Kɔ emu nsɛm afã hɔ

Kɔ emu nsɛm afã hɔ

Yehowa Adansefo

Yi kasa a wopɛ Twi

Luka 21:1-38

21  Na ɔmaa n’ani so no, ohui sɛ adefo no de wɔn akyɛde regu sika nnaka no mu.+  Afei ohui sɛ okunafo hiani bi de nkaprɛ mma abien* a ɛnsom bo ahe biara abegu mu wɔ hɔ,+  na ɔkae sɛ: “Nokwarem mise mo sɛ, ɛwom sɛ okunafo yi yɛ ohiani de, nanso nea ɔde agu mu no sen wɔn nyinaa de.+  Efisɛ akyɛde a eyinom nyinaa de abegu mu no fi nea wɔanya ma aboro so mu, na ɔbea yi de, ofi ne hia mu de n’asetenade a ɔwɔ nyinaa abegu mu.”+  Akyiri yi, bere a ebinom reka asɔrefie no ho asɛm sɛnea wɔde abo pa ne nneɛma a wɔahyira so ahyehyɛ no,+  ɔkae sɛ: “Nneɛma a muhu yi, nna bi reba a wɔrennyaw ɔbo wɔ ɔbo so wɔ ha a wonnwiriw ngu fam.”+  Ɛnna wobisaa no sɛ: “Ɔkyerɛkyerɛfo, bere bɛn koraa na eyinom bɛba mu, na dɛn na ɛbɛyɛ bere a etwa sɛ nneɛma yi ba no ho sɛnkyerɛnne?”+  Ɔkae sɛ: “Monhwɛ yiye na wɔannaadaa mo;+ efisɛ nnipa bebree de me din bɛba abɛka sɛ, ‘Mene no,’ na ‘Bere a wɔahyɛ no abɛn.’+ Munnni wɔn akyi.  Bio nso, sɛ mote ɔko ne sakasaka a, mommmɔ hu.+ Na etwa sɛ eyinom di kan sisi, nanso awiei no remma wɔ hɔ ara.” 10  Afei ɔtoaa so ka kyerɛɛ wɔn sɛ: “Ɔman bɛsɔre atia ɔman+ na ahenni atia ahenni;+ 11  na asasewosow akɛse bɛba, na ɔyaredɔm ne aduankɔm+ bɛba mmeaemmeae; na ahude bɛba na nsɛnkyerɛnne akɛse afi soro aba.+ 12  “Nanso ansa na eyinom nyinaa bɛba no, nkurɔfo de wɔn nsa bɛka mo na wɔataa+ mo, de mo akɔ hyia adan mu ne afiase, atwe mo akɔ ahene ne amradofo anim me din nti.+ 13  Ɛbɛdan adansedi ama mo.+ 14  Enti momma ɛntena mo koma mu sɛ morenni kan nnwinnwen sɛnea mubeyi mo ho ano,+ 15  na mɛma mo ano ne nyansa a wɔn a wɔsɔre tia mo nyinaa ntumi nnyina ano anaa wɔmmɔ ngu.+ 16  Bio nso, awofo+ ne nuabarimanom ne abusuafo ne nnamfonom mpo beyi mo ama, na wobekum mo mu binom;+ 17  na me din nti nnipa nyinaa bɛtan mo.+ 18  Nanso mo ti nhwi+ biako mpo renyera da. 19  Sɛ munya boasetɔ a, mubenya mo kra.+ 20  “Afei nso, sɛ muhu sɛ asraafodɔm atwa Yerusalem ho ahyia a,+ ɛnde munhu sɛ n’amamfoyɛ abɛn.+ 21  Afei momma wɔn a wɔwɔ Yudea mfi ase nguan nkɔ mmepɔw so, na momma wɔn a wɔwɔ kurow no mu no mfi mu nkɔ, na mommma wɔn a wɔwɔ nkuraase no mmma mu;+ 22  efisɛ eyi yɛ aweredi nna, sɛnea ɛbɛyɛ a nea wɔakyerɛw nyinaa bɛba mu.+ 23  Nna no mu no, mmea a wɔanyinsɛn ne wɔn a wɔma nufu nnue!+ Na ahohia kɛse bɛba asase no so na abufuw aba nkurɔfo yi so; 24  na wɔbɛtotɔ nkrante ano na wɔafa wɔn nnommum akɔ amanaman nyinaa mu;+ na amanaman no betiatia Yerusalem so, kosi sɛ amanaman mmere a wɔahyɛ+ no bewie du. 25  “Bio nso, nsɛnkyerɛnne bɛba owia+ ne ɔsram ne nsoromma so, na amanaman ho ayeraw wɔn asase so a wɔrenhu nea wɔnyɛ esiane ɛpo+ a ɛrehuru na ɛrebu fa so+ nti, 26  na ehu+ ne nneɛma a ɛreba asase so+ no bɛma nnipa atotɔ piti; efisɛ wɔbɛwosow ɔsoro ahoɔden.+ 27  Na afei wobehu sɛ onipa Ba+ no nam omununkum mu de tumi ne anuonyam kɛse reba.+ 28  Na sɛ nneɛma yi fi ase sɛ ɛresisi a, monsɔre nnyina na momma mo ti so, efisɛ mo gye rebɛn.” 29  Enti, ɔmaa wɔn mfatoho bi sɛ: “Monhwɛ borɔdɔma dua ne nnua a aka nyinaa:+ 30  Sɛ enya fefɛw na mohwɛ a, muhu sɛ ahohuru bere abɛn.+ 31  Saa ara na mo nso sɛ muhu sɛ saa nneɛma yi resisi a, munhu sɛ Onyankopɔn ahenni no abɛn.+ 32  Nokwarem mise mo sɛ saa awo ntoatoaso yi rentwam da kosi sɛ nneɛma nyinaa bɛba mu.+ 33  Ɔsoro ne asase betwam,+ nanso me nsɛm rentwam da.+ 34  “Na monhwɛ mo ho so yiye na adidi mmoroso ne asanom ntraso+ ne asetena mu dadwen+ anhyɛ mo koma so da, na da no ammɛto mo mpofirim+ 35  te sɛ afiri.+ Efisɛ ɛbɛba wɔn a wɔtete asase so baabiara no nyinaa so.+ 36  Enti, monkɔ so nwɛn,+ na monsrɛ+ bere nyinaa na moatumi aguan nneɛma a etwa sɛ esisi yi nyinaa, na moatumi agyina onipa Ba no anim.”+ 37  Enti sɛ edu anɔpa a, ɔkyerɛkyerɛ asɔrefie hɔ,+ na edu anadwo a, opue kɔtena bepɔw a wɔfrɛ no Ngo Bepɔw no so.+ 38  Na nkurɔfo+ no nyinaa ba ne nkyɛn wɔ asɔrefie hɔ anɔpahema betie no.

Ase Hɔ Nsɛm

Nea ɛkyerɛ ankasa ne “lepta abien,” da koro akatua nkyem aduosia anan mu biako.