Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Luka 15:1-32

15  Na towgyefo+ ne nnebɔneyɛfo+ nyinaa kɔɔ so baa ne nkyɛn betiee no.  Enti Farisifo ne akyerɛwfo no nyinaa kɔɔ so nwiinwii kae sɛ: “Onipa yi gye nnebɔneyɛfo na ɔne wɔn didi.”+  Na ɔmaa wɔn mfatoho yi:  “Mo mu onipa bɛn na ɔwɔ nguan ɔha, na emu biako yera a, ɔrennyaw aduɔkron akron no wɔ sare so nkɔhwehwɛ nea wayera no nkosi sɛ obehu no?+  Na bere a wahu no no, ɔde no bɔ ne kɔn ho na odi ahurusi.+  Na odu fie a ɔfrɛfrɛ ne nnamfonom ne ne yɔnkonom boa ano ka kyerɛ wɔn sɛ: ‘Mo ne me nni ahurusi, efisɛ mahu me guan a ɔyerae no.’+  Enti mise mo sɛ anigye pii bɛba ɔsoro wɔ ɔdebɔneyɛfo biako a wasakra+ ho sen treneefo aduɔkron akron a wonhia adwensakra.+  “Anaasɛ ɔbea bɛn na ɔwɔ drakma du na sɛ drakma biako yera a, ɔrensɔ kanea mpra ne fie na ɔnhwehwɛ no yiye nkosi sɛ obehu?  Na sɛ ohu a, ɔfrɛfrɛ mmea a wɔyɛ ne nnamfo ne n’afipamfo boa ano ka sɛ, ‘Mo ne me nni ahurusi, efisɛ mahu me drakma a ɛyerae no.’ 10  Enti, mise mo sɛ, anigye ba Onyankopɔn abɔfo mu wɔ ɔdebɔneyɛfo biako a ɔsakra ho.”+ 11  Afei ɔkae sɛ: “Na ɔbarima bi wɔ mma baanu.+ 12  Na wɔn mu akumaa no ka kyerɛɛ ne papa sɛ, ‘Papa, fa agyapade no fã a ɛyɛ me dea ma me.’+ Na ɔkyɛɛ n’asetenade+ mu maa wɔn. 13  Akyiri yi, nna kakraa bi twaam no, ɔba kumaa no boaboaa nneɛma nyinaa ano na otuu kwan kɔɔ ɔman bi so wɔ akyirikyiri, na okobuu ahohwibra de sɛee n’agyapade no nyinaa.+ 14  Bere a ɔsɛee biribiara no, ɔkɔm kɛse bi sii ɔman no mu baabiara, na ne ho fii ase kyeree no. 15  Afei de otu taree ɔman no muni biako, na ɔde no kɔɔ n’asase so sɛ ɔnkɔhwɛ ne mprako.+ 16  Ná ne kɔn taa dɔ sɛ ɔde aduan a na mprako no di no bi bɛhyɛ ne yafunu mã, na obiara amma no hwee.+ 17  “Bere a n’ani baa ne ho so no, ɔkae sɛ: ‘Me papa apaafo no mu baahe na paanoo mmuu wɔn so, ɛnna ