Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Mateo 2:1-23

2  Bere a wɔwoo Yesu wɔ Betlehem+ a ɛwɔ Yudea, Ɔhene Herode+ nna no mu no, hwɛ! nsoromma mu ahwɛfo+ fi apuei fam baa Yerusalem,  na wɔkae sɛ: “Ɛhe na nea wɔawo no sɛ Yudafo hene+ no wɔ? Yɛwɔ apuei fam na yehuu ne nsoromma,+ enti yɛaba sɛ yɛrebɛkotow no.”  Bere a Ɔhene Herode tee eyi no, ne bo tui, ɔne Yerusalemfo nyinaa,  na ɔfrɛfrɛɛ ɔman no mu asɔfo mpanyin ne akyerɛwfo nyinaa boaa ano bisaa wɔn faako a wɔbɛwo Kristo no.  Wɔka kyerɛɛ no sɛ: “Betlehem+ a ɛwɔ Yudea no; eyi ne nea wɔnam odiyifo no so akyerɛw,  ‘Na wo, Betlehem+ a wowɔ Yuda asase so, wonyɛ Yuda atitiriw mu akumaa; wo mu na otitiriw+ a ɔbɛyɛn+ me man Israel befi aba.’”  Ɛnna Herode frɛɛ nsoromma mu ahwɛfo no kokoam tɔɔ ne bo ase bisaa wɔn bere a nsoromma no puei,  na ɔsomaa wɔn kɔɔ Betlehem, na ɔka kyerɛɛ wɔn sɛ: “Monkɔ na montɔ mo bo ase nhwehwɛ abofra kumaa no, na sɛ muhu no a mommɛbɔ me amanneɛ, na me nso makɔ akɔkotow no.”+  Bere a wotiee ɔhene no asɛm wiei no, wosiim kɔe, na hwɛ! nsoromma a wohui bere a na wɔwɔ apuei+ fam no dii wɔn anim kosii sɛ ekogyinaa faako a abofra kumaa no wɔ no atifi. 10  Bere a wohuu nsoromma no, wɔn ani gyei yiye. 11  Na bere a wɔkɔɔ fie no mu no, wohuu abofra kumaa no ne ne maame Maria, na wɔhwee fam kotow no. Afei nso, wobuebuee wɔn ademude so kyɛɛ no nneɛma, sika ne ɛhyɛ ne kurobow. 12  Nanso, na Onyankopɔn abɔ wɔn kɔkɔ+ wɔ ɔdae mu sɛ wɔnnsan nnkɔ Herode nkyɛn, enti wofii hɔ kɔfaa ɔkwan foforo so kɔɔ wɔn kurom. 13  Wofii hɔ kɔe no, hwɛ! Yehowa bɔfo+ yii ne ho adi kyerɛɛ Yosef wɔ ɔdae mu, na ɔkae sɛ: “Sɔre, fa abofra kumaa no ne ne maame guan kɔ Egypt, na tena hɔ kosi sɛ me ne wo bɛkasa; Herode rebɛhwehwɛ abofra kumaa no akum no.” 14  Enti ɔsɔre faa abofra kumaa no ne ne maame anadwo, na wofii hɔ kɔɔ Egypt, 15  na ɔtenaa hɔ kosii sɛ Herode wui, na ama nea Yehowa nam ne diyifo so kae no aba mu+ sɛ: “Egypt+ na mefrɛɛ me ba fii.” 16  Afei bere a Herode hui sɛ nsoromma mu ahwɛfo no adaadaa no no, ne bo fuwii kɛse, na ɔsoma ma wokokunkum mmarimaa a wɔwɔ Betlehem ne ne mpɔtam hɔ nyinaa, efi wɔn a wɔawo wɔn foforo so kosi wɔn a wɔadi mfe abien so, sɛnea bere a ohu fii nsoromma mu ahwɛfo+ no hɔ kyerɛ no. 17  Afei ɛmaa nea wɔnam odiyifo Yeremia so kae no baa mu sɛ: 18  “Wɔtee nne bi wɔ Rama,+ osu ne benabɔ pii; ɛyɛ Rahel+ na ɔresu ne mma na sɛ wɔkyekye ne werɛ a ontie, efisɛ wonni hɔ bio.” 19  Bere a Herode wui no, hwɛ! Yehowa bɔfo yii ne ho adi wɔ ɔdae+ mu kyerɛɛ Yosef wɔ Egypt 20  na ɔkae sɛ: “Sɔre, fa abofra kumaa no ne ne maame na si mu kɔ Israel asase so, na wɔn a na wɔrehwehwɛ abofra kumaa no kra no awuwu.” 21  Enti ɔsɔre faa abofra kumaa no ne ne maame kɔɔ Israel asase so. 22  Nanso bere a ɔtee sɛ Arkelao asi ne papa Herode ananmu redi Yudea so hene no, osuroe sɛ ɔbɛkɔ hɔ. Afei bere a Onyankopɔn bɔɔ no kɔkɔ wɔ ɔdae+ mu no, ofii hɔ kɔɔ Galilea+ mantam mu, 23  na ɔkɔtenaa kurow bi a wɔfrɛ no Nasaret+ mu, na ama nea wɔnam adiyifo no so kae no aba mu sɛ: “Wɔbɛfrɛ no Nasareni.”+

Ase Hɔ Nsɛm