Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Yesaia 29:1-24

29  “Ariel+ due! Ariel due! kurow a Dawid tenaa mu.+ Momfa afe nka afe ho; munni mo afahyɛ+ nyinaa nhyia.  Mɛma Ariel ho akyere+ no, na obesu atwa adwo,+ na ɔbɛyɛ m’ani so te sɛ Onyankopɔn afɔremuka.+  Na metwa wo ho nyinaa ahyia, na mɛto wo ho pempe na masi akoban afa wo ho nyinaa.+  Wobɛhwe ase na woakasa afi fam, na mfutuma mu na wo nne befi aba brɛoo.+ Wo nne bɛyɛ sɛ ɔdebisafo nne afi fam, na wo kasa befi mfutuma mu aba te sɛ anomaa su.+  Nnipakuw a wunnim wɔn bɛyɛ sɛ mfutuma,+ na atirimɔdenfo+ dɔm ayɛ sɛ ntɛtɛwa a ɛrehuw akɔ.+ Na ɛbɛba mpofirim, prɛko pɛ.+  Na asafo Yehowa ani bɛba wo so, na ɔde ɔprannaa, asasewosow, mmobom, ahum ne gyampantrudu mframa, ne ogyaframa begye wo.”+  Aman nyinaa mu nnipa ne Ariel+ bɛko, wobesi akoban atwa ne ho ahyia, na wɔbɛma ne ho akyere no.+ Nanso eyinom nyinaa bɛyɛ sɛ dae mu ade, anadwo adehu bi.  Ɛbɛyɛ sɛ obi a ɔkɔm de no a waso dae sɛ ɔredidi, na ɔbɛsɔre no na ɔkɔm da so ara de ne kra.+ Anaa obi a osukɔm de no a waso dae sɛ ɔrenom nsu, nanso ɔbɛsɔre no na ne kra ahodwow na ne mu nsu atwe. Saa ara na ɛbɛto amanaman mu dɔm a wɔatu Bepɔw Sion+ so sa no nyinaa.  Montɛɛ mo anom na mo ho nnwiriw mo;+ monka mo ani mfomfam+ na mo ani mfura.+ Wɔabobow,+ nanso ɛnyɛ nsã ntia; wɔkɔ afã afã, nanso ɛnyɛ mmosã ntia. 10  Yehowa ahwie nnahɔɔ honhom agu mo so;+ wakata mo ani, kyerɛ sɛ mo adiyifo no;+ na wakata mo ti,+ kyerɛ sɛ mo adehufo no.+ 11  Na adehu no nyinaa bɛyɛ mo sɛ nsɛm a wɔasɔw ano wɔ nhoma mu.+ Wɔde ma obi a onim nhoma sɛ: “Kenkan eyi den,” nanso ɔka sɛ: “Merentumi nkenkan efisɛ wɔasɔw ano.”+ 12  Na wɔde nhoma no ma obi a onnim nhoma sɛ: “Kenkan eyi den,” nanso ɔka sɛ: “Minnim nhoma.” 13  Na Yehowa ka sɛ: “Esiane sɛ ɔman yi de wɔn ano na ɛbɛn me, na wɔde wɔn anofafa+ na ɛhyɛ me anuonyam, na wɔn koma atwe afi me ho kɔ akyirikyiri,+ na wogyina ahyɛde a nnipa akyerɛ wɔn+ so na esuro me nti, 14  me nso, me ne ɔman yi bedi anwonwasɛm+ bi bio wɔ anwonwakwan so ama ayɛ wɔn nwonwa; na wɔn anyansafo nyansa bɛsɛe na wɔn mmadwemma ntease ayera.”+ 15  Wɔn a wɔde wɔn tirimbɔ hintaw Yehowa fee,+ na wɔyɛ wɔn nnwuma wɔ sum ase+ no nnue. Wɔka sɛ: “Hena na ohu yɛn, na hena na onim yɛn ho asɛm?”+ 16  Mo a mo adwene akyea! So wobebu ɔnwemfo ne dɔte nyinaa pɛ?+ So ade betumi aka afa ne yɛfo ho sɛ: “Ɛnyɛ ɔno na ɔyɛɛ me”?+ Na anwenne betumi aka ne nwemfo ho asɛm sɛ: “Onnim hwee”?+ 17  So ɛnkaa bere tiaa bi na Lebanon adan turo+ na wɔabu turo no sɛ kwae?+ 18  Saa da no, asotifo bɛte nhoma no mu nsɛm,+ na anifuraefo befi kusuuyɛ ne esum mu ahu ade.+ 19  Na ahobrɛasefo+ bedi ahurusi pii wɔ Yehowa mu, na adesamma mu ahiafo begye wɔn ani wɔ Israel Kronkronni no mu.+ 20  Ɛbɛba saa efisɛ otirimɔdenfo awiei bɛba,+ na nea ɔhoahoa ne ho bewu,+ na wɔn a wɔrepɛ bɔne adi+ nyinaa, wobetwa wɔn agu. 21  Wɔn na wogye onipa ano si bɔne,+ na wosum nea oyi ntɛn wɔ kurow pon ano no afiri,+ na wɔnam akyinnyehunu so bɔ ɔtreneeni gu.+ 22  Eyi nti, nea Yehowa a ogyee Abraham+ no aka akyerɛ Yakob fie ni: “Afei Yakob ani renwu, na n’anim renyɛ bosaa bio;+ 23  na sɛ ohu sɛ ne mma, kyerɛ sɛ me nsa ano adwuma, atwa ne ho ahyia+ a, wɔbɛtew me din ho,+ wɔbɛtew Yakob Kronkronni no din ho,+ na wobesuro Israel Nyankopɔn.+ 24  Wɔn a wɔn adwene akyea no benya ntease, na wɔn a wonwiinwii no benya akwankyerɛ.”+

Ase Hɔ Nsɛm