Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Asɛmpa a Efi Onyankopɔn Hɔ!

 ADESUA 8

Dɛn Nti na Onyankopɔn Ma Bɔne ne Amanehunu Kɔ So?

Dɛn Nti na Onyankopɔn Ma Bɔne ne Amanehunu Kɔ So?

1. Ɛyɛɛ dɛn na bɔne bae?

Bere tenten a Onyankopɔn ama kwan ma nnipa de adi tumi no ama ada adi sɛ wɔrentumi nyi nnipa haw ahorow mfi hɔ

Bɔne baa asase so bere a Satan dii atoro a edi kan no. Mfiase no, na Satan yɛ ɔbɔfo a ɔyɛ pɛ, nanso “wannyina nokware no mu.” (Yohane 8:44) N’ani begyee ho sɛ nnipa de ɔsom a ɛfata Onyankopɔn nkutoo no bɛma ɔno. Satan dii atoro kyerɛɛ ɔbea a odi kan a ɔne Hawa, na ɔdaadaa no ma otiee ɔno mmom sen Onyankopɔn. Adam kɔkaa Hawa ho ma wɔyɛɛ Onyankopɔn so asoɔden. Nea Adam yɛe no na ɛde amanehunu ne owu bae.​—Kenkan Genesis 3:1-6, 19.

Bere a Satan rema Hawa ayɛ Onyankopɔn so asoɔden no, na ɔretew atua atia Onyankopɔn tumidi anaa ne dibea sɛ Ɔsorosoroni no. Nnipa dodow no ara akodi Satan akyi ma wɔapo Onyankopɔn sɛ wɔn Sodifo. Enti, Satan abɛyɛ “wiase sodifo.”​—Kenkan Yohane 14:30; 1 Yohane 5:19.

2. So na mfomso wɔ Onyankopɔn abɔde ho?

Onyankopɔn nnwuma nyinaa yɛ pɛ. Ná nnipa ne abɔfo a Onyankopɔn abɔ wɔn no betumi ayɛ osetie koraa ama no. (Deuteronomium 32:4, 5) Bere a Onyankopɔn bɔɔ yɛn no, ɔmaa yɛn hokwan a ɛma yetumi paw sɛ yɛbɛyɛ papa anaa bɔne. Saa ahofadi no ma yenya hokwan da ɔdɔ a yɛwɔ ma Onyankopɔn no adi.​—Kenkan Yakobo 1:13-15; 1 Yohane 5:3.

3. Dɛn nti na Onyankopɔn ama amanehunu akɔ so abesi nnɛ?

Yehowa ama ne tumidi so atua a wɔatew no ho kwan kakra. Dɛn ntia? Sɛnea ɛbɛyɛ a nnipa behu sɛ obiara ntumi nni tumi mma ensi nnipa yiye bere a ne nsa nnim. (Ɔsɛnkafo 7:29; 8:9) Bɛboro mfe 6,000 a nnipa de adi tumi no ama ada adi sɛ asɛm yi yɛ nokware.  Nnipa a wɔyɛ sodifo ntumi nyii akodi, nsɛmmɔnedi, ntɛnkyea, ne yare mfii hɔ.​—Kenkan Yeremia 10:23; Romafo 9:17.

Nanso, Onyankopɔn nniso nte sɛ nnipa de, wɔn a wogye tom no nya so mfaso. (Yesaia 48:17, 18) Ɛrenkyɛ, Yehowa beyi nnipa nniso nyinaa afi hɔ. Nnipa a wogye Onyankopɔn tom sɛ wɔn sodifo nkutoo na wɔbɛtena asase so.—Yesaia 11:9.​—Kenkan Daniel 2:44.

4. Hokwan bɛn na abotare a Onyankopɔn ada no adi no ama yɛanya?

Satan kyerɛe sɛ obiara nni hɔ a obefi ne komam asom Yehowa. So wompɛ sɛ wobɛma ada adi sɛ saa asɛm no yɛ atoro? Wubetumi ayɛ saa! Abotare a Onyankopɔn wɔ no ama yɛn nyinaa anya hokwan a yɛde bɛkyerɛ sɛ yɛpɛ sɛ odi yɛn so anaa nnipa mmom di yɛn so. Yɛn abrabɔ na yɛde kyerɛ nea yɛpɛ sɛ odi yɛn so.​—Kenkan Hiob 1:8-12; Mmebusɛm 27:11.

5. Yɛbɛyɛ dɛn atumi apaw Onyankopɔn sɛ yɛn Sodifo?

Sɛnea yɛbɔ yɛn bra no na ɛkyerɛ sɛ Onyankopɔn na yɛpɛ sɛ ɔyɛ yɛn Sodifo

Sɛ yɛhwehwɛ nokware som a egyina Bible a ɛyɛ Onyankopɔn Asɛm no so na yɛde yɛn ho hyɛ mu a, yebetumi apaw no sɛ yɛn Sodifo. (Yohane 4:23) Nea yebetumi ayɛ de apo Satan sɛ yɛn sodifo sɛnea Yesu yɛe ne sɛ yɛremfa yɛn ho nhyehyɛ amanyɔsɛm ne akodi mu.​—Kenkan Yohane 17:14.

Satan de ne tumi hyɛ ɔbrasɛe ne nneyɛe bɔne ho nkuran. Sɛ yɛanyɛ nneɛma bɔne no bi a, yɛn nnamfo ne yɛn abusuafo binom betumi adi yɛn ho fɛw anaa wɔasɔre atia yɛn. (1 Petro 4:3, 4) Enti ɛsɛ sɛ yesi gyinae. So yɛne nnipa a wɔdɔ Onyankopɔn na ɛbɛbɔ? So yebedi ne mmara a nyansa wom a ofi ɔdɔ mu de ma yɛn no so? Sɛ yɛyɛ saa a, yɛma ɛda adi sɛ Satan dii atoro bere a ɔkyerɛe sɛ sɛ nnipa ho kyere wɔn a, obiara rentie Onyankopɔn no.​—Kenkan 1 Korintofo 6:9, 10; 15:33.

Ɔdɔ a Onyankopɔn wɔ ma nnipa no ma yenya awerɛhyem sɛ bɔne ne amanehunu befi hɔ. Wɔn a wɔda no adi sɛ wogye saa asɛm yi di no bɛtena ase daa wɔ asase so.​—Kenkan Yohane 3:16.