Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Marko 10:1-52

10  Ofi hɔ no, ɔsɔre baa Yudea ahye so ne Yordan agya, na nnipakuw san boaboaa wɔn ho ano baa ne nkyɛn, na sɛnea ɔtaa yɛ no, ofii ase kyerɛkyerɛɛ wɔn.+  Afei Farisifo baa ne nkyɛn, na esiane sɛ wɔpɛ sɛ wɔsɔ no hwɛ nti, wobisaa no sɛ mmara ma kwan sɛ ɔbarima begyaa ne yere anaa.+  Obua see wɔn sɛ: “Dɛn na Mose ka kyerɛɛ mo sɛ monyɛ?”  Wɔkae sɛ: “Mose maa ho kwan sɛ wotumi kyerɛw awaregyae krataa de gyaa ɔbea no.”+  Na Yesu ka kyerɛɛ wɔn sɛ: “Mo komaden+ nti na ɔkyerɛw saa mmara yi maa mo.  Na efi abɔde mfiase no ‘Ɔyɛɛ wɔn ɔbarima ne ɔbea.+  Eyi nti na ɔbarima begyaw ne papa ne ne maame hɔ,  na wɔn baanu no ayɛ ɔhonam koro’;+ enti wɔnyɛ baanu bio, na mmom ɔhonam koro.  Enti nea Onyankopɔn aka abom no, mma onipa biara nntetew mu.”+ 10  Bere foforo a ɔwɔ fie+ no, n’asuafo no bisaa no eyi ho asɛm. 11  Na ɔka kyerɛɛ wɔn sɛ: “Obiara a obegyaa ne yere asan aware foforo no asɛe aware,+ 12  na sɛ ɔbea bi gyaa ne kunu na ɛno akyi ɔware foforo a, wasɛe aware.”+ 13  Afei nkurɔfo fii ase de wɔn mma nkumaa brɛɛ no sɛ ɔmfa ne nsa nka wɔn; nanso asuafo no kaa wɔn anim.+ 14  Na Yesu huu eyi no, n’ani beree na ɔka kyerɛɛ wɔn sɛ: “Momma mmofra nkumaa no mmra me nkyɛn; na munnsiw wɔn kwan, efisɛ wɔn a wɔte saa na Onyankopɔn ahenni no yɛ wɔn dea.+ 15  Nokwarem mise mo sɛ, obiara a onnye Onyankopɔn ahenni sɛ abofra kumaa no renkɔ mu ɔkwan biara so.”+ 16  Na ɔbam mmofra no, na ɔde ne nsa guu wɔn so hyiraa wɔn.+ 17  Na osiim a ɔrekɔ no, ɔbarima bi tuu mmirika bebuu nkotodwe wɔ n’anim bisaa no sɛ: “Ɔkyerɛkyerɛfo Pa, dɛn na menyɛ na manya daa nkwa?”+ 18  Yesu ka kyerɛɛ no sɛ: “Dɛn nti na wofrɛ me papa?+ Obiara nyɛ papa gye obiako pɛ, Onyankopɔn.+ 19  Wunim mmara no, ‘Nni awu,+ Nsɛe aware,+ Mmɔ korɔn,+ Nni adansekurum,+ Nsisi obiara,+ Di wo papa ne wo maame ni.’”+ 20  Ɔbarima no ka kyerɛɛ no sɛ: “Ɔkyerɛkyerɛfo, madi eyinom nyinaa so fi me mmofraase.” 21  Yesu hwɛɛ no na ɔdɔɔ no, na ɔka kyerɛɛ no sɛ: “Aka wo ade biako: Kɔ na kɔtɔn nea wowɔ na fa ma ahiafo, na wubenya ademude wɔ soro, na bra bedi m’akyi.”+ 22  Na asɛm no maa ne werɛ howee na ɔde yaw fii hɔ kɔe, efisɛ na ɔwɔ agyapade bebree.+ 23  Yesu too n’ani hwɛɛ nnipa a wɔwɔ hɔ no, na ɔka kyerɛɛ n’asuafo no sɛ: “Hwɛ den ara a ɛbɛyɛ ama wɔn a wɔwɔ sika+ no sɛ wɔbɛkɔ Onyankopɔn ahenni mu!”+ 24  Na ne nsɛm no yɛɛ asuafo no nwonwa.+ Na Yesu san bua see wɔn sɛ: “Mma, monhwɛ sɛnea ɛyɛ den sɛ obi bɛkɔ Onyankopɔn ahenni mu! 25  Ɛyɛ mmerɛw sɛ yoma bɛfa paane aniwa mu sen sɛ ɔdefo bɛkɔ Onyankopɔn ahenni mu.”+ 26  Afei wɔn ho dwiriw wɔn yiye ma wɔka kyerɛɛ no sɛ: “Ɛnde, hena na obetumi anya nkwa ankasa?”+ 27  Yesu hwɛɛ wɔn anim, na ɔka kyerɛɛ wɔn sɛ: “Nnipa fam de, ɛrentumi nyɛ yiye, nanso ɛnte saa wɔ Onyankopɔn fam, efisɛ Onyankopɔn fam de ade nyinaa betumi ayɛ yiye.”+ 28  Petro fii ase ka kyerɛɛ no sɛ: “Hwɛ! Yɛagyaw nneɛma nyinaa abedi w’akyi.”