Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Marko 1:1-45

1  Asɛmpa a ɛfa Yesu Kristo ho no mfiase:  Sɛnea wɔakyerɛw no odiyifo Yesaia nhoma mu no: “(Hwɛ! Meresoma me bɔfo adi w’anim ma wabesiesie wo kwan;)*+  tie! obi reteɛm wɔ sare so sɛ, ‘Munsiesie Yehowa kwan, momma n’akwan nteɛ,’”+  osuboni Yohane baa sare so bɛkaa asubɔ a egyina hɔ ma adwensakra a ɛkɔ bɔne fafiri mu ho asɛm.+  Ɛnna Yudea mpɔtam hɔfo nyinaa ne wɔn a wɔtete Yerusalem nyinaa kɔɔ ne nkyɛn, na wɔkaa wɔn bɔne+ kyerɛe, na ɔbɔɔ wɔn asu Asubɔnten Yordan mu.  Ná Yohane hyɛ yoma nhwi atade a aboa nhoma abɔso bɔ n’asen,+ na na odi mmoadabi+ ne wuram ɛwo.+  Na asɛm a na ɔka ne sɛ: “Obi di m’akyi reba a ɔwɔ tumi sen me, na memfata sɛ mɛkotow asan ne mpaboa hama mpo.+  Mede nsu na ɛbɔɔ mo asu, na ɔno de, honhom kronkron na ɔde bɛbɔ mo asu.”+  Nna no mu Yesu fi Nasaret a ɛwɔ Galilea bae ma Yohane bɔɔ no asu wɔ Yordan mu.+ 10  Na opue fii nsu no mu ara pɛ na ohui sɛ ɔsoro abue, na honhom no resian aba no so te sɛ aborɔnoma;+ 11  na nne bi fi soro bae sɛ: “Woyɛ me Ba a medɔ wo; magye wo atom.”+ 12  Na ɛhɔ ara honhom no hyɛɛ no ma ɔkɔɔ sare so.+ 13  Enti ɔtenaa sare so adaduanan,+ na Satan sɔɔ no hwɛe,+ na na ɔne nkekaboa na ɛwɔ hɔ, na abɔfo som no.+ 14  Afei bere a wɔkyeree Yohane no, Yesu kɔɔ Galilea+ kɔkaa Onyankopɔn ho asɛmpa,+ 15  na ɔkae sɛ: “Bere a wɔahyɛ no adu,+ na Onyankopɔn ahenni abɛn. Monsakra mo adwene+ na munnye asɛmpa no nni.” 16  Bere a ɔnam Galilea po* ho no, ohuu Simon+ ne ne nua Andrea sɛ wɔregu wɔn asau wɔ po no mu, efisɛ na wɔyɛ mpataayifo.+ 17  Ɛnna Yesu ka kyerɛɛ wɔn sɛ: “Mummedi m’akyi, na mɛma moayɛ nnipa yifo.”+ 18  Na ntɛm ara wogyaw wɔn asau no hɔ kodii n’akyi.+ 19  Na ɔkɔɔ n’anim kakra no, ohuu Sebedeo ba Yakobo ne ne nua Yohane, na wɔn nso, na wɔwɔ wɔn ɔkorow mu retuatua wɔn asau mu;+ 20  na ntɛm ara na ɔfrɛɛ wɔn. Ɛnna wogyaw wɔn papa Sebedeo ne apaafo no wɔ ɔkorow no mu kodii n’akyi. 21  Na wosiim kɔɔ Kapernaum.+ Na homeda dui ara pɛ na ɔkɔɔ hyiadan mu, na ofii ase kyerɛkyerɛe. 22  Na ɔkwan a ɔfaa so kyerɛkyerɛe no yɛɛ wɔn nwonwa,+ efisɛ na ɔrekyerɛkyerɛ wɔn sɛ obi a ɔwɔ tumi, na ɛnyɛ sɛ akyerɛwfo no.+ 23  Saa bere no ara nso na ɔbarima bi wɔ wɔn hyiadan no mu a honhom fĩ ahyɛ no so, na ɔteɛɛm+ 24  kae sɛ: “Nasareni Yesu, dɛn na yɛne wo wɔ yɛ?