Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Yohane 15:1-27

15  “Mene nokware bobe no,+ na m’Agya ne okuafo no.+  Baa biara a ɛwɔ me ho a ɛnsow aba no, oyi fi hɔ,+ na ebiara a ɛsow aba no, oyiyi ho+ na atumi asow aba pii.+  Esiane asɛm a maka akyerɛ mo nti, mo ho atew dedaw.+  Montena me mu, na me nso mentena mo mu.+ Sɛnea baa no ankasa ntumi nsow aba gye sɛ ɛtena bobe no mu no, saa ara na mo nso muntumi nsow aba gye sɛ motena me mu.+  Mene bobe no, mone baa no. Nea ɔtena me mu na me nso metena ne mu no, ɔsow aba pii;+ efisɛ minni hɔ a, muntumi nyɛ hwee.  Sɛ obi antena me mu a, wotwa no kyene sɛ baa na ewu; na nnipa boaboa mmaa no ano kogu ogya mu ma ɛhyew.+  Sɛ motena me mu na me nsɛm tena mo mu a, mummisa biribiara a mopɛ na ɛbɛyɛ hɔ ama mo.+  Nea ɛhyɛ m’Agya anuonyam ne sɛ mobɛkɔ so asow aba pii na moada mo ho adi sɛ m’asuafo.+  Sɛnea Agya no dɔ me+ na me nso medɔ mo no, montena me dɔ mu. 10  Sɛ mudi m’ahyɛde+ so a, mobɛtena me dɔ mu sɛnea madi Agya no ahyɛde so+ na mete ne dɔ mu no. 11  “Maka eyi akyerɛ mo na m’anigye atena mo mu, na mo anigye ayɛ mã.+ 12  M’ahyɛde ne sɛ monnodɔ mo ho sɛnea medɔ mo no.+ 13  Obiara nni ɔdɔ a ɛsen eyi, sɛ obi de ne kra bɛto hɔ ama ne nnamfo.+ 14  Sɛ moyɛ nea merehyɛ mo no a, na moyɛ me nnamfo.+ 15  Seesei memfrɛ mo nkoa bio, efisɛ akoa nnim nea ne wura yɛ. Na mmom mafrɛ mo nnamfo,+ efisɛ nea mate afi m’Agya hɔ nyinaa mama moahu.+ 16  Ɛnyɛ mo na mopaw me, na mmom me na mepaw mo, na mayi mo sɛ monkɔ nkɔsow aba+ na mo aba no ntena hɔ; ɛno na sɛ mubisa Agya no hɔ biribiara me din mu a, ɔde bɛma mo.+ 17  “Eyinom na mehyɛ mo na ama moadodɔ mo ho.+ 18  Sɛ wiase tan mo a, munim sɛ atan me ansa na ɛretan mo.+ 19  Sɛ moyɛ wiase no fã a, anka wiase bɛpɛ nea ɛyɛ ne de no asɛm.+ Nanso esiane sɛ monyɛ wiase no fã,+ na mmom mapaw mo afi wiase nti, wiase no tan mo.+ 20  Monkae asɛm a meka kyerɛɛ mo no, akoa nsen ne wura. Sɛ wɔataa me a, wɔbɛtaa mo nso;+ sɛ wɔadi m’ahyɛde so a, mo nso wobedi mo de so. 21  Nanso me din nti na wɔbɛyɛ eyinom nyinaa atia mo, efisɛ wonnim nea ɔsomaa me no.+ 22  Sɛ mamma ammɛkasa ankyerɛ wɔn a, anka wonni bɔne;+ nanso seesei de, wonni wɔn bɔne ho anoyi biara.+ 23  Nea ɔtan me no tan m’Agya nso.+ 24  Sɛ manyɛ nnwuma a obiara nyɛɛ bi da wɔ wɔn mu a,+ anka wonni bɔne;+ nanso seesei wɔahu na wɔatan me ne m’Agya nyinaa.+ 25  Nanso ɛno na ɛbɛma asɛm a wɔakyerɛw wɔ wɔn Mmara no mu no aba mu sɛ, ‘Wɔtan me kwa.’+ 26  Sɛ ɔboafo a mɛsoma no afi Agya no nkyɛn,+ nokware no honhom a efi Agya no hɔ no, nya ba a, ɔno na obedi me ho adanse;+ 27  na ɛsɛ sɛ mo nso mudi adanse,+ efisɛ mo ne me atena fi bere a mifii ase.

Ase Hɔ Nsɛm