Fa no sɛ na wote Galilea wɔ Yesu bere so. Asese Afahyɛ bere aso, enti woatwa kwan akodu Yerusalem rekodi afahyɛ no. Wo nuanom a wo ne wɔn som Yehowa fi akyirikyiri abɛhyɛ Yerusalem mã ama ɛhɔ ayɛ manyamanya. Afei wopɛ sɛ wode w’afɔrebɔde kɔ Yehowa anim. Enti wofa w’apɔnkye de w’ani kyerɛ asɔrefie hɔ. Wotwe aboa no de no fa kwan a nnipa akyere so no so. Wumiaa w’ani koduu asɔrefie hɔ a, nkurɔfo na abɔ apee so yi; obiara rebɛbɔ n’afɔre. Afei adu wo so sɛ wode w’apɔnkye ma asɔfo no. Ɛhɔ ara na wokaee sɛ wo nua wɔ asɛm bi tia wo. Wo nua yi nso a, ebetumi aba sɛ ɔhyɛ nnipadɔm no mu anaa ɔnam kurow no mu baabi. Wobɛyɛ no dɛn? Yesu kyerɛ wo nea ɛsɛ sɛ woyɛ. (Kenkan Mateo 5:24.) Wobɛyɛ dɛn na wo ne wo nua a ɔwɔ asɛm tia wo no asiesie mo ntam sɛnea Yesu akyerɛ no? Hwɛ nsɛm a ɛwɔ ase ha no, na kyerɛ mmuae a ɛwɔ hɔ no mu nea ɛyɛ papa.

NEA ƐSƐ SƐ WOYƐ NI:

  • sɛ wote nka sɛ ade a woayɛ wo nua no, ɛsɛ sɛ ɛhaw no nko ara de a, ɛnde wo ne no nkɔka

  • sɛ wote nka sɛ nsɛm haw wo nua no dodo anaasɛ ɔka ho bi na ɔhaw no aba a, bɔ mmɔden teɛ n’adwene

  • sɛ wo nua no rekasa a, tɔ wo bo ase tie no. Ebia ɛnyɛ nea ɔreka no nyinaa na wote ase mpo, anaasɛ nea woyɛe no nyɛ boapayɛ, nanso ɔno de ahaw no. Enti, fi wo komam pa no kyɛw

NEA ƐSƐ SƐ WO NUA NO YƐ NI:

  • ɛsɛ sɛ nea woayɛ no no, ɔkeka kyerɛ asafo no mufo ma wɔtaa n’akyi

  • ɛsɛ sɛ otwiw w’anim, na ɔka bɔne a woayɛ no no nyinaa kyerɛ wo, na ɔma wugye tom sɛ woanyɛ no yiye

  • ɛsɛ sɛ ohu sɛ egyee ahobrɛase ne akokoduru ansa na woretumi aba n’anim, na ofi ne komam de kyɛ wo

Ɛwom sɛ ɛnnɛ yɛmfa mmoa mmɔ afɔre wɔ yɛn som mu de, nanso dɛn na na Yesu rekyerɛkyerɛ fa abusuabɔ a ɛwɔ asomdwoe a ɛbɛtena yɛne yɛn nua ntam ne yɛn som a ɛbɛsɔ Onyankopɔn ani no mu?