Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Yohane 20:1-31

20  Nnawɔtwe no da a edi kan no,+ Maria Magdalene kɔɔ ɔda no so ntɛm bere a esum da so wom, na ohui sɛ wɔayi ɔbo no afi ɔda no ano dedaw.+  Ɛnna ɔde mmirika kɔɔ Simon Petro ne osuani foforo+ a Awurade pɛ n’asɛm no nkyɛn kɔka kyerɛɛ wɔn sɛ: “Wɔayi Awurade afi ɔda no mu,+ na yennim baabi a wɔde no akɔto.”  Afei Petro+ ne osuani foforo no fii adi de wɔn ani kyerɛɛ ɔda no so.  Wɔn baanu no soo mmirika mu; nanso osuani biako no de mmirika a emu yɛ den dii Petro anim, na oduu ɔda no ho kan.  Na ɔbɔɔ ne mu ase hwɛɛ mu no, ohuu nwera no sɛ egu hɔ,+ nanso wankɔ mu.  Simon Petro nso dii n’akyi bae, na ɔkɔɔ ɔda no mu. Na ohuu nwera no sɛ egu hɔ,+  ne afei ntama a wɔde bɔɔ ne ti no sɛ wɔabobɔw agu nkyɛn baabi a ɛnka nwera no ho.  Afei osuani a oduu ɔda no ho kan no nso kɔɔ mu, na ohui na ogye dii.  Saa bere no na wɔntee kyerɛwsɛm no ase sɛ etwa sɛ onyan fi awufo mu.+ 10  Enti asuafo no san kɔɔ wɔn afie mu. 11  Maria de, na ɔda so ara gyina ɔda no nkyɛn baabi a ɔresu. Afei bere a ɔresu no, ɔbɔɔ ne mu ase hwɛɛ ɔda no mu, 12  na ohuu abɔfo+ baanu a wɔhyehyɛ ntade fitaa sɛ obiako te baabi a na Yesu amu no da no atifi na obiako nso te anafo. 13  Ɛnna wɔka kyerɛɛ no sɛ: “Ɔbea, adɛn na woresu?” Ɔka kyerɛɛ wɔn sɛ: “Wɔafa me Wura kɔ, na minnim baabi a wɔde no akɔto.” 14  Ɔkaa saa no, ɔdan ne ho hwɛɛ n’akyi, na ohui sɛ Yesu gyina hɔ, nanso na onnim sɛ ɛyɛ Yesu.+ 15  Yesu ka kyerɛɛ no sɛ: “Ɔbea, adɛn na woresu? Hena na worehwehwɛ no?”+ Ɔno de, na osusuw sɛ ɛyɛ turom hɔ hwɛfo, enti ɔka kyerɛɛ no sɛ: “Owura, sɛ wo na woafa no afi ha a, kyerɛ me baabi a wode no akɔto na menkɔfa no nkɔ.” 16  Yesu ka kyerɛɛ no sɛ: “Maria!”+ Na ɔdan ne ho ka kyerɛɛ no Hebri mu sɛ: “Rabuni!” + (a ase ne “Ɔkyerɛkyerɛfo!”) 17  Yesu ka kyerɛɛ no sɛ: “Gyaa me mu, na minnya nkɔɔ Agya no hɔ. Mmom si kwan so kɔ me nuanom+ nkyɛn kɔka kyerɛ wɔn sɛ, ‘Merekɔ m’Agya+ ne mo Agya ne me Nyankopɔn+ ne mo Nyankopɔn no+ nkyɛn.’” 18  Maria Magdalene bɛkaa nea asi kyerɛɛ asuafo no sɛ: “Mahu Awurade!” na ɔka kyerɛɛ wɔn sɛ waka eyinom nyinaa akyerɛ no.+ 19  Afei eduu saa da no anwummere, a ɛyɛ nnawɔtwe no da a edi kan no,+ ɛwom sɛ na Yudafo no ho suro+ nti wɔatoto apon mu wɔ baabi a na asuafo no wɔ de, nanso Yesu bae+ begyinaa wɔn mfinimfini ka kyerɛɛ wɔn sɛ: “Asomdwoe nka mo.”+ 20  Na ɔkaa saa no, ɔde ne nsam ne ne mfem kyerɛɛ wɔn.+ Afei asuafo no dii ahurusi+ sɛ wɔahu Awurade. 21  Ɛnna Yesu san ka kyerɛɛ wɔn sɛ: “Asomdwoe nka mo. Sɛnea Agya no asoma me no,+ me nso meresoma mo.”+ 22  Ɔkaa saa no, ohuw mframa guu wɔn so ka kyerɛɛ wɔn sɛ: “Munnye honhom kronkron.+ 23  Obiara a mode ne bɔne befiri no no,+ wɔde befiri no; obiara a mobɛma ne de atena hɔ no, wɔbɛma atena hɔ.”+ 24  Nanso bere a Yesu bae no, na Toma,+ dumien no mu biako a wɔfrɛ no Ata no, nka wɔn ho. 25  Enti asuafo nkae no ka kyerɛɛ no sɛ: “Yɛahu Awurade!” Nanso ɔka kyerɛɛ wɔn sɛ: “Sɛ manhu nnadewa no ananmu wɔ ne nsam, na mamfa me nsateaa anka nnadewa no ananmu na mamfa me nsa anka ne mfem a,+ merennye nni da.”+ 26  Ne nnawɔtwe akyi no, na asuafo no wɔ ɔdan mu bio, na na Toma ka wɔn ho. Ɛwom sɛ na wɔatoto apon no mu de, nanso Yesu baa mu begyinaa wɔn mfinimfini kae sɛ: “Asomdwoe nka mo.”+ 27  Afei ɔka kyerɛɛ Toma sɛ: “Fa wo nsateaa ka ha, na hwɛ me nsam na fa wo nsa+ ka me mfem, na gyae akyinnyegye na gye di.” 28  Toma bua see no sɛ: “M’Awurade ne me Nyankopɔn!”+ 29  Yesu ka kyerɛɛ no sɛ: “Woahu me nti na afei woagye adi? Anigye ne wɔn a wonhu nanso wogye di.”+ 30  Nokwasɛm ni, Yesu yɛɛ nsɛnkyerɛnne foforo bebree wɔ asuafo no anim a wɔankyerɛw wɔ nhoma yi mu.+ 31  Nanso wɔakyerɛw eyinom ato hɔ+ na moagye adi sɛ Yesu ne Kristo, Onyankopɔn Ba no, na esiane sɛ mugye di+ nti monam ne din so anya nkwa.

Ase Hɔ Nsɛm