Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Mateo 18:1-35

18  Dɔn no mu na asuafo no baa Yesu nkyɛn bebisae sɛ: “Hena na ɔyɛ kɛse ankasa wɔ ɔsoro ahenni mu?”+  Enti, ɔfrɛɛ abofra kumaa bi de no gyinaa wɔn mfinimfini+  na ɔkae sɛ: “Nokwarem mise mo sɛ, sɛ moannan anyɛ sɛ mmofra+ nkumaa a, morenhyɛn ɔsoro ahenni mu da.+  Enti obiara a ɔbɛbrɛ ne ho ase+ te sɛ abofra kumaa yi ne nea ɔyɛ kɛse ɔsoro ahenni no mu,+  na obiara a obegye abofra kumaa a ɔte sɛɛ me din mu no, na wagye me nso.+  Nanso obiara a ɔbɛto nkumaa a wogye me di yi mu biako hintidua no, anka eye ma no mmom sɛ wɔde owiyammo+ a afurum twe bɛsɛn ne kɔn mu de no akɔto po mfinimfini.+  “Wiase nnue esiane hintidua nti! Nokwarem no, etwa sɛ hintidua no ba,+ nanso onipa a ɛnam no so a hintidua+ ba no nnue!  Enti sɛ wo nsa anaa wo nan to wo hintidua a, twa fi hɔ tow kyene;+ eye ma wo sɛ wubedi dɛm anaa wobɛtɔ apakye de akɔ nkwa mu sen sɛ wɔbɛtow wo ne wo nsa abien anaa wo nan abien nyinaa ato daa ogya mu.+  Afei nso, sɛ w’ani to wo hintidua a, tu fi hɔ na tow kyene; eye sɛ wode aniwa biako bɛkɔ nkwa mu sen sɛ wowɔ w’aniwa abien na wɔbɛtow wo ato Gehenna gya mu.+ 10  Monhwɛ na moammu nkumaa yi mu biako animtiaa; meka kyerɛ mo sɛ wɔn abɔfo+ a wɔwɔ soro no hu m’Agya a ɔwɔ soro no anim daa.+ 11  —— 12  “Mudwen ho dɛn? Sɛ obi wɔ nguan ɔha na emu biako yera a,+ so ɔrennyaw aduɔkron akron no wɔ bepɔw so nkɔhwehwɛ nea wayera no?+ 13  Na sɛ ohu no a, nokwarem mise mo sɛ odi ne ho ahurusi sen aduɔkron akron a wɔnyerae no.+ 14  Saa ara nso na m’Agya a ɔwɔ soro no ani nnye ho sɛ nkumaa yi mu biako bɛyera.+ 15  “Bio nso, sɛ wo nua yɛ bɔne bi a, kɔda ne mfomso adi kyerɛ no wo ne ɔno nkutoo ntam.+ Sɛ otie wo a, woanya wo nua.+ 16  Na sɛ wantie a, fa onipa biako anaa baanu ka wo ho, na ama asɛm biara agyina adansefo baanu anaa baasa anom asɛm so.+ 17  Sɛ wantie wɔn a, ka kyerɛ asafo no. Sɛ wantie asafo no nso a, bu no sɛ amanaman muni+ anaa towgyeni.+ 18  “Nokwarem mise mo sɛ, biribiara a mobɛkyekyere wɔ asase so no yɛ nea wɔakyekyere wɔ soro, na biribiara a mobɛsan wɔ asase so no yɛ nea wɔasan wɔ soro.+ 19  Nokwarem no, meka kyerɛ mo bio sɛ, sɛ mo mu nnipa baanu pene so wɔ asase so sɛ wobebisa biribiara a ɛho hia a, m’Agya a ɔwɔ soro no bɛma wɔn nsa aka.+ 20  Na nea baanu anaa baasa ahyiam me din mu no,+ na mewɔ wɔn mfinimfini.”+ 21  Ɛnna Petro bebisaa no sɛ: “Awurade, mpɛn ahe na sɛ me nua yɛ me bɔne a, ɛsɛ sɛ mede firi no?+ Enkosi mpɛn ason anaa?”+ 22  Yesu ka kyerɛɛ no sɛ: “Meka kyerɛ wo sɛ, ɛnyɛ mpɛn ason, na mmom enkosi mpɛn aduɔson ason.+ 23  “Ɛno nti na ɔsoro ahenni te sɛ obi, ɔhene bi,+ a ɔpɛe sɛ ɔne ne nkoa bu akontaa+ no. 24  Bere a ofii ase sɛ ɔne wɔn rebu akontaa no, wɔde ɔbarima bi bae a ɔde no ka dwetikɛse mpem du [=denare 60,000,000]. 25  Nanso esiane sɛ onni nea ɔde betua ka no nti, ne wura no hyɛe sɛ wɔntɔn ɔne ne yere ne ne mma ne nea ɔwɔ nyinaa mfa ntua ka no.+ 26  Enti akoa no kotow n’anim fii ase srɛɛ no sɛ, ‘Nya abotare ma me na metua ne nyinaa ama wo.’ 27  Asɛm no yɛɛ akoa no wura no mmɔbɔ na ogyaa no+ de ɛka a ɔde no kyɛɛ no.+ 28  Ɛnna saa akoa no fii adi kohuu ne yɔnko akoa bi a ɔno nso de no ka denare+ ɔha, na osoo no mu fii ase miaa ne menewa kae sɛ, ‘Tua ɛka a wode nyinaa.’ 29  Enti ne yɔnko akoa no hwee fam na ofii ase srɛɛ no sɛ, ‘Nya abotare+ ma me na metua wo ka.’ 30  Nanso wampene, na mmom ɔkɔe de no kɔtoo afiase kosi sɛ obetua ɛka a ɔde no. 31  Enti bere a ne mfɛfo nkoa no huu nea asi no, wɔn werɛ howee pii na wɔkɔkaa nea asi no nyinaa kyerɛɛ wɔn wura no.+ 32  Ɛnna ne wura no frɛɛ no ka kyerɛɛ no sɛ, ‘Akoa bɔne, bere a wosrɛɛ me no mede ka no nyinaa kyɛɛ wo. 33  So ɛnsɛ sɛ anka wo nso wuhu wo yɔnko akoa mmɔbɔ+ sɛnea mihuu wo mmɔbɔ+ no?’ 34  Afei ne wura no a asɛm no ahyɛ no abufuw no+ de no hyɛɛ afiasehwɛfo nsa, kosi sɛ obetua ka biara a ɔde. 35  Saa ara+ na mo nso sɛ moamfi mo komam amfa amfiri mo nuanom a, me soro Agya ne mo bedi.”+

Ase Hɔ Nsɛm