Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Yohane 9:1-41

9  Afei bere a ɔretwam no, ohuu ɔbarima bi a wɔwoo no onifuraefo.  Ɛnna n’asuafo no bisaa no sɛ: “Rabi,+ hena na ɔyɛɛ bɔne,+ ɔbarima yi anaa n’awofo,+ a enti wɔwoo no onifuraefo yi?”  Yesu buae sɛ: “Ɔbarima yi anaa n’awofo mu biara nyɛɛ bɔne, na mmom sɛnea Onyankopɔn nnwuma bɛda adi wɔ ne fam ntia.+  Adekyee wɔ hɔ yi, ɛsɛ sɛ yɛyɛ nea ɔsomaa me no nnwuma;+ anadwo+ reba a obiara rentumi nyɛ adwuma.  Bere tenten a mewɔ wiase yi de, mene wiase hann.”+  Ɔkaa saa no, ɔtee ntasu too fam na ɔde fɔtɔw dɔte de sraa ɔbarima no ani so,+  na ɔka kyerɛɛ no sɛ: “Kɔhohoro+ wɔ ɔtare Siloa+ (a ne nkyerɛase ne ‘Wɔasoma’) no mu. Enti ɔkɔe kɔhohoroe,+ na ɔsan bae no, na ohu ade.+  Ɛnna ne kuromfo ne wɔn a kan no na wohu no sɛ ɔsrɛsrɛ ade no fii ase kae sɛ: “Ɛnyɛ ɔbarima a na ɔtaa tena ase srɛsrɛ ade no ni?”+  Ebinom kae sɛ: “Ɔno ni.” Afoforo nso kae sɛ: “Dabi, mmom ɔsɛ no.” Ɔbarima no kae sɛ: “Mene no.” 10  Ɛnna wɔka kyerɛɛ no sɛ: “Ɛnde ɛyɛɛ dɛn na w’aniwa buei?”+ 11  Obuae sɛ: “Obi a wɔfrɛ no Yesu na ɔfɔtɔw dɔte de sraa m’ani so ka kyerɛɛ me sɛ, ‘Kɔ Siloa+ mu kɔhohoro.’ Enti mekɔhohoroe na mihuu ade.” 12  Ɛnna wɔka kyerɛɛ no sɛ: “Ɔwɔ he?” Ɔkae sɛ: “Minnim.” 13  Afei wɔde ɔbarima a anka n’ani afura no kɔɔ Farisifo no hɔ. 14  Asɛm no ne sɛ, na ɛda a Yesu fɔtɔw dɔte na obuee n’ani+ no yɛ Homeda.+ 15  Ɛnna afei Farisifo no nso bisaa no nea ɛyɛe a ohuu ade.+ Ɔka kyerɛɛ wɔn sɛ: “Ɔde dɔte yɛɛ m’ani so, ɛnna mehohoroe a mihu ade yi.” 16  Enti Farisifo no bi fii ase kae sɛ: “Onipa yi mfi Onyankopɔn hɔ, efisɛ onni Homeda.”+ Afoforo nso fii ase kae sɛ: “Ɛbɛyɛ dɛn na obi a ɔyɛ ɔbɔnefo atumi ayɛ nsɛnkyerɛnne+ a ɛte saa?” Enti wɔn mu paee.+ 17  Ɛnna wobisaa onifuraefo no bio sɛ: “Bere a wabue w’aniwa yi, dɛn na woka fa ne ho?” Ɔbarima no kae sɛ: “Ɔyɛ odiyifo.”+ 18  Nanso Yudafo no annye anni sɛ na n’ani afura na afei wahu ade kosii sɛ wɔfrɛɛ ɔbarima a wahu ade no awofo bae. 19  Ɛnna wobisaa wɔn sɛ: “Mo ba a moka sɛ wɔwoo no onifuraefo no ni? Ɛnde ɛyɛɛ dɛn na seesei ohu ade?” 20  N’awofo buae sɛ: “Yenim sɛ yɛn ba ni, na yɛwoo no no, na n’ani afura. 