Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Yesaia 30:1-33

30  Yehowa asɛm ni: “Mma atuatewfo,+ munnue. Agyinatusɛm a wodi akyi no mfi me,+ na nsã a wogu yɛ apam no, me honhom nni akyi; wɔde bɔne ka bɔne ho.+  Wɔkɔ Egypt+ na wommisa m’anom asɛm.+ Wɔkɔ sɛ wɔrekɔhyɛ Farao abannennen ase, na wɔakohintaw Egypt nwini ase!+  Nanso Farao abannennen bɛdan mo aniwu+ na Egypt nwini ase ahintawee adan mo animguase.+  Ne mpanyimfo aba Soan,+ na n’abɔfo adu Hane.  Obiara ani bewu efisɛ ɔman no ho remma wɔn mfaso. Wɔrentumi mmoa wɔn na wɔrennya wɔn so mfaso biara, na mmom aniwu ne animguase nko na wɔde begyaw wɔn.”+  Anafo fam mmoa ho atemmusɛm ni:+ Wɔfa ahoguan ne ahohia asase so,+ baabi a gyata ne ɔsebɔ a ɔrepa so wɔ, nea ahurutoa ne ɔwɔ a n’ano yɛ ogya a otu wɔ no.+ Wɔde wɔn agyapade gu afurum mmati so, na wɔde wɔn nneɛma gu yoma akyi apɔwapɔw so.+ Nanso nnipa no rennya ɛso mfaso biara.  Egyptfo yɛ ahuhude kɛkɛ, na wɔn mmoa so nni mfaso.+ Enti na mafrɛ no: “Rahab+—wosi hɔ dwerii.”  “Afei daakye asɛm nti, bra bɛkyerɛw gu ɔbopon so wɔ wɔn anim na kurukyerɛw wɔ nhoma mu+ na ayɛ daa adanse.+  Wɔyɛ ɔman atuatewfo,+ mma a wonni nokware,+ mma a wɔmpɛ sɛ wotie Yehowa mmara.+ 10  Wɔka kyerɛ adehufo sɛ, ‘Munnhu ade,’ na wɔka kyerɛ adiyifo sɛ, ‘Monnka anisoadehu a ɛteɛ nnkyerɛ yɛn.+ Monka adɔkɔdɔkɔsɛm nkyerɛ yɛn, monka anisoadehu mfa nnaadaa yɛn.+ 11  Mumfi ɔkwan no so, momman mfi ɔtempɔn no so.+ Munyi Israel Kronkronni no mfi yɛn ani so.’”+ 12  Enti nea Israel Kronkronni no nso aka ni: “Esiane sɛ moapo asɛm yi,+ na mode mo ho ato asisisɛm ne nkontomposɛm so na mode ayɛ mo akyidua+ nti, 13  bɔne yi bɛdan mo sɛ ɔfasu a ne fã apae a ɛrebedwiriw agu, te sɛ ɔfasu tenten a akyea+ a ɛrebɛhwe ase mpofirim, prɛko pɛ.+ 14  Na wobebubu no te sɛ ɔnwemfo ahina+ a wɔabɔ no dwerɛbee a ebi nka, na wɔrennya nea abubu no mu sin bi mpo a wɔde beyi ogya afi muka mu anaa wɔde bɛsaw nsu wɔ fam.”+ 15  Nea Awurade Tumfoɔ Yehowa, Israel Kronkronni no,+ aka ni: “Mosan ba bɛhome a, mubenya nkwa. Na motena ase komm de mo ho to me so a, mubenya ahoɔden.”+ Nanso moampene.+ 16  Na mokae sɛ: “Dabi, yɛbɛtena apɔnkɔ so aguan!”+ Ɛno nti mubeguan nso. “Apɔnkɔ a wɔn ho yɛ hare so na yɛbɛtena!”+ Enti wɔn a wotiw mo no ho bɛyɛ hare.+ 17  Onipa biako behunahuna nnipa apem ma wɔn ho apopo;+ na baanum behunahuna mo na moaguan kosi sɛ mobɛka te sɛ frankaa bi a ɛwɔ bepɔw so, ahyɛnsode a esi koko so.