Bere a Yesu kaa asɛm no bɛyɛ afe ne abosome nsia akyi no, na ɛsɛ sɛ osi gyinae bi a ɛho hia paa. Henanom na na obeyi wɔn ne wɔn ayɛ adwuma? Henanom na na ɔbɛtete wɔn ama wɔadi Kristofo asafo no anim? Ná Yesu hia Yehowa akwankyerɛ ansa na watumi asi gyinae yi. Enti Yesu nko ara kɔɔ bepɔw bi so kɔbɔɔ mpae anadwo mũ nyinaa. Ade kyee no, Yesu frɛɛ n’asuafo no bi, na oyii wɔn mu 12 ma wɔbɛyɛɛ n’asomafo. Wokae wɔn mu bi din? Wɔn din ne Petro, Andrea, Yakobo, Yohane, Filipo, Bartolomeo, Toma, Mateo, Alfeo ba Yakobo, Tadeo, Simon ne Yuda Iskariot.

Andrea, Petro, Filipo, Yakobo

Dumienu no, na wɔne Yesu betutu akwan. Bere a ɔtetee wɔn wiei no, ɔsomaa wɔn ma wɔn nko ara kɔkaa asɛm no bi. Yehowa maa wɔn tumi a wɔde betu ahonhommɔne na wɔasa ayarefo yare.

Yohane, Mateo, Bartolomeo, Toma

Yesu frɛɛ Dumienu no sɛ ne nnamfo, na na ogye wɔn di. Ná Farisifo no bu asomafo no sɛ wonnim nhoma na wɔyɛ nnipa a  wɔba fam. Nanso Yesu tetee wɔn sɛnea ɛbɛyɛ a wobetumi ayɛ wɔn adwuma. Ná Yesu behia wɔn wɔ mmere titiriw bi mu. Ebi ne bere a ɔrebewu, ne ne wusɔre akyi. Yesu fi Galilea, na ɛhɔ ara na Dumienu no mu pii fi. Ná asomafo no bi yɛ awarefo.

Alfeo ba Yakobo, Yuda Iskariot, Tadeo, Simon

Ná asomafo no yɛ nnipa a bɔne wɔ wɔn ho. Ɛtɔ da a, na wotumi ka asɛm bi ansa na wɔadwen asɛm no ho. Ná wotumi sisi gyinae bɔne nso. Ɛtɔ da nso a, na wɔnto wɔn bo ase wɔ nneɛma ho. Wogyee nea ɔbɛyɛ wɔn mu kɛse ho akyinnye mpo. Nanso na wɔyɛ nnipa pa a wɔdɔ Yehowa. Wɔn na na wɔbɛhyɛ Kristofo asafo no ase bere a Yesu afi asase so no.

“Mafrɛ mo nnamfo, efisɛ nea mate afi m’Agya hɔ nyinaa mama moahu.”—Yohane 15:15