21  Nanso nea ɛyɛe a seesei ohu ade yi de, yennim, na onii a obuee n’ani no nso yennim. Mummisa no. Wanyin. Ɔno ara bɛkasa ama ne ho.” 22  N’awofo kaa eyi efisɛ na wosuro+ Yudafo no, na na Yudafo no abɔ pɔw sɛ sɛ obi gye no tom sɛ Kristo a, wobetu no afi hyiadan no mu.+ 23  Eyi nti na n’awofo kae sɛ: “Wanyin. Mummisa no.” 24  Enti wɔsan frɛɛ ɔbarima a na n’ani afura no ne mprenu so, na wɔka kyerɛɛ no sɛ: “Hyɛ Onyankopɔn anuonyam;+ yenim sɛ onipa yi yɛ ɔbɔnefo.” 25  Ɔno nso buae sɛ: “Sɛ ɔyɛ ɔbɔnefo a, me de minnim. Ade biako na minim, ɛne sɛ na meyɛ onifuraefo, nanso seesei mihu ade.” 26  Ɛnna wobisaa no sɛ: “Ɛdɛn na ɔyɛɛ wo? Ɔyɛɛ dɛn na obuee w’ani?” 27  Obuaa wɔn sɛ: “Maka akyerɛ mo dedaw nanso moantie. Adɛn na mopɛ sɛ mote bio? Mo nso mopɛ sɛ moyɛ n’asuafo anaa?” 28  Ɛnna wɔyeyaw no kae sɛ: “Wo na woyɛ ne suani, na yɛn de, yɛyɛ Mose asuafo. 29  Yenim sɛ Onyankopɔn akasa akyerɛ Mose;+ na onipa yi de, yennim baabi a ofi.”+ 30  Ɔbarima no bua see wɔn sɛ: “Asɛm yi yɛ nwonwa paa+ sɛ munnim baabi a ofi, nanso wabue m’aniwa. 31  Yenim sɛ Onyankopɔn ntie abɔnefo,+ na mmom sɛ obi suro Onyankopɔn na ɔyɛ n’apɛde a, otie no.+ 32  Efi tete besi nnɛ yɛntee sɛ obi abue nea wɔawo no onifuraefo ani da. 33  Sɛ onipa yi mfi Onyankopɔn a,+ anka ontumi nyɛ hwee.” 34  Wobua see no sɛ: “Wo a bɔne mu nko na wɔwoo wo yi,+ wo na worekyerɛkyerɛ yɛn?” Ɛnna wɔpam no fii hɔ!+ 35  Yesu tee sɛ wɔapam no, na bere a ohuu no no, ɔka kyerɛɛ no sɛ: “Wugye onipa Ba+ no di anaa?” 36  Ɔbarima no buae sɛ: “Owura, ɔne hena na minnye no nni?” 37  Yesu ka kyerɛɛ no sɛ: “Woahu no, na hwɛ, ɔno ara na ɔne wo rekasa yi.”+ 38  Ɛnna ɔka kyerɛɛ no sɛ: “Owura, migye no di.” Na ɔkotow+ n’anim. 39  Ɛnna Yesu kae sɛ: “Atemmu+ yi nti na mebaa wiase: sɛ wɔn a wonhu ade no behu ade,+ na wɔn a wohu ade no adan anifuraefo.”+ 40  Farisifo no mu bi a wɔka ne ho no tee nsɛm yi, na wɔka kyerɛɛ no sɛ: “Yɛn nso yɛyɛ anifuraefo+ anaa?” 41  Yesu ka kyerɛɛ wɔn sɛ: “Sɛ moyɛ anifuraefo a, anka bɔne nni mo ho. Nanso afei moka sɛ, ‘Yehu ade.’+ Mo bɔne+ no aka hɔ.”

Ase Hɔ Nsɛm