NEA ENTI A ƐHO HIA: Nnipa pii ani gye Ahenni asɛm no ho. Wɔyɛ saa de kyerɛ sɛ wɔrehwehwɛ Nyankopɔn ho nokwasɛm. (Yes 55:6) Sɛ yebetumi akyerɛkyerɛ wɔn ama atu mpɔn a, ɛsɛ sɛ yɛkɔ so ara kɔ wɔn nkyɛn. Ɛsono obiara ne n’asetenam nsɛm, enti sɛ yebetumi aboa nkurɔfo ma wɔn ani agye asɛm no ho a, ɛsɛ sɛ yɛsakra yɛn nsɛm mu. Yɛn botae paa ne sɛ yebefi Bible adesua ase. Enti ɛsɛ sɛ yɛde biribi titiriw bi si yɛn ani so. Sɛ yebetumi ayɛ saa a, gye sɛ yesiesie yɛn ho yiye ma sankɔhwɛ biara.

SƐNEA WOBƐYƐ NO:

  • Bɔ mmɔden yɛ ntɛm kɔsra no, anyɛ yiye koraa no nna kakraa bi ntam.—Mt 13:19

  • Tew w’anim na da obu adi. Mpere wo ho

  • Fi wo komam kyia no. Fa ne din frɛ no. Ma onhu nea enti a woaba hɔ. Ebetumi aba sɛ worekoyi asɛm bi ano, wode nsɛmma nhoma foforo a aba rekɔma no, worekɔtwe n’adwene asi yɛn wɛbsaet no so, worekoyi video akyerɛ no, anaa worekɔkyerɛ no sɛnea yɛne nkurɔfo yɛ Bible adesua. Sɛ wokɔ hɔ na ɔde asɛm foforo mmom ba sɛ munsusuw ho a, ɛnde yɛ no saa.—Flp 2:4

  • Nokware aba a woadua wɔ nipa no komam no, sɛ wubetumi agugu so nsu a, gye sɛ wo ne no susuw Bible mu asɛm bi ho, na sɛ ɛbɛyɛ yiye a woama no nhoma. (1Ko 3:6) Bɔ mmɔden ka biribi a n’ani begye ho

  • Fa asɛm bi gyaw no na da foforo moasusuw ho