Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Luka 16:1-31

16  Afei ɔtoaa so ka kyerɛɛ asuafo no nso sɛ: “Na ɔdefo bi wɔ hɔ a ɔwɔ ofiehwɛfo+ bi, na wɔkaa ne ho asɛm kyerɛɛ no sɛ ɔyɛ n’agyapade basabasa.+  Enti ɔfrɛɛ no ka kyerɛɛ no sɛ, ‘Dɛn na mete wɔ wo ho yi? Bebu wo fiehwɛ adwuma no ho akontaa,+ efisɛ wuntumi nhwɛ ofie no so bio.’  Ɛnna ofiehwɛfo no ka kyerɛɛ ne ho sɛ, ‘Dɛn na menyɛ, bere a me wura+ rebegye me fiehwɛ adwuma afi me nsam yi? Me ho nyɛ den pii sɛ metu fam, mefɛre nso sɛ mɛsrɛsrɛ ade.  Ɛhẽẽ! Minim nea mɛyɛ a sɛ woyi me adi fi ofiehwɛ adwuma no mu a, nkurɔfo begye me akɔ wɔn afie.’+  Na ɔfrɛɛ wɔn a wɔde ne wura ka no mu biara baa ne nkyɛn bisaa nea odi kan no sɛ, ‘Wode me wura ka ahe?’  Ɔkae sɛ, ‘Ngo bat susuhina ɔha.’ Ɔka kyerɛɛ no sɛ, ‘Gye wo nhyehyɛe nhoma no na tena ase kyerɛw aduonum ntɛm ara.’  Afei, obisaa ɔfoforo sɛ, ‘Wo nso, wode ka ahe?’ Ɔkae sɛ, ‘Awi mmɔtɔ ɔha.’* Ɔka kyerɛɛ no sɛ, ‘Gye wo nhyehyɛe nhoma no na kyerɛw aduɔwɔtwe.’  Ɛwom sɛ ofiehwɛfo no nteɛ de, nanso ne wura no kamfoo no, efisɛ ɔde n’adwene yɛɛ adwuma;+ na wiase nhyehyɛe yi mma ani atew wɔ wɔn ankasa awo ntoatoaso yi mu sen hann mma.+  “Bio nso, mise mo sɛ, momfa ahonyade a ɛnteɛ+ so nnya nnamfo,+ na sɛ ɛsa a, wɔagye mo akɔ daa tenabea.+ 10  Onipa a odi ade ketewa mu nokware no di pii mu nokware nso, na onipa a ɔnteɛ wɔ ade ketewa mu no nteɛ wɔ pii mu nso.+ 11  Enti sɛ moanni nokware wɔ ahonyade a ɛnteɛ mu a, hena na ɔde nea ɛyɛ nokware bɛhyɛ mo nsa?+ 12  Na sɛ moanni nokware wɔ nea ɛyɛ afoforo de mu a,+ hena na ɔde mo ankasa de bɛma mo? 13  Ofie somfo biara nni hɔ a obetumi asom awuranom baanu; efisɛ, gye sɛ ɔtan obiako na ɔdɔ obiako, anaasɛ ɔbata obiako ho na obu obiako no animtiaa. Muntumi nsom Onyankopɔn ne Ahonyade.”+ 14  Afei nso na Farisifo a wɔyɛ sikanibere no retie eyinom nyinaa, na wofii ase dii ne ho fɛw.+ 15  Enti ɔka kyerɛɛ wɔn sɛ: “Mo na mubu mo ho bem nnipa anim,+ nanso Onyankopɔn nim mo koma mu;+ efisɛ nea ɛyɛ kokuroo wɔ nnipa anim no yɛ akyide wɔ Onyankopɔn ani so.+ 16  “Mmara no ne Adiyifo no tenaa hɔ besii Yohane so.+ Efi hɔ no, wɔreka Onyankopɔn ahenni no ho asɛm sɛ asɛmpa, na onipa biara yere ne ho wɔ ho.+ 17  Nokwarem no, ɛyɛ mmerɛw sɛ ɔsoro ne asase betwam akɔ+ sen sɛ Mmara no mu nkyerɛwde no bi ho nsensanee+ biako bɛtɔ fam.+ 18  “Obiara a obegyaa ne yere aware foforo no asɛe aware, na nea ɔbɛware ɔbea a ne kunu agyae no no asɛe aware.+ 19  “Ná onipa bi+ yɛ ɔdefo, na ɔtaa hyɛ atade kɔkɔɔ ne nwera, na daa ɔde afɛfɛde gye n’ani.+ 20  Ná wɔtaa de ɔdesrɛfo bi a wɔfrɛ no Lasaro a ne ho nyinaa atutu akuru kɔtena n’aboboano, 21  na ne kɔn dɔe sɛ ɔde nneɛma a efi ɔdefo no adidipon so gu fam no hyɛ ne yafunu mã. Afei nso na akraman bɛtaforo n’akuru no mu. 22  Na bere bi akyi no, ɔdesrɛfo no wui+ na abɔfo faa no kɔɔ Abraham+ kokom.+ “Ɔdefo no nso wui+ ma wosiee no. 23  Na ɔmaa n’ani so wɔ Adamoa* mu no, na ɔwɔ ahoyeraw mu,+ na ohuu Abraham wɔ akyirikyiri a Lasaro wɔ ne kokom. 24  Enti ɔfrɛɛ no kae sɛ, ‘Agya Abraham,+ hu me mmɔbɔ na soma Lasaro ma ɔmfa ne nsateaa ano mmɔ nsu mu na ɔmfa mmedwudwo me tɛkrɛma,+ efisɛ me ho yeraw me wɔ ogyaframa yi mu.’+ 25  Na Abraham kae sɛ, ‘Ɔba, kae sɛ wote ase no wunyaa nneɛma pa a wopɛ nyinaa, na Lasaro de, nneɛma bɔne na onyae. Nanso afei, ɔrenya awerɛkyekye na wowɔ ahoyeraw mu.+ 26  Na eyinom nyinaa akyi no, wɔde oku+ kɛse ato yɛne mo ntam,+ ma enti wɔn a wɔpɛ sɛ wofi ha ba mo nkyɛn no ntumi, na wɔn a wɔpɛ sɛ wofi hɔ ba yɛn nkyɛn no nso ntumi.’+ 27  Na ɔkae sɛ, ‘Ɛnde mesrɛ wo, agya, soma no ma ɔnkɔ me papa fie, 28  na mewɔ anuanom baanum, na onkodi wɔn adanse yiye, na wɔn nso amma saa ahoyeraw mu ha.’ 29  Na Abraham kae sɛ, ‘Wɔwɔ Mose+ ne Adiyifo+ no; ma wontie eyinom.’+ 30  Ɛnna ɔkae sɛ, ‘Dabi, agya Abraham, mmom sɛ obi fi awufo mu kɔ wɔn nkyɛn a na wɔbɛsakra.’ 31  Na ɔka kyerɛɛ no sɛ, ‘Sɛ wɔantie Mose+ ne Adiyifo no a, saa ara na sɛ obi sɔre fi awufo mu a wɔrennye nni.’”

Ase Hɔ Nsɛm

Nea ɛkyerɛ ankasa ne “cor ɔha,” a cor biara wom lita 220.
Anaa “Hades.” Nea ɛkyerɛ ne adesamma adamoa. Hwɛ Nkekaho 4.