+ 18  Enti Yehowa twɛn sɛ ɔbɛboa mo,+ na ɔbɛma ne ho so ahu mo mmɔbɔ.+ Yehowa yɛ atemmu Nyankopɔn.+ Anigye+ ne wɔn a wɔtwɛn no.+ 19  Sɛ ɔman a wɔwɔ Sion+ bɛtena Yerusalem+ a, worensu bio.+ Wunya ma wo nne so su frɛ no a, ɔbɛdom wo; ɔte ara pɛ a obegye wo so.+ 20  Na Yehowa de ahohia bɛyɛ aduan ama wo na ɔde nhyɛso ayɛ nsu ama wo.+ Nanso wo Kyerɛkyerɛfo Kunini no renhintaw bio, na wode w’ani behu wo Kyerɛkyerɛfo Kunini no.+ 21  Na w’aso bɛte asɛm bi wɔ w’akyi sɛ: “Ɔkwan no ni.+ Momfa so.” Sɛ moman fa nifa oo, mofa benkum oo, momfa so.+ 22  Na gu wo dwetɛ+ ahoni nkataho ne wo sika+ ahoni*+ nnuraho ho fĩ. Wobɛtow agu,+ na wobɛka akyerɛ no te sɛ ɔbea a wayɛ bra sɛ: “Ɛyɛ fĩ!”+ 23  Na ɔbɛma osu atɔ agu w’aba a woadua+ so na w’asase so nnɔbae ama wo aduan sɔkyee.+ Na da no, wo mmoa benya asase tɛtrɛɛ adidi so.+ 24  Na anantwi ne mfurum a wɔdɔw asase no bedi afrafraduan pa a wɔde sofi+ ne nkorata ahuw so. 25  Na nsubɔnten ne nsuka bɛba bepɔw tenten ne koko a ɛkorɔn biara so,+ da a wobekunkum nnipa asam hɔ na abantenten bɛhwehwe ase no.+ 26  Na ɔsram hann bɛyɛ te sɛ awia ketee hann, na owia hann bɛyɛ mmɔho ason+ te sɛ nnanson hann, da a Yehowa bɛkyekyere ne man a abubu+ na wasa+ kuru kɛse a onyae bere a ɔhwee no no. 27  Hwɛ, Yehowa din fi akyirikyiri reba, ɛde abufuhyew+ ne omununkum duruduru reba. Atemmu ayɛ n’anom mã, na ne tɛkrɛma te sɛ ogya a ɛhyew ade.+ 28  Ne honhom te sɛ asubɔnten a eyiri du kɔn mu,+ na ɔbɛwosow amanaman no wɔ sɔnee mu,+ na ɔbɛsɔn adehunu, na ɔde nnareka+ bɛhyɛ nkurɔfo no afonom ma wɔawɔ ntwɛtwɛdɛ.+ 29  Mobɛto dwom+ te sɛ anadwo a motew mo ho di afahyɛ+ no, na anigye bɛhyɛ mo koma mã te sɛ obi a ɔde atɛntɛbɛn+ rekɔ Yehowa bepɔw so,+ Israel Botan no nkyɛn.+ 30  Na Yehowa bɛma nnipa ate n’anuonyam nne+ kɛse no na wama wɔahu n’abasa a ɛresian no.+ Ɛbɛba wɔ abufuhyew+ ne ogyaframa+ ne osubran ne ahum+ ne amparuwbo mu.+ 31  Yehowa bɛma ne nne so na Asiria koma atu,+ na ɔde abaa bɛhwe no.+ 32  Na abaa biara a Yehowa de bɛtwe Asiria aso no bɛyɛ sɛ mpintin ne asanku,+ na obehim ne nsa de ɔko aba wɔn so.+ 33  Wɔasiesie ne Tofet*+ ato hɔ dedaw; wɔasiesie ama ɔhene no nso.+ Emu dɔ, na ogya ne nnyina abu so wɔ hɔ. Yehowa ahome sɔ ano gya te sɛ sufre asubɔnten.+

Ase Hɔ Nsɛm

Nea ɛkyerɛ ankasa ne “ahoni a wɔagu.”
Wɔde Tofet di dwuma sɛ kasakoa de gyina hɔ ma baabi a wɔhyew ade, na ɛkyerɛ ɔsɛe. Hwɛ 2Ah 23:10.