Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Numeri 32:1-42

32  Afei ɛbae sɛ Ruben asefo+ ne Gad asefo+ benyaa nyɛmmoa bebree. Na wohui sɛ asase a ɛwɔ Yaser+ ne Gilead no bɛyɛ papa ama mmoayɛn.  Enti Gad ne Ruben asefo no bɛka kyerɛɛ Mose ne Eleasar ne asafo no mu mpanyimfo sɛ:  “Yɛahu sɛ Atarot+ ne Dibon+ ne Yaser ne Nimra+ ne Hesbon+ ne Eleale+ ne Sebam ne Nebo+ ne Beon+  a Yehowa adi so nkonim+ wɔ Israel asafo no anim no yɛ asase pa ma mmoayɛn, na wo nkoa nso wɔ mmoa+ bebree.”  Na wɔkae sɛ: “Sɛ wobɛpene so a, yɛsrɛ wo fa asase yi ma wo nkoa, na mma yenntwa Yordan.”+  Afei Mose bisaa Gad ne Ruben asefo no sɛ: “Mopɛ sɛ motena ha bere a mo nuanom rekɔko?+  Adɛn, mopɛ sɛ mutu Israelfo no koma na wɔantwa ankɔ asase a Yehowa de ama wɔn no so?  Saa ara na mo agyanom yɛe+ bere a yɛwɔ Kades-Barnea+ a mesomaa wɔn sɛ wɔnkɔhwɛ asase no.  Bere a wokoduu Eskol+ subon no ho a wohuu asase no, wotuu Israelfo no koma sɛnea ɛbɛyɛ na wɔankɔ asase a Yehowa de ama wɔn no so.+ 10  Saa da no, Yehowa bo fuw denneennen, enti ɔkaa ntam+ sɛ, 11  ‘Mmarima a wofi Egypt bae a wɔadi mfe aduonu ne akyi+ no mu biara nni hɔ a n’ani behu asase a mekaa Abraham ne Isak ne Yakob ntam+ sɛ mede bɛma wɔn no, efisɛ wɔamfa wɔn koma nyinaa anni m’akyi, 12  gye Kenisini Yefune ba Kaleb+ ne Nun ba Yosua,+ efisɛ wɔde wɔn koma nyinaa dii Yehowa akyi.’ 13  Enti Yehowa bo fuw Israel, na ɔma wɔbɔɔ asesa wɔ sare no so mfe aduanan+ kosii sɛ awo ntoatoaso a wɔyɛɛ Yehowa ani so bɔne no nyinaa ase tɔree.+ 14  Na hwɛ, mo nso moyɛ abɔnefo asefo a moabedi mo agyanom ade sɛ mubehuru Yehowa bo+ ma n’ani abere Israel so kɛse mpo. 15  Sɛ modan mo akyi kyerɛ no+ a, ɔno nso bɛsan ama nnipa no aka sare no so bio,+ na ɛba saa a, na moadi ɔman no nyinaa aboro.”+ 16  Akyiri yi wɔsan baa ne nkyɛn bɛkae sɛ: “Ma yɛmfa abo nsi buw mma yɛn mmoa wɔ ha, na yɛnkyekye nkurow mma yɛn mma nkumaa. 17  Yɛn de, yɛbɛma yɛn akode so+ adi Israelfo anim kosi sɛ yɛde wɔn bedu wɔn tenabea, na yebegyaw yɛn mma ma wɔatena nkurow a ɛyɛ den mu na asase no sofo anhu wɔn. 18  Yɛrensan nkɔ yɛn afie mu kosi sɛ Israelni biara benya asase a ɛbɛyɛ n’agyapade.+ 19  Na agyapade a wobenya wɔ Yordan atɔe ne akyi no, yɛnka ho, efisɛ yɛn agyapade wɔ Yordan apuei.”