Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Luka 8:1-56

8  Eyi akyi bere tiaa bi no, otutuu akwan kɔɔ nkurow mu ne nkuraa ase kɔkaa asɛm no, na ɔpaee mu kaa Onyankopɔn ahenni ho asɛmpa.+ Ná dumien no ka ne ho,  ne mmea+ bi a wasa wɔn yare atu ahonhommɔne afi wɔn so, Maria a wɔfrɛ no Magdalene, a ahonhommɔne ason fi ne mu kɔe no,+  ne Herode fie so panyin Kusa yere Yoana,+ ne Susana ne mmea foforo pii a na wɔde wɔn ahode resom wɔn no.  Afei bere a nnipakuw kɛse bi bɛkaa wɔn a wɔne no kokɔɔ nkurow nkurow so no ho no, ɔde mfatoho bi kasa kyerɛɛ wɔn sɛ:+  “Ogufo bi fii adi sɛ ɔrekogu n’aba. Na ɔregu aba no, ebi koguu kwankyɛn ma wotiatiaa so, na ewim nnomaa dii.+  Ebi nso guu ɔbotan so, na efifii akyi no, ewui esiane nsu a annya nti.+  Ebi nso koguu nsɔe mu, na nsɔe a ɛne no nyinii no miaa no.+  Ebi nso guu asase pa mu, na efifii akyi no, ɛsow aba mmɔho ɔha.”+ Bere a ɔkaa eyinom no, ɔmaa ne nne so kae sɛ: “Ma nea ɔwɔ aso a ɔde betie no ntie.”+  Nanso n’asuafo no fii ase bisaa no nea mfatoho yi kyerɛ.+ 10  Ɔkae sɛ: “Mo na wɔde ama mo sɛ monte Onyankopɔn ahenni ho ahintasɛm kronkron no ase, na wɔn a aka no de, wɔte no mfatoho mu,+ ma enti wɔbɛhwɛ de, nanso wɔbɛhwɛ no kwa, na wɔbɛte de, nanso wɔrente ase.+ 11  Afei mfatoho+ no ase ni: Aba no ne Onyankopɔn asɛm.+ 12  Nea eguu kwankyɛn no ne wɔn a wɔtee,+ na Ɔbonsam+ beyii asɛm no fii wɔn koma mu na wɔannye anni annya nkwa.+ 13  Nea eguu ɔbotan so no ne wɔn a wɔte asɛm no a wɔde anigye gye, nanso eyinom nni ntini; wogye di wɔ bere bi mu, nanso edu sɔhwɛ bere a, na wɔawae.+ 14  Nea eguu nsɔe mu no, eyinom ne wɔn a wɔate, nanso asetena yi mu dadwen ne ahonya ne anigye+ twetwe wɔn, na emia wɔn koraa ma enti biribiara nwie pɛyɛ.+ 15  Nea eguu asase pa mu no, eyi ne wɔn a sɛ wɔde koma pa+ tie asɛm no wie a, wɔkora so na wɔde boasetɔ sow aba.+ 16  “Obiara nni hɔ a ɔsɔ kanea a, ɔde ade bɛkata so anaasɛ ɔde besi mpa ase, na mmom ɔde si kaneadua so, na ama wɔn a wɔba mu no ahu hann no.+ 17  Biribiara nni hɔ a ahintaw+ a ɛrenna adi, na biribiara nni hɔ a wɔakata so a wɔrenhu na ɛremma petee mu.+ 18  Enti, monhwɛ sɛnea mutie asɛm yiye; na obiara a ɔwɔ no, wɔbɛma no pii,+ na nea onni no de, nea osusuw sɛ ɔwɔ mpo no, wobegye afi ne nsam.”