Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Yesaia 37:1-38

37  Bere a Ɔhene Hesekia tee asɛm no ara na osuan n’atade mu na ofuraa atweaatam+ kɔɔ Yehowa fie.+  Afei ɔsomaa Eliakim+ a ɔyɛ ofiepanyin, ne Sebna a ɔyɛ ɔkyerɛwfo,+ ne asɔfo+ mpanyimfo kɔɔ Amus ba odiyifo Yesaia nkyɛn;+ ná wofurafura ntweaatam.  Na wɔka kyerɛɛ no sɛ: “Nea Hesekia aka ni, ‘Ɛnnɛ yɛ ahohia+ ne animka ne nsopa+ da, efisɛ mma abedu awotwaa ano, nanso ahoɔden nni hɔ a wɔde bɛwo wɔn.+  Ebia Yehowa, wo Nyankopɔn bɛte Rabsake nsɛm no;+ ɔno na ne wura+ Asiria hene asoma no sɛ ɔmmɛsopa+ Onyankopɔn teasefo no. Na nsɛm a Yehowa wo Nyankopɔn ate no nti, ɔbɛma wabu ho akontaa.+ Ɛno nti bɔ mpae ma wɔn a wɔaka wɔ ha no.’”+  Enti Ɔhene Hesekia nkoa no kɔɔ Yesaia nkyɛn.+  Na Yesaia ka kyerɛɛ wɔn sɛ: “Monkɔka nkyerɛ mo wura sɛ, ‘Nea Yehowa aka ni:+ “Mma nsɛm a Asiria hene nkoa+ aka atia me a wotee no mmmɔ wo hu.+  Mede honhom+ bi bɛhyɛ ne mu, na ɔbɛte amanneɛbɔ+ bi na wasan akɔ n’asase so, na mɛma watɔ nkrante ano wɔ n’ankasa asase so.”’”+  Afei Rabsake+ san n’akyi kɔe, na ɔkɔtoe sɛ Asiria hene ne Libna+ reko. Saa bere no na wate sɛ wafi Lakis.+  Ná ɔhene no ate sɛ Etiopia hene Tirhaka+ aba sɛ ɔne no rebɛko. Ɔtee saa no, ntɛm ara na otuu abɔfo+ kɔɔ Hesekia nkyɛn sɛ: 10  “Monkɔka nkyerɛ Yuda hene Hesekia sɛ, ‘Mma wo Nyankopɔn a wode wo ho ato no so no nnnaadaa wo+ sɛ: “Wɔremfa Yerusalem nhyɛ Asiria hene nsa.”+ 11  W’ankasa woate nea Asiria ahene de yɛɛ nsase no nyinaa, sɛnea wɔsɛee wɔn pasaa no;+ wo na wubenya wo ti adidi mu anaa?+ 12  Aman a m’agyanom sɛee wɔn no anyame+ tumi gyee wɔn anaa?+ Wotumi gyee Gosan+ ne Haran+ ne Resef ne Eden+ mma a na wɔwɔ Tel-Asar no? 13  Ɛhe na Hamat+ hene ne Arpad+ hene ne Sefarwayim+ ne Hena ne Iwa+ nkurow so ahene no wɔ?’” 14  Ɛnna Hesekia gyee krataa no fii abɔfo no nsam kenkanee,+ na Hesekia kɔɔ Yehowa fie kɔtrɛw mu wɔ Yehowa anim.+ 15  Na Hesekia bɔɔ Yehowa mpae+ sɛ: 16  “O asafo Yehowa, Israel Nyankopɔn+ a wote kerubim so, wo nko ara ne nokware Nyankopɔn, asase so ahenni nyinaa so.+ Wo na woyɛɛ ɔsoro ne asase.+ 17  O Yehowa, yɛ aso na tie.+ Yehowa, bue w’aniwa+ na hwɛ, na tie nsɛm a Senaherib+ asoma sɛ wɔmfa mmetwa Onyankopɔn teasefo no mpoa.+ 18  Yehowa, ɛyɛ nokware sɛ Asiria ahene asɛe nsase nyinaa ne wɔn ankasa asase.+ 19  Na wɔtow wɔn anyame guu ogya mu,+ efisɛ wɔnyɛ anyame,+ na mmom nnipa nsa ano adwuma,+ nnua ne abo, enti wɔsɛee wɔn.+ 20  Enti afei, O Yehowa, yɛn Nyankopɔn,+ yɛsrɛ wo, gye yɛn fi ne nsam+ na asase so ahenni nyinaa nhu sɛ wo, Yehowa, wo nkutoo ne Onyankopɔn.”