Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Luka 23:1-56

23  Enti nnipadɔm no nyinaa sɔree, na wɔde no kɔmaa Pilato.+  Afei wofii ase bɔɔ no sobo+ sɛ: “Yɛakyere ɔbarima yi sɛ otutu yɛn man ase+ na ɔbara sɛ wonntua tow+ mmma Kaesare na ɔka sɛ ɔno ne ɔhene Kristo.”+  Afei Pilato bisaa no sɛ: “Wone Yudafo hene no anaa?” Na obuaa no kae sɛ: “W’ankasa na woreka.”+  Ɛnna Pilato ka kyerɛɛ asɔfo mpanyin no ne nnipakuw no sɛ: “Minhu bɔne biara wɔ ɔbarima yi ho.”+  Nanso wɔkaa no denneennen sɛ: “Ɔkyerɛkyerɛ wɔ Yudea nyinaa de hwanyan nnipa no, ofii ase mpo fii Galilea na ɔde abedu ha.”  Bere a Pilato tee saa no, obisae sɛ ɔbarima no yɛ Galileani a,  na ohui sɛ ɔhyɛ Herode tumi ase+ no, ɔma wɔde no kɔmaa Herode a nna no mu na ɔno ankasa wɔ Yerusalem no.  Bere a Herode huu Yesu no n’ani gyei yiye, efisɛ na ɔpɛe sɛ ohu+ no akyɛ esiane ne ho asɛm a wate+ nti, na na ɔpɛ sɛ ɔyɛ sɛnkyerɛnne bi ma ohu.  Afei ofii ase bisaa no nsɛm bebree; nanso wammua no.+ 10  Na asɔfo mpanyin no ne akyerɛwfo no kɔɔ so sɔre gyinae de abufuw bɔɔ no sobo.+ 11  Ɛnna Herode ne n’asraafo a wɔwɛn no no bɔɔ no adapaa,+ na wɔhyɛɛ no atade hyɛnhyɛn dii ne ho agoru,+ na wɔsan de no kɔmaa Pilato. 12  Afei Herode ne Pilato+ bɛyɛɛ nnamfo saa da no ara; kan no, na anka wɔyɛ atamfo. 13  Afei Pilato frɛɛ asɔfo mpanyin no ne sodifo no ne ɔmanfo no hyiaam 14  na ɔka kyerɛɛ wɔn sɛ: “Mode onipa yi brɛɛ me sɛ obi a ɔma nkurɔfo no tew atua, na hwɛ! mehwehwɛɛ n’asɛm mu mo anim nanso manhu nnyinaso+ biara wɔ nea mode bɔɔ onipa yi sobo no mu. 15  Nokwarem no, Herode nso anhu bi, na ɔsan de no brɛɛ yɛn; na hwɛ! ɔnyɛɛ biribiara a ɛsɛ owu.+ 16  Enti mɛtwe n’aso+ na magyaa no.” 17  —— 18  Na nnipadɔm no nyinaa teɛɛm kae sɛ: “Fa oyi kɔ,+ na gyaa Baraba ma yɛn!”+ 19  (Ná ɔyɛ ɔbarima a wɔde no ato afiase esiane amammɔesɛm bi a esii kurow no mu ne awudi nti.) 20  Pilato maa ne nne so ne wɔn kasae bio, efisɛ na ɔpɛ sɛ ogyaa Yesu.+ 21  Na wofii ase teɛteɛɛm sɛ: “Bɔ no asɛndua mu! Bɔ no asɛndua mu!”+ 22  Ɔka kyerɛɛ wɔn ne mprɛnsa so sɛ: “Adɛn, bɔne bɛn na onipa yi ayɛ? Minhu biribiara wɔ ne ho a ɛsɛ owu; enti mɛtwe n’aso na magyaa no.”+ 23  Afei wɔde nne kɛse kaa no denneennen sɛ ɔmmɔ no asɛndua mu; na wɔn nne bunkam ne de so.+ 24  Enti Pilato buu atɛn sɛnea wɔhwehwɛ;+ 25  oyii+ ɔbarima a amammɔesɛm ne awudi nti wɔde no ato afiase a wɔrehwehwɛ no no, na ɔde Yesu maa wɔn sɛnea wɔpɛ.+ 26  Na wɔde no rekɔ no, wosoo Simon, Kireneni bi a ɔnam kwan so reba kurom hɔ mu, na wɔde asɛndua no soaa no dii Yesu akyi.+ 27  Ná dɔm kɛse bi a wofi ɔman no mu ne mmea a wɔde awerɛhow repempem wɔn koko na wɔrebɔ bena di n’akyi. 28  Yesu danee ne ho kyerɛɛ mmea no kae sɛ: “Yerusalem mmabea, munnsu me. Na mmom munsu mo ho ne mo mma;+ 29  efisɛ, hwɛ! nna bi reba a nkurɔfo bɛka sɛ, ‘Anigye ne abonin ne yafunu a anwo ne nufu a wɔannum ano!’