Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Mateo 8:1-34

8  Bere a osian fii bepɔw no so no nnipakuw kɛse dii n’akyi.  Na hwɛ! ɔkwatani+ bi bɛkotow no kae sɛ: “Awurade, sɛ wopɛ nko ara a, wubetumi ama me ho afi.”  Enti, ɔteɛɛ ne nsa kaa no kae sɛ: “Mepɛ. Wo ho mfi.”+ Na amonom hɔ ara ne kwata no kɔe.+  Afei Yesu ka kyerɛɛ no sɛ: “Hwɛ na woanka ankyerɛ obiara,+ na mmom kɔ na fa wo ho kɔkyerɛ ɔsɔfo no,+ na fa ayɛyɛde+ a Mose hyɛ too hɔ no ma, na ayɛ adanse ama wɔn.”  Bere a ɔkɔɔ Kapernaum+ no, ɔsraani panyin bi baa ne nkyɛn bɛpaa no kyɛw  sɛ: “Owura, m’akoa yare mmubui da fie a ɔrehu amane kɛse.”  Ɔka kyerɛɛ no sɛ: “Sɛ midu hɔ a mɛsa no yare.”  Ɔsraani panyin no bua see no sɛ: “Owura, memfata sɛ woba me fie, na wo de ka biribi, na m’akoa no ho bɛtɔ no.  Efisɛ me nso mehyɛ obi ase, na mewɔ asraafo nso hyɛ m’ase, na meka kyerɛ wɔn mu bi sɛ, ‘Kɔ ha!’+ na ɔkɔ, na meka kyerɛ ɔfoforo sɛ ‘Bra!’ na waba, ne m’akoa sɛ ‘Yɛ eyi!’ na wayɛ.” 10  Yesu tee saa no, ne ho dwiriw no na ɔka kyerɛɛ wɔn a wodi n’akyi no sɛ: “Meka mo nokware sɛ, obiara nni Israel a mahu gyidi a ɛsõ saa wɔ ne mu.+ 11  Nanso mise mo sɛ nnipa bebree fi apuei fam ne atɔe+ fam bɛba na wɔne Abraham ne Isak ne Yakob abɛtena adidii wɔ ɔsoro+ ahenni+ no mu, 12  na ahenni mma+ no de, wɔbɛtow wɔn agu abɔnten wɔ sum mu. Ɛhɔ na wobesu atwɛre wɔn sẽ.”+ 13  Afei Yesu ka kyerɛɛ ɔsraani panyin no sɛ: “Kɔ. Sɛnea wo gyidi te no, ɛmmra mu saa ara mma wo.”+ Na akoa no ho tɔɔ no dɔn no ara mu. 14  Na bere a Yesu baa Petro fie no, ohui sɛ n’asebea+ da hɔ a ɔyare atiridii.+ 15  Enti osoo ne nsa,+ na atiridii no gyaee no, na ɔsɔre fii ase som no.+ 16  Na eduu anwummere no, nkurɔfo de nnipa bebree a wɔwɔ adaemone brɛɛ no, na ɔkaa asɛm de tuu ahonhom no, na ɔsaa wɔn a wɔyare nyinaa yare, 17  na nea wɔnam odiyifo Yesaia so kae no baa mu sɛ: “Ɔno na ɔfaa yɛn nyarewa na ɔsoaa yɛn ahoɔmmerɛw.”+ 18  Bere a Yesu huu nnipakuw a atwa ne ho ahyia no, ɔhyɛɛ asuafo no sɛ wontwa nkɔ asuogya.+ 19  Na ɔkyerɛwfo bi bɛka kyerɛɛ no sɛ: “Ɔkyerɛkyerɛfo, medi w’akyi akɔ baabiara a wobɛkɔ.”+ 20  Nanso Yesu ka kyerɛɛ no sɛ: “Sakraman wɔ abɔn na ewim nnomaa wɔ mmerebuw, nanso onipa Ba no nni baabi a ɔde ne ti bɛto.”+ 21  Afei osuani foforo ka kyerɛɛ no sɛ: “Awurade, ma me kwan ma minkosie me papa ansa.” 22  Yesu ka kyerɛɛ no sɛ: “Kɔ so di m’akyi, na ma awufo nsie wɔn awufo.”+ 23  Na bere a ɔforoo ɔkorow no,+ n’asuafo no dii n’akyi. 24  Afei, hwɛ! ahum kɛse bi tui po no so, ma enti na asorɔkye no rekata ɔkorow no so; nanso ɔno de, na wada.+ 25  Na wokonyan+ no kae sɛ: “Awurade, gye yɛn na yɛrebewuwu!” 26  Nanso ɔka kyerɛɛ wɔn sɛ: “Dɛn nti na ehu aka mo, mo a mo gyidi sua?”+ Afei ɔsɔre teɛteɛɛ mframa ne po no, na ɛyɛɛ dinn.+ 27  Enti mmarima no ho dwiriw wɔn na wɔkae sɛ: “Onipa bɛn+ na mframa ne po mpo tie no yi?” 28  Bere a oduu asuogya, wɔ Gadarafo*+ asase so no, mmarima baanu a wɔwɔ adaemone+ fi asiei behyiaa no, na na wɔn ani so yɛ krakra ara ma obiara nni akokoduru a ɔde betwam afa saa kwan no so. 29  Na hwɛ! wɔteɛteɛɛm kae sɛ: “Dɛn na yɛne wo wɔ yɛ, Onyankopɔn Ba?+ So wobaa ha sɛ worebɛhaw yɛn+ ansa na bere a wɔahyɛ no adu?”+ 30  Ná mprako bebree bi wɔ akyirikyiri redidi. 31  Enti adaemone no fii ase paa no kyɛw sɛ: “Sɛ wutu yɛn a, ma yɛnkɔ mprako+ yi mu.” 32  Enti ɔka kyerɛɛ wɔn sɛ: “Monkɔ!” Wofii adi kɔɔ mprako no mu, na hwɛ! mprako no nyinaa bɔɔ kirididi fii bepɔw no so koguu po no mu wuwui wɔ nsu no mu.+ 33  Na mmoahwɛfo no guanee, na wɔkɔɔ kurow no mu kɔbɔɔ biribiara ho amanneɛ, a mmarima a wɔwɔ adaemone no ho asɛm ka ho. 34  Na hwɛ! kurow no mufo nyinaa fii adi sɛ wɔrekohyia Yesu; wohuu no no, wɔsrɛɛ no denneennen sɛ omfi wɔn mantam no mu nkɔ.+

Ase Hɔ Nsɛm

Eyi ne “Gerasafo” a ɛwɔ Mr 5:1; Lu 8:26 no.