Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Sua Biribi Fi Bible Mu

 ADESUA 83

Yesu Maa Nnipa Mpempem Aduan Dii

Yesu Maa Nnipa Mpempem Aduan Dii

Bere a na aka bere tiaa bi ma wɔadi Twam Afahyɛ wɔ afe 32 Y.B. no, asomafo no kɔɔ asɛnka, na wɔbae no, na wɔabrɛ. Enti Yesu de wɔn faa hyɛmma kɔɔ Betsaida sɛ wonkogye wɔn ahome. Nanso woduu mpoano hɔ no, Yesu hui sɛ na nnipa mpempem adi wɔn anim adu hɔ dedaw. Ɛwom sɛ na Yesu pɛ sɛ ɛka ɔne asomafo no nko ara deɛ, nanso ofi ɔdɔ mu gyee nnipadɔm no. Ɔsaa wɔn a wɔyare no yare, na ofii ase kyerɛkyerɛɛ wɔn. Da mũ no nyinaa, Yesu kyerɛkyerɛɛ wɔn Onyankopɔn Ahenni ho ade. Ade sae no, asomafo no baa ne nkyɛn bɛkae sɛ: ‘Ɛbɛyɛ sɛ ɔkɔm de nkurɔfo no. Enti ma wɔnkɔ na wɔnkɔpɛ biribi nni.’

Yesu kaa sɛ: ‘Ɛnsɛ sɛ wɔkɔ. Momma wɔn biribi nni.’ Asomafo no bisae sɛ: ‘Wopɛ sɛ yɛkɔtɔ aduan brɛ wɔn anaa?’ Asomafo no mu baako a wɔfrɛ no Filipo kaa sɛ: ‘Yenni sika a yɛde bɛtɔ aduan a ɛbɛso nnipadɔm no nyinaa.’

Yesu bisaa sɛ: ‘Aduan dodow sɛn na yɛwɔ?’ Andrea kaa sɛ: ‘Yɛwɔ paanoo nnum ne ɛnam nketewa mmienu. Nanso ɛrenso wɔn.’ Yesu kaa sɛ: ‘Fa paanoo ne nam no brɛ me.’ Ɔka kyerɛɛ nnipadɔm no sɛ wɔmmoaboa wɔn ho ano, ebinom 50, ebinom nso 100, na wɔntena ase. Yesu faa paanoo ne nam no, na ɔhwɛɛ soro bɔɔ mpae. Afei ɔde aduan no maa asomafo no, na wɔn nso kyekyɛ maa nnipa no. Mmarima 5,000 ne mmaa ne mmofra no nyinaa didi mee. Wowiei no, asomafo no sesaw nea ɛkae wɔ ase  no, sɛnea ɛbɛyɛ a biribiara rensɛe kwa. Wonyaa nkɛntɛn 12 a ne nyinaa ayɛ mã! Wunhu sɛ ɛyɛ anwonwasɛm?

Nnipa no ani gyee paa, enti na wɔpɛ sɛ wɔde Yesu yɛ wɔn hene. Nanso na Yesu nim sɛ Yehowa bere nsoe sɛ ɔbɛma wayɛ ɔhene. Enti ɔmaa nnipadɔm no kɔe, na ɔka kyerɛɛ n’asomafo no sɛ wɔnkɔ Galilea Po no akyi. Wɔkɔtenaa wɔn hyɛmma no mu, ɛnna Yesu nkutoo nso kɔɔ bepɔw bi so. Adɛn ntia? Efisɛ na ɔpɛ sɛ onya bere bɔ ne Papa mpae. Ɛwom sɛ na Yesu nni adagyew deɛ, nanso na ɔbɔ mpae bere nyinaa.

“Monnyɛ aduan a ɛsɛe ho adwuma, na mmom monyɛ aduan a ɛtena hɔ de kɔ daa nkwa mu a onipa Ba no de bɛma mo no ho adwuma.”—Yohane 6:27

SUA PII

YESU NE ƐKWAN NO, NOKORƐ NO NE NKWA

Ɔde Paanoo ne Mpataa Kakraa Bi Maa Mpempem Dii

Anwonwade a Yesu yɛe yi, sɛnea ɛka koma nti Nsɛmpa nnan no nyinaa kaa ho asɛm.