Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Mateo 12:1-50

12  Saa bere no Yesu kɔfaa awifuw mu homeda.+ Ɔkɔm dee n’asuafo no ma wofii ase pempan awi mmɛtem wee.+  Bere a Farisifo no huu eyi no, wɔka kyerɛɛ no sɛ:+ “Hwɛ! W’asuafo no reyɛ nea mmara mma kwan sɛ wɔyɛ homeda.”+  Ɔka kyerɛɛ wɔn sɛ: “Monkenkanee nea Dawid yɛe bere a ɔkɔm dee ɔne mmarima a wɔka ne ho no?+  Sɛnea ɔkɔɔ Onyankopɔn fie na wodii paanoo a wɔde aba Onyankopɔn anim+ a mmara mma kwan+ sɛ ɔno anaa wɔn a wɔka ne ho no di, gye asɔfo nkutoo no?+  Anaasɛ monkenkanee wɔ Mmara+ no mu sɛ asɔfo a wɔwɔ asɔrefie hɔ homeda no bu homeda no sɛ dahunu a wonni ho fɔ?+  Na mise mo sɛ nea ɛso sen asɔrefie+ no wɔ ha.  Nanso sɛ muhuu nea asɛm yi, ‘Mepɛ mmɔborɔhunu+ na ɛnyɛ afɔrebɔ’+ no kyerɛ a, anka moammu wɔn a wɔn ho nni asɛm no fɔ.  Homeda+ Wura ne Onipa Ba no.”+  Bere a ofii hɔ no, ɔkɔɔ wɔn hyiadan mu, 10  na hwɛ! obi a ne nsa awu wɔ hɔ!+ Afei nea ɛbɛyɛ na wɔanya biribi abɔ no sobo no wobisaa no sɛ, “Mmara ma kwan sɛ wɔsa yare homeda?”+ 11  Ɔka kyerɛɛ wɔn sɛ: “Mo mu hena na ɔwɔ oguan bi a sɛ ɔkɔtɔ amoa+ mu homeda a, ɔrenso ne mu nyi no mfi mu?+ 12  Ne nyinaa mu no, hwɛ sɛnea onipa som bo pii sen oguan!+ Enti mmara ma ho kwan sɛ wɔyɛ adepa homeda.” 13  Afei ɔka kyerɛɛ ɔbarima no sɛ: “Teɛ wo nsa.” Na ɔteɛe, na ɛsan yɛɛ yiye te sɛ ne nsa biako no.+ 14  Nanso Farisifo no fii adi kotuu ne ho agyina sɛnea ɛbɛyɛ a wobekum no.+ 15  Bere a Yesu huu saa no, ofii hɔ kɔe. Nnipa bebree nso dii n’akyi na ɔsaa wɔn nyinaa yare,+ 16  nanso ɔbaraa wɔn sɛ wɔmmma nkurɔfo nnhu onipa ko a ɔyɛ,+ 17  na nea wɔnam odiyifo Yesaia so kae no aba mu sɛ: 18  “Hwɛ! M’akoa+ a mapaw no, nea medɔ no+ a me kra agye no atom! Mede me honhom begu no so,+ na ɔbɛma amanaman no ahu atɛntrenee pefee. 19  Ɔne obi renham+ na ɔrenteɛteɛm, na obiara rente ne nne mmɔnten so. 20  Ɔremmu demmire a abukaw biara mu, na ɔrennum ntamaban biara a ayɛ wusiwusi+ kosi sɛ obebu atɛntrenee+ nkonim mu. 21  Nokwarem no, amanaman de wɔn ani bɛto ne din so.”+ 22  Afei wɔde ɔbarima bi a ɔwɔ adaemone a ɔyɛ onifuraefo ne mum brɛɛ no, na ɔsaa no yare maa ɔbarima a ɔyɛ mum no kasae, na ohuu ade. 23  Afei nnipakuw no nyinaa ho dwiriw wɔn na wofii ase kekae sɛ:+ “Ɛnyɛ oyi ne Dawid Ba no anaa?”+ 24  Farisifo no tee eyi no wɔkae sɛ: “Ɛnyɛ hwee na saa damfo yi de tu adaemone sɛ Beelsebub, adaemone panyin no.”+ 25  Bere a ohuu wɔn adwene no,+ ɔka kyerɛɛ wɔn sɛ: “Ahenni biara a ɛne ne ho di asi no dan amamfõ,+ na kurow anaa ofie biara a ɛne ne ho di asi no rennyina. 26  Enti sɛ Satan tu Satan a, na ɔne ne ho adi asi, na ɛbɛyɛ dɛn na n’ahenni agyina? 27  Bio nso, sɛ mede Beelsebub na etu adaemone a,+ mo mma de hena na etu wɔn? Eyi nti mo akyidifo bebu mo atɛn. 28  Nanso sɛ mede Onyankopɔn honhom na etu adaemone a, ɛnde na Onyankopɔn ahenni ato mo ankasa.