+ 21  Na Amus ba Yesaia soma kɔka kyerɛɛ Hesekia sɛ: “Nea Israel Nyankopɔn Yehowa aka ni, ‘Asiria hene Senaherib ho mpae a wobɔɔ me no nti,+ 22  Yehowa asɛm a waka atia no ni:“Sion babea, ɔbaabun no, abu wo animtiaa, na wo ho yɛ no serew.+Yerusalem babea no awosow ne ti wɔ w’akyi.+ 23  Hena na woatwa no mpoa+ akasa atia no yi?+Hena na woama wo nne so wɔ no so+Na wohããhãã w’ani kyerɛ no yi?+Ɛyɛ Israel Kronkronni no!+ 24  Wonam wo nkoa so atwa Yehowa mpoa aka sɛ,+‘Mede me nteaseɛnam bebree no bɛkɔ,+Mede bɛforo akɔ mmepɔw atifi,+Na makɔ Lebanon akyirikyiri nohoa;+Metwitwa ne nkyeneduru atenten no ne n’apopaw nnua fɛfɛ+ no agu.Mɛforo akɔ ɔsoro nohoa, ne kwae turom.+ 25  Me na metutu fam na manom nsu,Na mede me nan bɛyow Egypt Nil+ nsuka nyinaa.’+ 26  Wontee anaa?+ Mebɔɔ me tirim sɛ mɛyɛ akyɛ.+Efi tete na mehyɛ too hɔ.+ Afei mɛma aba mu.+Na wobɛma nkurow a ɛyɛ den adan amamfõ a wɔayɛ no pasaa.+ 27  Na emu nnipa nsam behodwow;+Ehu bɛka wɔn na wɔn anim agu ase.+Wɔbɛyɛ sɛ asase so wura ne sare momono,+Wɔbɛyɛ sɛ ɔdan so sare+ ne afuw mu wura a apuei mframa abɔ no.+ 28  Sɛnea wote hɔ dwoodwoo ne wo nkɔree+ ne wo mmae nyinaa, minim,+Na minim sɛnea w’ani abere me so.+ 29  W’ani abere me so+ na wo mmobom abedu m’asom.+Enti me nso mede me darewa bewura wo hwene mu na mede me nnareka ato w’ano,+Na ɔkwan a wofaa so baa ha no, ɛno ara so na mɛma woafa akɔ.”+ 30  “‘Eyi bɛyɛ sɛnkyerɛnne ama wo: Afe yi, mubedi ntwakae a afifi;+ afe a ɛto so abien no, mubedi aba a ɛno ara afifi; nanso afe a ɛto so abiɛsa no de, mungu aba na muntwa, na monyɛ bobe nturo na munni mu aba.+ 31  Na Yuda fiefo a wɔafi mu aka+ no begye ntini akɔ fam, na wobenyin akɔ soro na wɔasow aba.+ 32  Na nkaefo bi befi Yerusalem aba,+ na wɔn a wɔanya wɔn ti adidi mu no befi Bepɔw Sion so aba.+ Asafo Yehowa nnamyɛ na ɛbɛyɛ eyi.+ 33  “‘Enti nea Yehowa aka afa Asiria hene ho ni:+ “Ɔremma kurow yi mu,+ na ɔrentow agyan mma ha; ɔremfa ɔkyɛm mma ha, na ɔrensi akoban wɔ ho.”’+ 34  “Yehowa aka sɛ: ‘Ɔkwan a ɔfaa so bae no ara so na ɔbɛfa akɔ, na ɔremma kurow yi mu.+ 35  Na ɔko na mɛko agye+ kurow yi, me+ ne m’akoa Dawid nti.’”+ 36  Afei Yehowa bɔfo+ fi kokunkum Asiriafo nsraban no mu+ nnipa mpem ɔha aduɔwɔtwe anum. Bere a nkurɔfo sɔree anɔpatutuutu no, wɔnkɔhwɛ a, wɔn nyinaa afunu sam hɔ.+ 37  Enti Asiria hene Senaherib+ san n’akyi+ kɔe, na ɔkɔtenaa Niniwe.+ 38  Ɛbae sɛ bere a ɔkɔɔ ne nyame+ Nisrok+ fie kɔkotowee no, n’ankasa mma Adramelek ne Sareser de nkrante kum no,+ na woguan kɔɔ Ararat+ asase so. Na ne ba Esar-Haddon+ bedii n’ade.

Ase Hɔ Nsɛm