Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Luka 4:1-44

4  Ɛnna Yesu a honhom kronkron ahyɛ no mã no dan ne ho fii Yordan ho, na honhom no de no kɔɔ sare so+  adaduanan,+ na Ɔbonsam sɔɔ no hwɛe.+ Bio nso, wanni hwee saa nna no mu, enti ɛbaa awiei no na ɔkɔm de no.  Na Ɔbonsam ka kyerɛɛ no sɛ: “Sɛ woyɛ Onyankopɔn ba a, kasa kyerɛ ɔbo yi ma ɛnnan paanoo.”  Nanso Yesu buaa no sɛ: “Wɔakyerɛw sɛ, ‘Ɛnyɛ paanoo nkutoo so na onipa nam bɛtena ase.’”+  Enti ɔde no kɔe kɔkyerɛɛ no asase so ahenni nyinaa prɛko;  na Ɔbonsam ka kyerɛɛ no sɛ: “Mede tumi+ yi nyinaa ne ɛho anuonyam bɛma wo, efisɛ wɔde ama me, na obiara a mepɛ no mede ma no.+  Enti sɛ wobɔ wo mu ase+ som me a, ne nyinaa bɛyɛ wo de.”  Yesu ka kyerɛɛ no sɛ: “Wɔakyerɛw sɛ, ‘Yehowa wo Nyankopɔn+ na ɛsɛ sɛ wokotow no, na ɔno nkutoo na ɛsɛ sɛ wosom no.’”+  Afei ɔde no kɔɔ Yerusalem kogyinaa asɔredan no atifi+ ka kyerɛɛ no sɛ: “Sɛ woyɛ Onyankopɔn ba a, gyaa wo ho kɔhwe fam;+ 10  efisɛ wɔakyerɛw sɛ, ‘Wo nti ɔbɛhyɛ n’abɔfo sɛ wɔmmɔ wo ho ban,’+ 11  na ‘Wɔbɛsoa wo wɔn nsa so, na woamfa wo nan ampem ɔbo da biara da.’”+ 12  Ɛnna Yesu bua see no sɛ: “Wɔaka sɛ, ‘Nsɔ Yehowa wo Nyankopɔn nhwɛ.’”+ 13  Enti Ɔbonsam wiee sɔhwɛ no nyinaa no, ogyaw no hɔ kosii bere foforo.+ 14  Afei Yesu san kɔɔ Galilea+ a honhom no tumi wɔ no so. Na ne ho asɛmpa trɛwee wɔ nkurow a atwa hɔ ahyia no nyinaa mu.+ 15  Ofii ase kyerɛkyerɛe wɔ wɔn hyia adan mu nso, na wɔn nyinaa hyɛɛ no anuonyam.+ 16  Na ɔbaa Nasaret,+ faako a wɔtetee no no; na sɛnea ɔtaa yɛ homeda no, ɔkɔɔ hyiadan mu,+ na ɔsɔre gyinaa hɔ sɛ ɔrebɛkenkan ade. 17  Enti wɔmaa no odiyifo Yesaia nhoma mmobɔwee no, na obuee nhoma mmobɔwee no mu na ohuu faako a wɔakyerɛw sɛ: 18  “Yehowa honhom+ wɔ me so, efisɛ ɔsraa me sɛ memmɛka asɛmpa nkyerɛ ahiafo, ɔsomaa me sɛ memmɛka ogye ho asɛm nkyerɛ nnommum na memma anifuraefo nhu ade, sɛ memma wɔn a wɔabubu nne wɔn ho,+ 19  na menka bere a ɛsɔ Yehowa ani nkyerɛ.”+ 20  Afei ɔbobɔw nhoma mmobɔwee no san de maa ɔsomfo no na ɔtenaa ase; na wɔn a wɔwɔ hyiadan no mu nyinaa de wɔn ani hwɛɛ no dinn. 21  Afei ofii ase ka kyerɛɛ wɔn sɛ: “Ɛnnɛ na kyerɛwsɛm a motee no seesei ara yi aba mu.”+ 22  Na wɔn nyinaa fii ase dii ne ho adanse pa, na nsɛm a ɛka koma+ a efi n’anom no maa wɔn ho dwiriw wɔn, na wɔkae sɛ: “Ɛnyɛ Yosef ba ni?”+ 23  Ɛnna ɔka kyerɛɛ wɔn sɛ: “Ampa mubebu me bɛ yi sɛ: ‘Ɔyaresafo,+ sa wo ho yare; yɛ nneɛma+ a yɛtee sɛ ɛkɔɔ so wɔ Kapernaum+ no bi wɔ wo kurom ha nso.’”