+ 20  Afei Mose ka kyerɛɛ wɔn sɛ: “Sɛ mobɛyɛ eyi na moasiesie mo ho akɔko wɔ Yehowa anim+ 21  na obiara de n’akode atwa akɔ Yordan agya wɔ Yehowa anim kosi sɛ ɔbɛpam n’atamfo nyinaa afi n’ani so+ 22  na wɔabrɛ asase no ase wɔ Yehowa anim+ ansa na moasan akɔ+ a, ɛnde na mo ho sɔnn wɔ Yehowa ne Israel anim, na asase yi bɛyɛ mo agyapade wɔ Yehowa anim.+ 23  Nanso sɛ moanyɛ saa a, ɛnde na moayɛ bɔne atia Yehowa.+ Na munhu sɛ mo bɔne bɛbɔ mo ti so.+ 24  Monkyekye nkurow mma mo mma nkumaa na momfa abo nyɛ buw mma mo mmoa, na monyɛ nea afi mo anom aba no.”+ 25  Afei Gad ne Ruben asefo no ka kyerɛɛ Mose sɛ: “Wo nkoa bɛyɛ sɛnea yɛn wura ahyɛ no.+ 26  Yɛn mma ne yɛn yerenom ne yɛn nguan ne yɛn nyɛmmoa nyinaa bɛtena Gilead nkurow mu.+ 27  Na wo nkoa nyinaa besiesie wɔn ho akɔko+ wɔ Yehowa anim, sɛnea yɛn wura aka no.” 28  Enti Mose kaa wɔn ho asɛm kyerɛɛ ɔsɔfo Eleasar ne Nun ba Yosua ne mpanyimfo a wɔdeda Israel mmusua ano no. 29  Mose ka kyerɛɛ wɔn sɛ: “Sɛ Gad asefo ne Ruben asefo ne mo twa Yordan kɔko+ wɔ Yehowa anim na mutumi di asase no so a, ɛnde momfa Gilead mma wɔn sɛ wɔn agyapade.+ 30  Nanso sɛ wɔne mo ankɔko a, ɛnde wɔntena mo mu wɔ Kanaan asase so.”+ 31  Na Gad ne Ruben asefo no nso kae sɛ: “Nea Yehowa aka akyerɛ wo nkoa no, saa ara na yɛbɛyɛ.+ 32  Yebesiesie yɛn ho akɔ Kanaan asase so+ wɔ Yehowa anim na Yordan agya ha abɛyɛ yɛn agyapade.”+ 33  Afei Mose de Amorifo hene Sihon+ ahemman ne Basan hene Og+ ahemman, kyerɛ sɛ nsase ne nkurow a atwa ahyia nyinaa, maa Gad asefo+ ne Ruben asefo+ ne Yosef ba Manase abusuakuw no fã.+ 34  Gad asefo kyekyee Dibon,+ Atarot,+ Aroer,+ 35  ne Atrot-Sofan, Yaser,+ Yogbeha,+ 36  ne Bet-Nimra+ ne Bet-Haran,+ na wosisii aban+ wɔ ho. Afei wɔde abo yɛɛ buw maa wɔn mmoa.+ 37  Ruben asefo nso kyekyee Hesbon,+ Eleale,+ Kiriataim,+ 38  ne Nebo+ ne Baal-Meon+ a akyiri yi edin no sesae no, ne Sibma. Afei wɔde din foforo maa nkurow a wɔkyekyee no. 39  Afei Manase ba Makir+ asefo kɔko faa Gilead, na wɔpam Amorifo a na wɔwɔ hɔ no. 40  Enti Mose de Gilead maa Manase ba Makir, na ɔtenaa hɔ.+ 41  Manase ba Yair nso kɔfaa nkuraa-nkuraa a ɛwowɔ hɔ no, na ɔtoo hɔ din Hawot-Yair.+ 42  Na Noba kɔfaa Kenat+ ne ɛho nkurow nyinaa, na ɔde n’ankasa din Noba frɛɛ hɔ.

Ase Hɔ Nsɛm