Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Yohane 5:1-47

5  Eyi akyi no, Yudafo afahyɛ+ bi dui, na Yesu kɔɔ Yerusalem.  Ɔtare bi wɔ Yerusalem nguanten ponkɛse+ no ho a wɔfrɛ no Hebri mu sɛ Betesda a ɛwɔ abrannaa anum.  Ɛha na na ayarefo, anifuraefo, mpakye ne wɔn a wɔn fa awuwu pii deda.  ——  Ná ɔbarima bi wɔ hɔ a wayare mfe aduasa awotwe.  Bere a Yesu huu ɔbarima yi sɛ ɔda hɔ, na onim sɛ wayare bere tenten no,+ obisaa no sɛ: “Wopɛ sɛ wo ho yɛ wo den anaa?”+  Ɔyarefo no buaa no sɛ: “Owura, minni obiara a sɛ nsu no fono a ɔde me bɛkɔ akɔto ɔtare no mu; na sɛ mereba a, na obi adi m’anim akɔtɔ mu.”  Yesu ka kyerɛɛ no sɛ: “Sɔre fa wo kɛtɛ na nantew.”+  Ɛhɔ ara na ɔbarima no ho yɛɛ no den, na ɔfaa ne kɛtɛ fii ase nantewee. Ná saa da no yɛ homeda.+ 10  Enti Yudafo no ka kyerɛɛ ɔbarima a wɔasa no yare no sɛ: “Ɛyɛ Homeda, na mmara mma kwan+ sɛ wobɛsoa kɛtɛ no.” 11  Ɛnna obuaa wɔn sɛ: “Nea ɔsaa me yare no ara na ɔka kyerɛɛ me sɛ, ‘Fa wo kɛtɛ na nantew.’” 12  Wobisaa no sɛ: “Onipa bɛn na ɔka kyerɛɛ wo sɛ, ‘Fa wo kɛtɛ na nantew’ no?” 13  Nanso na ɔbarima a wɔasa no yare no nnim onipa ko, efisɛ na Yesu atwe ne ho afi hɔ kɔ esiane nnipakuw a wɔwɔ hɔ no nti. 14  Eyinom akyi no, Yesu huu no wɔ asɔrefie hɔ, na ɔka kyerɛɛ no sɛ: “Hwɛ, wo ho ayɛ wo den. Nyɛ bɔne bio na biribi a ɛsen eyi anyɛ wo.” 15  Ɔbarima no fii hɔ kɔe, na ɔkɔka kyerɛɛ Yudafo no sɛ Yesu na ɔmaa ne ho yɛɛ no den. 16  Asɛm yi maa Yudafo no fii ase taa+ Yesu, efisɛ ɔyɛɛ eyinom Homeda. 17  Na obuaa wɔn sɛ: “M’Agya ayɛ adwuma abesi sesɛɛ, na me nso mekɔ so yɛ adwuma.”+ 18  Eyi koraa na ɛmaa Yudafo no hwehwɛe sɛ wobekum no,+ efisɛ ɛnyɛ Homeda nko na na ɔrebu so, na mmom ɔfrɛɛ Onyankopɔn sɛ n’Agya ankasa,+ yɛɛ ne ho sɛ ɔne Onyankopɔn yɛ pɛ.+ 19  Enti Yesu toaa so maa wɔn mmuae sɛ: “Nokware, nokware, mise mo sɛ, Ɔba no ankasa ntumi mmɔ ne tirim nyɛ hwee, gye nea ohu sɛ Agya no yɛ.+ Na biribiara a Ɔno yɛ no, ɛno ara na Ɔba no nso yɛ. 20  Agya no pɛ Ɔba+ no asɛm na ɔkyerɛ no nneɛma a ɔno ankasa yɛ nyinaa, na ɔbɛkyerɛ no nnwuma akɛse asen eyinom na ayɛ mo nwonwa.+ 21  Na sɛnea Agya no nyan awufo na ɔma wɔn nkwa no,+ saa ara na Ɔba no nso ma wɔn a ɔpɛ ba nkwa mu.+ 22  Na Agya no mmu obiara atɛn, na mmom ɔde atemmu nyinaa ahyɛ Ɔba no nsa,+ 23  na ama obiara adi Ɔba no ni+ sɛnea wodi Agya no ni no. Nea onni Ɔba no ni no, nni Agya a ɔsomaa no no ni.