+ 24  Na ɔkae sɛ: “Nokware mise mo sɛ odiyifo biara nni hɔ a wogye no tom wɔ ne kurom. 25  Mise mo nokwarem sɛ, Elia nna no mu no, na akunafo bebree wɔ Israel bere a wɔtoo ɔsoro mu mfe abiɛsa ne asram asia maa ɔkɔm kɛse baa asase no nyinaa so no,+ 26  nanso wɔansoma Elia ankɔ mmea yi mu biara nkyɛn sɛ okunafo bi a ɔwɔ Sarefat,+ Sidon asase so. 27  Bio nso, odiyifo Elisa bere so no, na akwatafo bebree wɔ Israel, nanso wɔamma wɔn mu biara ho amfi sɛ Siriani Naaman.”+ 28  Afei wɔn a wɔwɔ hyiadan no mu nyinaa tee saa nsɛm no, ɛhyɛɛ wɔn abufuw;+ 29  na wɔsɔre piapiaa no fii kurow no mu, na wɔde no kɔɔ bepɔw a wɔn kurow no gu so no ano sɛ wɔrekosum no ahwe fam.+ 30  Nanso ɔfaa wɔn mfinimfini kɔe.+ 31  Na ɔkɔɔ Kapernaum,+ Galilea kurow bi mu. Na ɔkyerɛkyerɛɛ wɔn homeda; 32  na ɔkwan a ɔfaa so kyerɛkyerɛe no yɛɛ wɔn nwonwa,+ efisɛ na tumi wɔ ne nsɛm no mu.+ 33  Ná ɔbarima bi wɔ hyiadan no mu a ɔwɔ adaemone honhom fĩ,+ na ɔde nne kɛse teɛɛm sɛ: 34  “Adɛn! Nasareni Yesu,+ dɛn na yɛne wo wɔ yɛ?+ So wobae sɛ worebɛsɛe yɛn? Minim+ onii ko a woyɛ ankasa, wone Ɔkronkronni a ofi Onyankopɔn hɔ no.”+ 35  Ɛnna Yesu kaa n’anim sɛ: “Yɛ komm, na fi ne mu kɔ.” Enti adaemone no maa ɔbarima no twa hwee wɔn mfinimfini, na ofii ne mu kɔe a wanyɛ no hwee.+ 36  Eyi yɛɛ wɔn nyinaa nwonwa, na wɔbɔɔ ho nkɔmmɔ sɛ: “Asɛm bɛn ni, ɔde tumi ne ahoɔden hyɛ ahonhom fĩ ma wofi?”+ 37  Enti ne ho asɛm trɛw kɔɔ nkurow a ɛbemmɛn hɔ no mu baabiara.+ 38  Ɔsɔre fii hyiadan no mu no, ɔkɔɔ Simon fie. Ná Simon asebea yare atiridii denneennen, na wɔsrɛɛ no sɛ ɔnhwɛ no.+ 39  Enti ogyinaa n’atifi teɛteɛɛ atiridii no,+ na egyaee no. Mpofirim ara ɔsɔre fii ase som wɔn.+ 40  Na owia rekɔtɔ no, wɔn a wɔwɔ nkurɔfo a nyarewa ahorow ayɛ wɔn no de wɔn brɛɛ no. Ɔde ne nsa guu wɔn mu biara so saa wɔn yare.+ 41  Adaemone nso fii wɔn mu pii mu+ teɛteɛɛm sɛ: “Wone Onyankopɔn Ba no.”+ Nanso, ɔkaa wɔn anim, na wamma wɔn kwan sɛ wɔnkasa,+ efisɛ na wonim no+ sɛ ɔne Kristo no.+ 42  Na ade kyee no, ofii adi kɔɔ baabi a obiara nni.+ Nanso nnipakuw no hwehwɛɛ no baa faako a ɔwɔ hɔ, na wɔbɔɔ mmɔden siankaa no na wamfi wɔn nkyɛn ankɔ. 43  Nanso ɔka kyerɛɛ wɔn sɛ: “Ɛsɛ sɛ mekɔ nkurow foforo mu nso kɔka Onyankopɔn ahenni ho asɛmpa no, efisɛ eyi nti na wɔsomaa me.”+ 44  Enti ɔtoaa so kaa asɛm wɔ Yudea hyia adan mu.+

Ase Hɔ Nsɛm