Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Sua Biribi Fi Bible Mu

 ADESUA 102

Yohane Adiyisɛm

Yohane Adiyisɛm

Bere a ɔsomafo Yohane da afiase wɔ Patmo supɔw so no, Yesu yii anisoadehu anaa mfonini 16 kyerɛɛ no. Ná wei fa nea ebesi daakye ho. Anisoadehu anaa Adiyisɛm no kyerɛɛ sɛnea Yehowa din ho bɛtew, n’Ahenni bɛba, na n’apɛde ayɛ hɔ wɔ asase so te sɛ soro.

Anisoadehu baako mu no, Yohane huu sɛ Yehowa te n’anuonyam ahengua so wɔ soro. Afei, mpanyimfo 24 a wɔhyehyɛ ntade fitaa na wɔbobɔ sika abotiri atwa ne ho ahyia. Aprannaa bobom fi ahengua no ho, na anyinam tete gya yerɛwyerɛw. Mpanyimfo 24 no kotow Yehowa anim som no. Anisoadehu foforo mu no, Yohane huu sɛ nnipakuw kɛse a wofi aman, mmusua, ne kasa ahorow mu resom Yehowa. Yesu a ɔyɛ Oguammaa no hwɛ wɔn so, na ɔde wɔn kɔ nkwa nsu ho. Akyiri yi, onyaa anisoadehu foforo, na ohuu sɛ Yesu ne mpanyimfo 24 no afi ase redi Hene wɔ soro. Anisoadehu a edi hɔ mu no, Yohane huu sɛ Yesu ne Satan a ɔyɛ ɔtweaseɛ anaa ɔwɔ no ne n’adaemone reko. Yesu tow wɔn fii soro beguu asase so.

 Afei Yohane huu mfonini fɛfɛɛfɛ bi. Ná Oguammaa no ne 144,000 no gyinagyina Bepɔw Sion so. Ɔsan huu sɛ ɔbɔfo bi nam wim rekyin asase so nyinaa. Ɔreka akyerɛ nnipa sɛ, ɛsɛ sɛ wosuro Onyankopɔn na wɔhyɛ no anuonyam.

Anisoadehu foforo nso bae, na ohuu Harmagedon ko. Saa ɔko no mu no, ohuu sɛ Yesu ne n’abɔfo adi Satan wiase bɔne yi so nkonim. Yohane anisoadehu a etwa to mu no, ohuu sɛ baakoyɛ aba wɔn a wɔwɔ soro ne asase so no ntam. Satan ne wɔn a wodi n’akyi nyinaa, wɔsɛee wɔn koraa. Wɔn a wɔwɔ soro ne asase so nyinaa tew Yehowa din kronkron no ho, na ɔno nko ara na wɔsom no.

“Mede ɔtan bɛto wo ne ɔbea no ntam ne w’aseni ne n’aseni ntam. Ɔno na ɔbɛbɔ wo ti na wo nso woaka ne nantin.”​—Genesis 3:15