+ So wobae sɛ worebɛsɛe yɛn? Minim+ onii ko a woyɛ ankasa, wone Ɔkronkronni+ a ofi Onyankopɔn hɔ no.”+ 25  Ɛnna Yesu kaa n’anim sɛ: “Yɛ komm, na fi ne mu kɔ!”+ 26  Na honhom fĩ no ma osinsenee, na ɔteɛɛm denneennen fii no mu.+ 27  Na ɛyɛɛ nkurɔfo no nwonwa araa ma wofii ase yɛɛ huhuhuhu sɛ: “Dɛn ni? Nkyerɛkyerɛ foforo ni! Ɔde tumi kasa kyerɛ ahonhom fĩ mpo ma wotie no.”+ 28  Na ntɛm ara ne ho asɛm trɛw kɔɔ nsase a atwa Galilea ho ahyia nyinaa so.+ 29  Na ɛhɔ ara na wofii hyiadan no mu na wɔne Yakobo ne Yohane kɔɔ Simon+ ne Andrea fie. 30  Saa bere no na Simon asebea+ yare atiridii+ da hɔ, na wɔkaa ne ho asɛm kyerɛɛ no ntɛm ara. 31  Na ɔkɔɔ ne nkyɛn kosoo ne nsa maa no so; na atiridii no gyaee no,+ na ofii ase som wɔn.+ 32  Na bere a owia kɔtɔe ma onwini dwoe no, nkurɔfo fii ase de wɔn a wɔyare nyinaa,+ ne wɔn a wɔwɔ adaemone+ brɛɛ no; 33  ná kurow mũ no nyinaa abegu ɔpon no ano pɛɛ. 34  Enti ɔsaa nnipa pii a wɔwɔ nyarewa ahorow yare,+ na otuu adaemone pii, na wamma adaemone no ankasa, efisɛ na wonim sɛ ɔne Kristo no.+ 35  Na anɔpatutuutu a anim ntetewee no, ɔsɔre fii adi kɔɔ baabi a obiara nni,+ na ofii ase bɔɔ mpae+ wɔ hɔ. 36  Na Simon ne wɔn a wɔka ne ho no kyin kɔhwehwɛɛ no 37  na wohuu no ka kyerɛɛ no sɛ: “Obiara rehwehwɛ wo.” 38  Nanso ɔka kyerɛɛ wɔn sɛ: “Momma yɛnkɔ baabi foforo, nkurow a ɛbemmɛn ha no mu na menkɔka asɛm+ no wɔ hɔ nso, efisɛ eyi nti na mebae.”+ 39  Na ɔkɔkaa asɛm no wɔ wɔn hyia adan mu Galilea nyinaa, na otuu adaemone.+ 40  Ɔkwatani bi nso baa ne nkyɛn bebuu nkotodwe paa no kyɛw sɛ: “Sɛ wopɛ nko ara a, wubetumi ama me ho afi.”+ 41  Na ɛyɛɛ no mmɔbɔ,+ na ɔteɛɛ ne nsa soo no mu ka kyerɛɛ no sɛ: “Mepɛ. Wo ho mfi.”+ 42  Na amonom hɔ ara kwata no tu yerae, na ne ho fii.+ 43  Afei ogyaa no kwan ntɛm ara, baraa no denneennen, 44  na ɔka kyerɛɛ no sɛ: “Hwɛ na woanka ho hwee ankyerɛ obiara, na mmom kɔ na fa wo ho kɔkyerɛ ɔsɔfo+ na fa w’ahofi ho ayɛyɛde ma sɛnea Mose hyɛe no,+ na ɛnyɛ adanse mma wɔn.”+ 45  Nanso ɔbarima no fii hɔ no, ofii ase kekaa ho asɛm ma ɛtrɛwee baabiara ma afei de, Yesu antumi anyi n’anim ankɔ kurow biara mu, na mmom ɔtenaa kurow no akyi baabi komm. Nanso wofi mmaa nyinaa baa ne nkyɛn.+

Ase Hɔ Nsɛm

Hwɛ Malaki 3:1; ɛhɔ na asɛm a ɛwɔ nkahyemde “()” mu no fi.
Hwɛ Mt 4:18 ase hɔ asɛm no.