+ 29  Yesu kae sɛ: “Nokwarem mise mo sɛ, Obiara nni hɔ a wagyaw ofie anaasɛ nuabarimanom anaasɛ nuabeanom anaasɛ maame anaasɛ papa anaasɛ mma anaasɛ nsase, me ne asɛmpa no nti+ 30  a ɔrennya afie ne nuabarimanom ne nuabeanom ne maamenom ne mma ne nsase mmɔho ɔha+ saa bere yi, a ɔtaa ka ho,+ ne daa nkwa wɔ bere* a ɛreba no mu. 31  Nanso adikanfo pii bɛka akyi, na akyikafo abedi kan.”+ 32  Ná wɔnam kwan so rekɔ Yerusalem, na na Yesu di wɔn anim, na wɔn ho dwiriw wɔn; na wɔn a wɔka ho no fii ase suroe. Afei ɔde dumien no kɔɔ nkyɛn bio, na ofii ase kaa nea etwa sɛ ɛto no no kyerɛɛ wɔn+ sɛ: 33  “Hwɛ, yɛn ani kyerɛ Yerusalem, na wobeyi onipa Ba no ama asɔfo mpanyin ne akyerɛwfo no, na wobebu no kumfɔ, na wobeyi no ama amanaman mufo,+ 34  na wobedi ne ho agoru atete ntasu agu no so na wɔaka no mpire akum no, nanso nnansa akyi no obenyan.”+ 35  Na Yakobo ne Yohane, Sebedeo+ mma baanu no kɔɔ ne nkyɛn kɔka kyerɛɛ no sɛ: “Ɔkyerɛkyerɛfo, yɛpɛ sɛ woyɛ nea yebebisa afi wo hɔ biara ma yɛn.”+ 36  Obisaa wɔn sɛ: “Dɛn na mopɛ sɛ meyɛ ma mo?” 37  Wɔka kyerɛɛ no sɛ: “Ma yɛn hokwan ma obiako ntena wo nifa na obiako nso ntena wo benkum wɔ w’anuonyam mu.”+ 38  Na Yesu ka kyerɛɛ wɔn sɛ: “Munnim nea morebisa no. Mubetumi anom nea mɛnom no, anaa mubetumi abɔ asu a wɔrebɔ me no bi?”+ 39  Wɔka kyerɛɛ no sɛ: “Yebetumi.” Ɛnna Yesu ka kyerɛɛ wɔn sɛ: “Nea mɛnom no de mobɛnom, na asu a wɔbɔ me no mobɛbɔ bi.+ 40  Na me nifa ne me benkum so tena no de, ɛnyɛ me dea na mede ama,+ na mmom ɛyɛ wɔn a wɔasiesie ama wɔn no dea.” 41  Bere a edu a aka no tee ho asɛm no, wɔn bo fuw Yakobo ne Yohane.+ 42  Na Yesu frɛɛ wɔn baa ne nkyɛn ka kyerɛɛ wɔn sɛ: “Munim sɛ wɔn a wobu wɔn sɛ amanaman sodifo no di wɔn so bakoma na wɔn mu atitiriw no di wɔn so tumi.+ 43  Nanso ɛnte saa mo mu; mmom obiara a ɔpɛ sɛ ɔyɛ kɛse mo mu no, ɔnyɛ ɔsomfo,+ 44  na obiara a ɔpɛ sɛ odi kan mo mu no, ɔnyɛ mo nyinaa mu akoa.+ 45  Efisɛ onipa Ba no mpo amma sɛ wɔnsom no,+ na mmom sɛ ɔbɛsom de ne kra ayɛ agyede+ de agye nnipa bebree.”+ 46  Na wɔbaa Yeriko. Na bere a ɔne n’asuafo no ne nnipakuw pii refi Yeriko no, na Bartimeo (Timeo ba), onifuraefo a ɔsrɛsrɛ ade no, te kwankyɛn.+ 47  Bere a ɔtee sɛ ɛyɛ Yesu, Nasareni no, ofii ase teɛteɛɛm kae sɛ: “Yesu, Dawid Ba,+ hu me mmɔbɔ!”+ 48  Ɛnna nnipa pii fii ase teɛteɛɛ no sɛ ɔnyɛ dinn; nanso afei koraa na ɔteɛteɛɛm kɛse kae sɛ: “Dawid Ba, hu me mmɔbɔ!”+ 49  Enti Yesu gyina kae sɛ: “Momfrɛ no.” Na wɔfrɛɛ onifuraefo no ka kyerɛɛ no sɛ: “Ma wo bo ntɔ wo yam, sɔre, ɔrefrɛ wo.”+ 50  Ɔtow n’atade gui huruw gyinae, na ɔkɔɔ Yesu nkyɛn. 51  Na Yesu buaa no sɛ: “Dɛn na wopɛ sɛ meyɛ ma wo?”+ Onifuraefo no ka kyerɛɛ no sɛ: “Rabuni, ma minhu ade.”+ 52  Na Yesu ka kyerɛɛ no sɛ: “Kɔ, wo gyidi ama wo ho asan wo.”+ Na ntɛm ara ohuu ade,+ na ofii ase dii n’akyi ɔkwan no so.+

Ase Hɔ Nsɛm

Anaasɛ, “nneɛma nhyehyɛe,” Hela, ai·oʹni.