+ 19  Afei ne maame ne ne nuabarimanom+ baa baabi a ɔwɔ no, nanso nnipakuw no nti, wɔantumi annu ne nkyɛn.+ 20  Na wɔbɔɔ no amanneɛ sɛ: “Wo maame ne wo nuabarimanom gyina abɔnten pɛ sɛ wohu wo.”+ 21  Obua see wɔn sɛ: “Me maame ne me nuabarimanom ne eyinom a wɔte Onyankopɔn asɛm na wɔyɛ no.”+ 22  Ɛbae sɛ da bi ɔne n’asuafo no kɔtenaa ɔkorow bi mu, na ɔka kyerɛɛ wɔn sɛ: “Momma yentwa nkɔ ɔtare no agya nohoa.” Enti wosiim kɔe.+ 23  Na wɔwɔ nsu no so no, ɔdae. Ɛnna mframa kɛse bi bɔ baa ɔtare no so, na nsu fii ase bu faa wɔn so na ɛde wɔn too asiane mu.+ 24  Afei wɔkɔɔ ne nkyɛn konyanee no kae sɛ: “Ɔkyerɛkyerɛfo, Ɔkyerɛkyerɛfo, yɛrebewuwu!”+ Onyanee no, ɔteɛteɛɛ+ mframa no ne nsu a ebu fa so no, na ano brɛɛ ase, na ɛyɛɛ dinn. 25  Afei ɔka kyerɛɛ wɔn sɛ: “Mo gyidi wɔ he?” Nanso ehu kaa wɔn, na wɔde ahodwiriw keka kyerɛɛ wɔn ho sɛ: “Hena koraa ni a otumi hyɛ mframa ne nsu mpo ma wotie no yi?”+ 26  Na wokogyinaa mpoano wɔ Gerasafo asase so wɔ Galilea ntentenso.+ 27  Na osii fam no, ɔbarima bi a ɔwɔ adaemone a ofi kurow no mu behyiaa no. Na bere tenten ni a omfuraa ntama, na ɔnte fie, na mmom asiei.+ 28  Ohuu Yesu no, ɔteɛɛm denneennen hwee n’anim de nne kɛse kae sɛ: “Dɛn na me ne wo wɔ yɛ,+ Yesu, Ɔsorosoroni Nyankopɔn no Ba? Mesrɛ wo, nhaw me.”+ 29  (Ná ɔrehyɛ honhom fĩ no sɛ emfi ɔbarima no mu. Ná anya no so tumi bere tenten ni,+ na wɔtaa de nkɔnsɔnkɔnsɔn ne mpokyerɛ gu no wɛn no, nanso ɔtetew mpokyerɛ no mu na honhom fĩ no twe no kɔ baabi a obiara nni.) 30  Yesu bisaa no sɛ: “Wo din de dɛn?” Ɔkae sɛ: “Asafotow” efisɛ na adaemone pii ahyɛn ne mu.+ 31  Na wɔkɔɔ so srɛɛ+ no sɛ ɔnnhyɛ wɔn mmma wommfi ne mu nnkɔ bun no mu.+ 32  Ná mprako+ pii redidi wɔ bepɔw no so; enti wɔsrɛɛ no sɛ ɔmma wɔn kwan ma wɔnkɔhyɛn wɔn mu.+ Na ɔmaa wɔn kwan. 33  Enti adaemone no fii ɔbarima no mu kɔhyɛn mprako no mu, na mprako no bɔɔ kirididi fii bepɔw no so koguu ɔtare no mu wuwui.+ 34  Bere a wɔn a wɔhwɛ mmoa no huu nea asi no, woguan kɔbɔɔ amanneɛ wɔ kurow no mu ne nkuraase.+ 35  Ɛnna nkurɔfo bae sɛ wɔrebɛhwɛ nea asi, na wɔbaa Yesu nkyɛn behuu ɔbarima a wɔatu adaemone afi ne mu no sɛ ɔhyɛ atade te Yesu nan ase, a n’dwenem atew; na wɔbɔɔ hu.