Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Kristofo Abrabɔ ne Yɛn Asɛnka—Adesua Nhoma  |  June 2017

 KRISTOFO ABRABƆ

Gye Yehowa Mmara a Ɛfa Abrabɔ Ho no Tom

Gye Yehowa Mmara a Ɛfa Abrabɔ Ho no Tom

Yehowa Nyankopɔn akyerɛ nnipa sɛnea ɛsɛ sɛ wɔbɔ wɔn bra. Ɛho nhwɛso ne sɛ, Onyankopɔn ahyɛ sɛ ɔbea ne ɔbarima na ɛsɛ sɛ wɔware, na ɛnsɛ sɛ wɔtetew mu. (Mt 19:4-6, 9) Ɔkasa tia nna mu ɔbrasɛe biara. (1Ko 6:9, 10) Sɛnea ɛsɛ sɛ ne nkurɔfo siesie wɔn ho, ne ntade a ɛsɛ sɛ wɔhyɛ mpo, wɔama wɔn ɛho akwankyerɛ na ama wɔada nsow.—De 22:5; 1Ti 2:9, 10.

Ɛnnɛ, nnipa pii mfa Yehowa gyinapɛn anaa ne mmara nyɛ hwee. (Ro 1:18-32) Mmom, ntadehyɛ ne ahosiesie a aba so ne sɛnea nnipa dodow no ara bɔ wɔn bra na wodi akyi. Nnipa bebree yɛ bɔne akɛseakɛse de hoahoa wɔn ho, na sɛ obi nyɛ nea wɔyɛ no bi a wɔkasa tia no.—1Pe 4:3, 4.

Yehowa Adansefo deɛ, Onyankopɔn mmara a ɛfa abrabɔ ho no, ɛsɛ sɛ yɛde akokoduru gyina akyi. (Ro 12:9) Yɛbɛyɛ no sɛn? Ɛsɛ sɛ yɛfa anifere kwan so ma nkurɔfo hu abrabɔ a Yehowa pene so. Yɛn ankasa nso, ɛsɛ sɛ yɛkɔ so ma yɛn abrabɔ ho tew; ɛnsɛ sɛ efĩ ne nkekae biara ba ho. Yɛmfa no sɛ yɛrepaw ntade a yɛbɛhyɛ ne sɛnea yebesiesie yɛn ho. Yebetumi abisa yɛn ho sɛ: ‘Yehowa gyinapɛn anaa ne mmara na ɛkyerɛ me kwan anaasɛ wiase no deɛ? Ntade a mehyɛ ne sɛnea misiesie me ho kyerɛ sɛ meyɛ Kristoni a misuro Nyankopɔn?’ Anaa yɛmfa no sɛ yɛrepɛ sini anaa dwumadi bi ahwɛ. Yebetumi abisa yɛn ho sɛ: ‘Yehowa ani begye sini anaa dwumadi yi ho? Ɛbɛma mabɔ me bra sɛnea Yehowa pɛ anaa sɛnea wiase no pɛ? Nneɛma a mede gyigye m’ani no, ɛbɛma ayɛ den ama me sɛ mɛbɔ bra pa? (Dw 101:3) Ebetumi ato m’abusuafo ne afoforo hintidua?’—1Ko 10:31-33.

Sɛnea Yehowa pɛ sɛ yɛbɔ yɛn bra no, adɛn nti na ehia paa sɛ yegye tom? Ɛrenkyɛ biara Kristo Yesu bɛsɛe amanaman no, na wayi abɔnefosɛm nyinaa afi hɔ. (Hes 9:4-7) Wɔn a wɔreyɛ Onyankopɔn apɛde nko ara na ɛbɛka. (1Yo 2:15-17) Ɛnde, Yehowa mmara a ɛfa abrabɔ ho no, momma yennye ntom. Ɛno bɛma wɔn a wohu yɛn abrabɔ pa no ahyɛ Onyankopɔn anuonyam.—1Pe 2:11, 12.

Me ntadehyɛ ne m’ahosiesie kyerɛ sɛ hena mmara na ɛkyerɛ me sɛnea memmɔ me bra?

MONHWƐ VIDEO A YƐATO DIN BRA BƐYƐ YEHOWA ADAMFO—ƆBAA BAAKO, BARIMA BAAKO NO. MUWIE A, MUNSUSUW NSƐMMISA YI HO:

  • Adɛn nti na nyansa wom sɛ yɛde Yehowa gyinapɛn anaa ne mmara bɛbɔ yɛn bra?

  • Adɛn nti na ɛsɛ sɛ awofo de Yehowa mmara a ɛfa abrabɔ ho kyerɛkyerɛ wɔn mma fi wɔn mmofraase pɛɛ?

  • Ɛdɛn na mmofra ne mpanyin nyinaa betumi ayɛ de aboa nkurɔfo ama wɔanya Onyankopɔn papayɛ so mfaso?