n’ani annye Kain de no ho?
  • Kain yɛ onipa bɛn, na dɛn na Yehowa yɛ de kyerɛe sɛ ɔpɛ sɛ Kain sakra n’akwan?
  • Dɛn na Kain yɛe bere a ɛkaa ɔne ne nuabarima no nkutoo wɔ afum no?
  • Ka nea ɛtoo Kain bere a okum ne nua no.

Nsɛmmisa foforo

  • Kenkan Genesis 4:2-26.

    Ɔkwan bɛn so na Yehowa kaa tebea a ɛyɛ hu a Kain aba mu no ho asɛm? (Gen. 4:7)

    Dɛn na Kain yɛe a ɛma yehu nea na ɛwɔ ne komam? (Gen. 4:9)

    Yehowa bu obi a ne ho nni asɛm mogya a wohwie gu no dɛn? (Gen. 4:10; Yes. 26:21)

  • Kenkan 1 Yohane 3:11, 12.

    Adɛn nti na Kain bo fuwii pii, na ɔkwan bɛn so na eyi yɛ kɔkɔbɔ ma yɛn nnɛ? (Gen. 4:4, 5; Mmeb. 14:30; 28:22)

    Ɔkwan bɛn so na Bible ma yehu sɛ sɛ yɛn abusuafo nyinaa sɔre tia Yehowa mpo a yebetumi akɔ so akura yɛn mudi mu? (Dw. 27:10; Mat. 10:21, 22)

  • Kenkan Yohane 11:25.

    Awerɛhyem bɛn na Yehowa de ma wɔ wɔn a wowu wɔ trenee nti no ho? (Yoh. 5:24)

SUA PII

SUASUA WƆN GYIDI

Habel—“Ɛwom sɛ Wawu De, Nanso Ɔda so Kasa”

Ɛwom sɛ Bible nka Habel ho nsɛm pii de, nanso dɛn na yebetumi asua afi ɔno ne ne gyidi ho asɛm no mu?