+ 36  Wɔn a wohui no kaa sɛnea ɛyɛe a ɔbarima a ɔwɔ adaemone no ho tɔɔ no no kyerɛɛ wɔn.+ 37  Enti nnipadɔm a wofi Gerasafo nsase a atwa ahyia so no nyinaa see no sɛ omfi wɔn nkyɛn nkɔ, efisɛ na ehu aka wɔn kɛse.+ Ɛnna ɔtenaa ɔkorow no mu siim sɛ ɔrekɔ. 38  Nanso, ɔbarima a adaemone fii ne mu no kɔɔ so srɛɛ no ara sɛ ɔne no bɛkɔ; nanso ɔsan no kae sɛ:+ 39  “San kɔ fie, na kɔ so ka nea Onyankopɔn ayɛ ama wo no kyerɛ.”+ Enti ofii hɔ kɔe, paee mu kaa nea Yesu ayɛ ama no no wɔ kurow no mu nyinaa.+ 40  Bere a Yesu san bae no, nnipakuw no gyee no fɛw so, efisɛ na wɔn nyinaa rehwɛ no kwan.+ 41  Na hwɛ! ɔbarima bi a ne din de Yairo a ɔyɛ hyiadan mu panyin bae. Na ɔhwee Yesu nan ase srɛɛ no sɛ ɔmmra ne fie,+ 42  efisɛ na ɔwɔ ɔbabea koro pɛ a wadi bɛyɛ mfe dumien a ɔreyɛ awu.+ Bere a ɔrekɔ no, nnipakuw no kyeree no so.+ 43  Na ɔbea bi a mogya+ atu no mfe dumien, a obiara ntumi nsaa no yare,+ 44  fi n’akyi de ne nsa bɛkaa n’atade nguguso+ ano,+ na amonom hɔ ara mogya no twae.+ 45  Enti Yesu kae sɛ: “Hena na ɔde ne nsa kaa me?”+ Bere a wɔn nyinaa kae sɛ ɛnyɛ wɔn no, Petro kae sɛ: “Ɔkyerɛkyerɛfo, nnipakuw yi afuw wo ho na wɔakyere wo so.”+ 46  Nanso Yesu kae sɛ: “Obi de ne nsa aka me, mahu sɛ tumi+ afi me mu kɔ.”+ 47  Bere a ɔbea no hui sɛ wahu no no, ɔde ahopopo bɛhwee n’anim kaa nea enti a ɔde ne nsa kaa no ne sɛnea ne ho tɔɔ no amonom hɔ ara no wɔ nnipa no nyinaa anim.+ 48  Na ɔka kyerɛɛ no sɛ: “Ɔbabea, wo gyidi ama wo ho atɔ wo;+ fa asomdwoe kɔ.”+ 49  Na ogu so rekasa no, hyiadan mu panyin no nanmusini bi bɛkae sɛ: “Wo babea no awu; nhaw ɔkyerɛkyerɛfo no bio.”+ 50  Bere a Yesu tee no, obuaa no sɛ: “Nsuro, wo de, nya gyidi,+ na obenya nkwa.” 51  Bere a oduu fie hɔ no, wamma obiara ne no ankɔ mu gye Petro ne Yohane ne Yakobo ne abeawa no papa ne ne maame.+ 52  Nanso na nkurɔfo resu no de awerɛhow pempem wɔn koko. Enti ɔkae sɛ: “Munnyae su,+ onwui na mmom wada.”+ 53  Eyi nti wofii ase serew no, efisɛ na wonim sɛ wawu.+ 54  Na osoo ne nsa maa no so frɛɛ no sɛ: “Abeawa, sɔre!”+ 55  Na ne honhom+ san bae, na ɔsɔree+ ntɛm ara, na ɔhyɛe sɛ wɔmma no biribi nni.+ 56  Na n’awofo no ho dwiriw wɔn; nanso ɔhyɛɛ wɔn sɛ wɔnnka nea asi no nnkyerɛ obiara.+

Ase Hɔ Nsɛm