Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Me Nhoma a Ɛka Bible Mu Nsɛm

Adesua 2: Turo Fɛfɛ

Adesua 2: Turo Fɛfɛ

HWƐ asase no wɔ ha! Biribiara yɛ fɛfɛɛfɛ! Hwɛ wura ne nnua akɛse no, nhwiren ne mmoa no nyinaa. Wutumi hu ɛsono ne agyata no?

Mmoa a wɔwɔ Eden turo no mu

Ɛyɛɛ dɛn na turo fɛfɛ yi bae? Ma yɛnhwɛ sɛnea Onyankopɔn siesiee asase no maa yɛn.

Nea edi kan no, Onyankopɔn maa asase fuw wura. Na ɔyɛɛ afifide akɛse ne nketewa ne nnua ahorow. Saa afifide yi ma asase ani yɛ fɛ. Nanso ɛyɛ nea ɛsen saa. Emu pii nso ma yɛn aduan a ɛyɛ dɛ.

Akyiri yi Onyankopɔn maa mpataa baa nsu mu na nnomaa tu faa wim. Ɔyɛɛ akraman, nnyinamoa ne apɔnkɔ; mmoa akɛse ne nketewa. Mmoa bɛn na wɔbɛn mo fie? So ɛnsɛ sɛ ɛyɛ yɛn dɛ sɛ Onyankopɔn yɛɛ saa nneɛma yi nyinaa maa yɛn anaa?

Awiei koraa no, Onyankopɔn hyɛɛ da siesiee asase yi fã bi. Ɔfrɛɛ ɛhɔ Eden turo. Ná edi mu. Na biribiara yɛ fɛ. Na na Onyankopɔn pɛ sɛ asase nyinaa bɛyɛ te sɛ saa turo fɛfɛ a wayɛ no.

Nanso hwɛ turo yi mfonini no bio. Wunim ade a Onyankopɔn hui sɛ enni hɔ? Ma yɛnhwɛ.

Genesis 1:11-25; 2:8, 9.



Nsɛmmisa

  • Ɔkwan bɛn so na Onyankopɔn siesiee asase no na ama yɛatumi atra so?
  • Bobɔ mmoa ahorow a Onyankopɔn bɔɔ wɔn no din. (Hwɛ mfonini no.)
  • Adɛn nti na na Eden turo no yɛ soronko?
  • Dɛn na ná Onyankopɔn pɛ sɛ asase nyinaa yɛ?

Nsɛmmisa foforo

  • Kenkan Genesis 1:11-25.

    Da a ɛto so abiɛsa no, dɛn na Onyankopɔn bɔe? (Gen. 1:12)

    Da a ɛto so anan no dɛn na ɛbae? (Gen. 1:16)

    Da a ɛto so anum ne asia no, mmoa ahorow bɛn na Onyankopɔn bɔe? (Gen. 1:20, 21, 25)

  • Kenkan Genesis 2:8, 9.

    Nnua atitiriw abien bɛn na Onyankopɔn duaa no wɔ turo no mu, na na ɛyɛ dɛn ho nsɛnkyerɛnne?