+ 30  Ɛnna wobefi ase aka akyerɛ mmepɔw sɛ, ‘Mummegu yɛn so!’ ne nkoko sɛ, ‘monkata yɛn so!’+ 31  Efisɛ bere a dua no yɛ dumono no na wɔreyɛ eyi a, ɛnde sɛ ewu a dɛn na ebesi?”+ 32  Ná wɔde mmarima baanu bi a wɔyɛ nnebɔneyɛfo nso aka ne ho a wɔrekokum wɔn.+ 33  Bere a woduu baabi a wɔfrɛ hɔ Tikora no,+ wɔbɔɔ ɔne nnebɔneyɛfo no asɛndua mu wɔ hɔ, obiako wɔ ne nifa na obiako wɔ ne benkum.+ 34  [[Na Yesu kae sɛ: “Agya fa firi+ wɔn efisɛ wonnim nea wɔreyɛ.”]] Bio nso, wɔbɔɔ ntonto kyɛɛ ne ntade.+ 35  Na nkurɔfo no gyina hwɛe.+ Na atumfoɔ no dii ne ho fɛw kae sɛ: “Ogyee afoforo; sɛ oyi ne Kristo a ofi Onyankopɔn, Nea Wɔapaw no no a,+ ma onnye+ ne ho.” 36  Asraafo no mpo dii ne ho agoru,+ na wɔbaa ne nkyɛn de nsa nyinyanyinya maa no+ 37  kae sɛ: “Sɛ wone Yudafo hene no a, gye wo ho.” 38  Wɔde nkyerɛwde bi nso bɔɔ n’atifi sɛ: “Oyi ne Yudafo hene no.”+ 39  Na nnebɔneyɛfo a wɔasɛn wɔn no mu biako fii ase kasa tiaa+ no sɛ: “Wone Kristo no, anaa ɛnyɛ wo a? Gye wo ho ne yɛn.” 40  Na nea ɔka ho no buaa no kaa n’anim sɛ: “Enti wunsuro Onyankopɔn koraa bere a seesei wowɔ atemmu koro no ara mu yi?+ 41  Yɛn de, ɛfata yɛn, efisɛ nea yɛyɛe so akatua na yɛn nsa aka yi; na oyi de, ɔnyɛɛ biribiara a ɛmfa kwan mu.”+ 42  Na ɔtoaa so kae sɛ: “Yesu, sɛ woba w’ahenni mu a, kae me.”+ 43  Na ɔka kyerɛɛ no sɛ: “Nokwarem mise wo nnɛ sɛ, wobɛka me ho+ wɔ Paradise.”+ 44  Efi dɔn a ɛto so asia* rekɔ no, esum duruu asase so nyinaa kosii dɔn a ɛto so akron,*+ 45  efisɛ owia ammɔ; afei kronkronbea hɔ ntwamutam+ no mu suan wɔ mfinimfini.+ 46  Na Yesu de nne kɛse teɛɛm sɛ: “Agya, wo nsam na mede me honhom hyɛ.”+ Ɔkaa eyi no ogyaa mu.+ 47  Nea ɔsraani panyin no hui nti, ofii ase hyɛɛ Onyankopɔn anuonyam sɛ: “Ampa, na ɔbarima yi yɛ treneeni.”+ 48  Na bere a nnipakuw a wɔahyiam rehwɛ nea ɛrekɔ so no nyinaa huu nea asi no, wofii ase bobɔɔ wɔn kokom fii hɔ kɔe. 49  Bio nso, na wɔn a wonim no no nyinaa gyinagyina akyiri.+ Ná mmea a wodii n’akyi fii Galilea no nso gyinagyina hɔ rehwɛ eyinom.+ 50  Na hwɛ! ɔbarima bi a wɔfrɛ no Yosef, Bagua no muni a ɔyɛ onipa pa na ɔteɛ+ 51  saa ɔbarima yi ampene pɔw a wɔbɔe ne wɔn adeyɛ no so+—ná ofi Yudafo kurow Arimatea mu, na na ɔretwɛn Onyankopɔn ahenni;+ 52  saa ɔbarima yi kɔɔ Pilato nkyɛn kɔsrɛɛ Yesu amu.+ 53  Na oyii+ no de nwera pa kyekyeree no, na ɔde no too ɔda+ a wɔatwa wɔ ɔbo mu a onipa biara nnaa mu da mu.+ 54  Afei na ɛyɛ Ahoboaboa da,+ na homeda+ hann no reba. 55  Na mmea a wɔne no fi Galilea bae no dii akyi kɔhwɛɛ ɔda+ no ne sɛnea wɔde n’amu no too mu;+ 56  na wɔsan kosiesiee aduhuam ne ngo huamhuam.+ Nanso wɔhomee homeda+ no sɛnea mmara no kyerɛ.

Ase Hɔ Nsɛm

Bɛyɛ awia 12.
Bɛyɛ awia nnɔn 3.