Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Luka 17:1-37

17  Afei ɔka kyerɛɛ n’asuafo no sɛ: “Nea ɛbɛyɛ biara hintiduato bɛba.+ Nanso nea ɛnam no so bɛba no nnue!+  Anka eye ma no sɛ wɔde owiyammo bɛsɛn ne kɔn mu akɔtow no ato po mu,+ sen sɛ ɔbɛto nketewa yi mu biako hintidua.+  Momma mo ani mmra mo ho so. Sɛ wo nua yɛ bɔne bi a ka n’anim,+ na sɛ onu ne ho a fa firi no.+  Sɛ mpo ɔyɛ wo bɔne mpɛn ason da koro na ɔsan ba wo nkyɛn mpɛn ason ka sɛ, ‘Manu me ho’ a, fa firi no.”+  Na asomafo no ka kyerɛɛ Awurade sɛ: “Ma yɛn gyidi nyɛ kɛse.”+  Na Awurade kae sɛ: “Sɛ mowɔ gyidi a ne kɛse te sɛ sinapi aba a, anka mobɛka akyerɛ saa sikamino dua yi sɛ, ‘Tutu na kosi po mu!’ na anka ebetie mo.+  “Mo mu hena na ɔwɔ akoa a ɔrefuntum asase anaasɛ ɔrehwɛ mmoa, na sɛ ofi afuw mu ba a ɔbɛka akyerɛ no sɛ, ‘Yɛ ntɛm bra bɛtena adidipon ho’?  Mmom no, so ɔrenka nkyerɛ no sɛ, ‘Siesie biribi ma minni anwummere yi, na bɔ wo ho so som me kosi sɛ medidi anom awie, na ɛno akyi no wubetumi adidi anom’?  Ɔbɛda akoa no ase sɛ wayɛ nea wahyɛ no no anaa? 10  Enti mo nso, sɛ moyɛ nea wɔahyɛ mo nyinaa wie a, monka sɛ, ‘Yɛyɛ nkoa a mfaso nni yɛn so.+ Nea ɛsɛ sɛ yɛyɛ ara na yɛayɛ no.’” 11  Na ɛbae sɛ ɔrekɔ Yerusalem no ɔfaa Samaria ne Galilea.+ 12  Na ɔreyɛ adu akuraa bi ase no, mmarima akwatafo du huu no,+ nanso wɔsɔre gyinaa akyirikyiri. 13  Na wɔmaa wɔn nne so kae sɛ: “Yesu, Ɔkyerɛkyerɛfo, hu yɛn mmɔbɔ!”+ 14  Na ohuu wɔn no ɔka kyerɛɛ wɔn sɛ: “Monkɔ na momfa mo ho nkɔkyerɛ asɔfo no.”+ Na bere a wɔrekɔ no wɔn ho fii.+ 15  Bere a wɔn mu biako hui sɛ ne ho asan no no, ɔsan bae de nne kɛse hyɛɛ Onyankopɔn anuonyam.+ 16  Na ɔde n’anim butuw Yesu nan ase+ daa no ase; na ɔyɛ Samariani.+ 17  Yesu buae sɛ: “Ɛnyɛ du na wɔn ho fii? Na baakron a wɔaka no wɔ he? 18  Enti wɔanhu wɔn mu biara a wasan n’akyi de anuonyam rebrɛ Onyankopɔn sɛ ɔbarima a ofi ɔman foforo mu yi?” 19  Ɛnna ɔka kyerɛɛ no sɛ: “Sɔre na kɔ; wo gyidi ama wo ho asan wo.”+ 20  Na bere a Farisifo no bisaa no bere a Onyankopɔn ahenni bɛba no,+ obuaa wɔn kae sɛ: “Onyankopɔn ahenni no remma mma wonhu no pefee, 21  na wɔrenka nso sɛ ‘Hwɛ ha!’ anaasɛ ‘Ɛhɔ!’+ Efisɛ Onyankopɔn ahenni no wɔ mo mfinimfini.”+ 22  Afei ɔka kyerɛɛ asuafo no sɛ: “Nna bi bɛba a mobɛpɛ sɛ muhu onipa Ba no nna no mu biako nanso morenhu.+ 23  Na nnipa bɛka akyerɛ mo sɛ, ‘Monhwɛ hɔ!’+ anaasɛ ‘Monhwɛ ha!’ Monnkɔ na munnni wɔn akyi.+ 24  Na sɛnea anyinam+ ma ne hann hyerɛn fi ɔsoro ase fã bi kɔ ɔsoro ase fã foforo no, saa ara na onipa Ba+ no bɛyɛ. 25  Nanso nea edi kan no, ɛsɛ sɛ ohu amane bebree na awo ntoatoaso yi po no.+ 26  Bio nso, sɛnea ɛyɛe wɔ Noa nna no mu no,+ saa ara na ɛbɛyɛ wɔ onipa Ba no nna no nso mu:+ 27  na wodidii, wɔnomee, mmarima warewaree, wɔde mmea memaa aware, kosii da a Noa kɔhyɛn adaka no mu na nsuyiri no ba bɛsɛee wɔn nyinaa no.+ 28  Saa ara na ɛyɛe wɔ Lot nna no mu:+ wodidii, wɔnomee, wɔtɔe, wɔtɔnee, woduae, wosisii adan. 29  Na da a Lot fii Sodom no, ogya ne sufre tɔ fii soro bɛsɛee wɔn nyinaa.+ 30  Saa ara na ɛbɛyɛ da a wobeyi onipa Ba no adi no.+ 31  “Saa da no, mma onipa a ɔwɔ ɔdan atifi a ne nneɛma wɔ fie hɔ no nnsi fam mmmɛfa, na onipa a ɔwɔ afuw mu no, mma ɔno nso nnsan mmmɛfa nneɛma a ɛwɔ akyi no. 32  Monkae Lot yere no.+ 33  Obiara a ɔhwehwɛ sɛ ɔbɛkora ne kra so no, ɔbɛhwere, na obiara a ɔbɛhwere no bɛkora so.+ 34  Mise mo sɛ, saa anadwo no mmarima baanu bɛda mpa biako so; wɔbɛfa obiako akɔ na wɔagyaw nea ɔka ne ho no.+ 35  Mmea baanu bɛyam ade wɔ owiyammo koro so; wɔbɛfa obiako akɔ na wɔagyaw nea ɔka ne ho no.”+ 36  —— 37  Enti wobua see no sɛ: “Awurade, ɛhe?” Ɔka kyerɛɛ wɔn sɛ: “Nea afunu wɔ no,+ ɛhɔ ara nso na akɔre bɛboa wɔn ho ano.”+

Ase Hɔ Nsɛm