+ 24  Nokware, nokware, mise mo sɛ, nea otie m’asɛm na ogye nea ɔsomaa me no di no wɔ daa nkwa,+ na ɔmma atemmu mu, na mmom wafi owu mu aba nkwa mu.+ 25  “Nokware, nokware, mise mo sɛ, dɔn no reba, na adu, sɛ awufo+ bɛte Onyankopɔn Ba no nne,+ na wɔn a wɔayɛ asõ atie no benya nkwa.+ 26  Na sɛnea Agya no wɔ nkwa wɔ n’ankasa mu no,+ saa ara na ɔde ama Ɔba no sɛ ɔno nso nnya nkwa wɔ n’ankasa mu.+ 27  Na Wama no tumi sɛ ommu atɛn,+ efisɛ ɔyɛ onipa Ba.+ 28  Mommma eyi nnyɛ mo nwonwa, efisɛ dɔn no reba a wɔn a wɔwɔ nkae ada+ mu nyinaa bɛte ne nne 29  na wɔafi adi; wɔn a wɔyɛɛ papa no bɛkɔ nkwa sɔre mu,+ na wɔn a wɔyɛɛ akyide no akɔ atemmu sɔre mu.+ 30  Mintumi mmɔ me tirim nyɛ hwee; nea mete no ara na migyina so bu atɛn; na atɛn a mibu no teɛ,+ efisɛ menhwehwɛ nea m’ankasa mepɛ, na mmom nea ɔsomaa me no apɛde.+ 31  “Sɛ me nkutoo midi me ho adanse+ a, m’adanse no nyɛ nokware.+ 32  Obi foforo wɔ hɔ a odi me ho adanse, na minim sɛ adanse a odi+ wɔ me ho no yɛ nokware. 33  Moasoma nnipa akɔ Yohane hɔ, na wadi nokware no ho adanse.+ 34  Nanso minnye adanse mfi nnipa hɔ, na meka eyinom na moanya nkwa.+ 35  Ná ɔyɛ kanea a ɛdɛw na ɛhyerɛn, na mo de, na mopɛ sɛ mo ani gye kɛse wɔ ne hann mu+ bere kakra. 36  Nanso, mewɔ adanse a ɛsen Yohane de no, efisɛ nnwuma a m’Agya de ahyɛ me nsa sɛ menyɛ no, nnwuma no ara a mereyɛ+ no di me ho adanse sɛ Agya no na ɔsomaa me. 37  Bio nso, Agya a ɔsomaa me no ara adi me ho adanse.+ Mo de, montee ne nne da na munhuu ne nipaban nso;+ 38  na n’asɛm nni mo mu, efisɛ nea ɔsomaa no no ankasa mpo, munnye no nni. 39  “Mohwehwɛ Kyerɛwnsɛm no mu,+ efisɛ mususuw sɛ ɛno na ɛbɛma moanya nkwa; na ɛno ara nso na edi me ho adanse.+ 40  Nanso, mompɛ sɛ moba me nkyɛn benya nkwa.+ 41  Minnye anuonyam mfi nnipa hɔ,+ 42  na minim yiye sɛ munni Onyankopɔn dɔ wɔ mo mu.+ 43  M’Agya din mu na mebae,+ nanso munnye me; sɛ obi foforo ba ɔno ankasa din mu a, ɔno de, mubegye no. 44  Mobɛyɛ dɛn na moagye adi bere a mugye anuonyam+ fi mo ho mo ho nkyɛn na munnye anuonyam a efi Onyankopɔn koro no nkyɛn no?+ 45  Munnsusuw sɛ mɛbɔ mo sobo akyerɛ Agya no; obiako pɛ na ɔbɔ mo sobo, Mose,+ nea mode mo ani ato no so no. 46  Nokwarem, sɛ mugye Mose di a, anka mubegye me adi, efisɛ ɔkyerɛw me ho asɛm.+ 47  Na sɛ munnye nsɛm a ɔkyerɛwee no nni a,+ ɛbɛyɛ dɛn na mubegye me nsɛm adi?”

Ase Hɔ Nsɛm