Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Sua Biribi Fi Bible Mu

 ADESUA 3

Adam ne Hawa Yɛɛ Onyankopɔn So Asoɔden

Adam ne Hawa Yɛɛ Onyankopɔn So Asoɔden

Da koro bi, na Hawa kunu nni ne nkyɛn. Saa bere no, ɔwɔ bi bebisaa no sɛ: ‘Enti ɛyɛ ampa sɛ Onyankopɔn aka sɛ nnua a ɛwɔ turo yi mu no, ɛnsɛ sɛ mudi ne nyinaa so aba?’ Hawa kaa sɛ: ‘Nnua a ɛwɔ ha nyinaa yedi so aba, baako pɛ na yenni. Ɛno deɛ yedi bi a, yebewu.’ Ɔwɔ no kaa sɛ: ‘Morenwu. Mmom mudi a, mobɛyɛ sɛ Onyankopɔn.’ Ɛyɛ ampa? Dabi, ɛyɛ atoro! Nanso Hawa gyee ɔwɔ no dii. Hawa kɔɔ so hwɛɛ aduaba no, enti ne kɔn dɔe. Ɔtew bi dii, na ɔmaa Adam nso bi dii. Ná Adam nim sɛ, sɛ wɔyɛ Onyankopɔn so asoɔden a wobewu, nanso odii.

Saa da no anwummere, Yehowa ne Adam ne Hawa kasae. Obisaa wɔn nea enti a wɔyɛɛ asoɔden. Hawa de hyɛɛ ɔwɔ no. Adam nso de hyɛɛ Hawa. Asoɔden a Adam ne Hawa yɛ tiaa Yehowa nti, ɔpamoo wɔn fii turo no mu. Ná Onyankopɔn mpɛ sɛ wɔba turo no mu bio, enti ɔde abɔfo ne sekan a asɔ gya wɛn kwan no ano.

Yehowa kaa sɛ nea ɔdaadaa Hawa no nso, ɔbɛtwe n’aso. Ɛnyɛ ɔwɔ no ankasa na ɔkasa kyerɛɛ Hawa. Yehowa ammɔ ɔwɔ sɛ ɔnkasa. Ɛyɛ ɔbɔfo bɔne bi na ɔmaa ɔwɔ no kasae. Ɔyɛɛ saa de daadaa Hawa. Saa ɔbɔfo no, yɛfrɛ no Satan Ɔbonsam. Daakye, Yehowa bɛsɛe Satan, enti ɔrennya kwan bio nnaadaa nkurɔfo mma wɔnyɛ bɔne.

‘Ɔbonsam yɛ owudifo fi mfiase, na wannyina nokware no mu, efisɛ nokware nni ne mu.’”—Yohane 8:44