+ 29  Anaasɛ ɛbɛyɛ dɛn na obi atumi abɔ awura ɔhoɔdenfo bi fie akogye ne nneɛma? Gye sɛ odi kan kyekyere ɔhoɔdenfo no. Ɛno ansa na ɔbɛfow ne fie nneɛma.+ 30  Nea onni m’afa no sɔre tia me, na nea ɔne me mmoaboa ano no hwete mu.+ 31  “Eyi nti mise mo sɛ, wɔde bɔne ne abususɛm biara befiri nnipa, nanso abususɛm a etia honhom no de, wɔremfa mfiri.+ 32  Sɛ nhwɛso no, obiara a ɔbɛka asɛm bi atia onipa Ba no, wɔde befiri no;+ nanso obiara a ɔbɛkasa atia honhom kronkron no, wɔremfa mfiri no bere yi mu anaa nea ɛbɛba no mu.+ 33  “Sɛ moma dua no yɛ dua pa a, n’aba nso bɛyɛ aba pa, nanso moma dua no porɔw a, n’aba nso bɛporɔw; efisɛ dua biara aba na wɔde hu dua ko.+ 34  Nhurutoa mma,+ mobɛyɛ dɛn atumi aka nsɛm a eye bere a moyɛ abɔnefo?+ Efisɛ nea ayɛ koma mã no na ano ka.+ 35  Onipa pa fi nnepa a waboaboa ano mu de nneɛma pa ma,+ na nipa bɔne fi nnebɔne a waboaboa ano mu de nneɛma bɔne ma.+ 36  Mise mo sɛ asɛm biara a mfaso nni so a nnipa ka no, wobebu ho akontaa+ Atemmu Da no; 37  wɔnam mo nsɛm so bebu mo bem, na wɔnam mo nsɛm so bebu mo fɔ.”+ 38  Afei akyerɛwfo ne Farisifo binom bua see no sɛ: “Ɔkyerɛkyerɛfo, yɛpɛ sɛ woyɛ sɛnkyerɛnne bi ma yɛhwɛ.”+ 39  Ɔmaa wɔn mmuae sɛ: “Awo ntoatoaso abɔnefo ne awaresɛefo+ kɔ so hwehwɛ sɛnkyerɛnne, nanso wɔremma wɔn sɛnkyerɛnne biara gye odiyifo Yona sɛnkyerɛnne no.+ 40  Na sɛnea Yona+ dii apataa kɛse no yam nnansa, awia ne anadwo no, saa ara na onipa Ba no+ bedi asase yam+ nnansa, awia ne anadwo.+ 41  Nnipa a wɔwɔ Niniwe ne awo ntoatoaso+ yi bɛsɔre atemmu bere mu na wɔabu awo ntoatoaso no fɔ;+ efisɛ asɛm a Yona+ kae no ma wɔsakrae, nanso hwɛ! nea ɔsen Yona wɔ ha. 42  Wobenyan anafo+ fam hemmaa ne awo ntoatoaso yi aba atemmu no mu na obebu wɔn fɔ; efisɛ ofi asase ano betiee Solomon nyansa, nanso hwɛ! nea ɔsen Solomon wɔ ha.+ 43  “Sɛ honhom fĩ bi fi obi mu a, ɛkɔfa asase kesee so hwehwɛ homebea, na ennya bi.+ 44  Afei ɛka sɛ, ‘Mɛsan akɔ me fie a mifii mu no mu’; sɛ ebedu hɔ a, ehu sɛ emu da mpan nanso wɔaprapra mu kama asiesie mu. 45  Afei ɛkɔ kɔfa ahonhom ason foforo a wodi bɔne sen no+ ka ne ho, na wɔba mu bɛtena hɔ, na tebea a onipa no ba mu akyiri yi no sɛe koraa sen kan no.+ Saa ara na ɛbɛyɛ awo ntoatoaso abɔnefo yi nso.”+ 46  Bere a ogu so rekasa akyerɛ nnipakuw no, hwɛ! ne maame ne ne nuabarimanom+ begyinaa abɔnten hɔ pɛe sɛ wɔne no kasa. 47  Enti obi ka kyerɛɛ no sɛ: “Hwɛ! Wo maame ne wo nuabarimanom gyina abɔnten pɛ sɛ wɔne wo kasa.” 48  Na obuaa nea ɔkaa saa kyerɛɛ no no sɛ: “Hena ne me maame, na henanom ne me nuabarimanom?”+ 49  Na ɔteɛɛ ne nsa kyerɛɛ n’asuafo no so kae sɛ: “Hwɛ! Me maame ne me nuabarimanom ni!+ 50  Na obiara a ɔyɛ nea m’Agya a ɔwɔ soro no pɛ no, ɔno ne me nuabarima ne me nuabea ne me maame.”

Ase Hɔ Nsɛm