Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Yosua 7:1-26

7  Bere a wɔkae sɛ Israelfo nsɛe abusude biara no, wɔanni nokware, efisɛ Sera a ofi Yuda abusuakuw mu no ba Sabdi ba Karmi ba Akan+ faa nneɛma a wɔkae sɛ wɔnsɛe no+ no bi. Na Yehowa bo fuw Israelfo no denneennen.+  Afei Yosua somaa mmarima fii Yeriko sɛ wɔnkɔ Ai+ a ɛbɛn Bet-Awen+ wɔ Betel+ apuei fam, na ɔka kyerɛɛ wɔn sɛ: “Munwia mo ho nkɔhwɛ sɛnea asase no te.” Enti mmarima no kɔhwɛe sɛnea Ai te.+  Wɔbae no, wɔka kyerɛɛ Yosua sɛ: “Enhia sɛ woma ɔman yi nyinaa foro kɔ hɔ. Ma mmarima bɛyɛ mpem abien anaa mpem abiɛsa pɛ nkɔ Ai so. Nhaw ɔman no nyinaa sɛ wɔnkɔ hɔ, efisɛ wosua.”  Enti mmarima bɛyɛ mpem abiɛsa kɔɔ hɔ, nanso woguan fii Ai mmarima no anim.+  Na Ai mmarima no kunkum wɔn mu bɛyɛ aduasa asia, na wɔtaa+ wɔn fii kurow no ano kosii Sebarim, na bere a wɔresian nyinaa na wɔrekunkum wɔn. Eyi maa nnipa no koma nanee na ɛyɛe sɛ nsu.+  Yosua huu nea asi no, osuan n’atade mu na ɔde n’anim butuw fam+ wɔ Yehowa adaka no anim kosii anwummere, ɔne Israel mpanyimfo no, na wɔde dɔte guu wɔn atifi.+  Afei Yosua kae sɛ: “Ao Awurade Tumfoɔ Yehowa, dɛn nti na wode ɔman yi atwa Yordan aba ha sɛ wode yɛn rebɛhyɛ Amorifo nsa na wɔasɛe yɛn? Eyi de, sɛ yɛtenaa yɛn baabi wɔ Yordan agya nohoa a, anka eye.+  Ao Yehowa, Israel na adan n’akyi akyerɛ n’atamfo yi, dɛn bio na metumi aka?  Hwɛ, Kanaanfo ne asase no so nnipa nyinaa bɛte, na wɔbɛba abetwa yɛn ho ahyia, na wɔatwa yɛn din afi asase so.+ Dɛn na wobɛyɛ de agye wo din kɛse yi?”+ 10  Ɛnna Yehowa ka kyerɛɛ Yosua sɛ: “Sɔre! Dɛn nti na wode w’anim abutuw fam? 11  Israelfo ayɛ bɔne, na wɔabu m’apam+ a mede sii wɔn anim no so. Wɔafa abusude a mekae sɛ wɔnsɛe no no bi,+ wɔawia+ bi, wɔakata so,+ na wɔde akɔka wɔn nneɛma ho.+ 12  Hwɛ, Israelfo rentumi nnyina wɔn atamfo anim.+ Wɔn akyi na wɔbɛdan akyerɛ wɔn atamfo, efisɛ wɔadan abusude. Enti sɛ moanyi abusude yi amfi mo mfinimfini ansɛe no a, merenni mo akyi.+ 13  Sɔre! Tew ɔman no ho+ na ka kyerɛ wɔn sɛ, ‘Montew mo ho ɔkyena, na nea Israel Nyankopɔn Yehowa aka ni: “O Israel, abusude bi wɔ wo mfinimfini.+ Sɛ moanyi abusude yi amfi mo mu a, morentumi nnyina mo atamfo anim. 14  Na ɔkyena anɔpa mmusuakuw mmusuakuw a ɛwɔ Israel nyinaa mmra mmiako mmiako, na abusuakuw a Yehowa beyi no,+ emu mmusua nso mmra mmiako mmiako. Afei abusua a Yehowa beyi no mu afie mmra mmiako mmiako. Na ofie a Yehowa beyi no mu mmarima nso mmra mmiako mmiako. 15  Na nea obeyi no sɛ ɔno na abusude no wɔ ne nkyɛn no, wɔmfa ogya nhyew ɔne nea ɔwɔ nyinaa,+ efisɛ wabu Yehowa apam so+ ayɛ aniwude wɔ Israel.”’”+ 16  Na Yosua sɔree anɔpahema frɛɛ mmusuakuw a ɛwɔ Israel nyinaa bae mmiako mmiako, na woyii Yuda abusuakuw no. 17  Afei ɔmaa Yuda abusuakuw no mu mmusua nyinaa bae mmiako mmiako, na woyii Sera+ abusua no. Na ɔmaa Sera abusua no mu mmarima bae mmiako mmiako, na woyii Sabdi. 18  Awiei koraa no ɔmaa ne fie mmarima bae mmiako mmiako, na Sera a ofi Yuda abusuakuw mu no ba Sabdi ba Karmi ba Akan na woyii no.+ 19  Afei Yosua ka kyerɛɛ Akan sɛ: “Me ba, hyɛ Israel Nyankopɔn Yehowa anuonyam+ na ka wo bɔne kyerɛ no.+ Dɛn na woyɛe? Ka kyerɛ me,+ mfa hwee nsie.”+ 20  Ɛnna Akan buaa Yosua sɛ: “Nokwasɛm ni, mayɛ Israel Nyankopɔn Yehowa bɔne,+ na nea meyɛe ni: 21  Mihuu+ atade fɛfɛ bi a efi Sinar+ ne dwetɛ nnwetɛbona ahanu ne sika kɔkɔɔ a emu duru yɛ nnwetɛbona aduonum wɔ asade no mu, na na m’ani gye ho+ enti mefae.+ Na mede asie fam wɔ me ntamadan mu na sika no hyɛ ase.”+ 22  Ɛnna Yosua somaa nnipa ntɛm kɔɔ ntamadan no mu, na ampa ara na ɔde sika no ahyɛ nneɛma no ase de asie ne ntamadan mu. 23  Enti woyi fii ntamadan no mu de brɛɛ Yosua ne Israelfo no nyinaa, na wɔde beguu Yehowa anim. 24  Afei Yosua ne Israelfo nyinaa de Sera ba Akan+ ne dwetɛ ne atade ne sika kɔkɔɔ+ no ne ne mmabarima ne ne mmabea ne n’anantwi ne ne mfurum ne ne nguan ne ne ntamadan ne biribiara a ɔwɔ baa Akor bon+ mu. 25  Afei Yosua kae sɛ: “Dɛn nti na wode mmusu aba yɛn so yi?+ Yehowa nso de mmusu bɛba wo so nnɛ.” Ɔkaa saa no, Israelfo nyinaa siw no abo,+ na akyiri yi wɔde ogya hyew wɔn.+ Enti wosiw wɔn abo. 26  Na wɔsoaa abo guu no so ma ɛbɛyɛɛ siw kɛse, na ɛwɔ hɔ de besi nnɛ.+ Afei Yehowa bo dwoe.+ Enti wɔtoo hɔ din Akor Bon,+ na wɔfrɛ hɔ saa de besi nnɛ.

Ase Hɔ Nsɛm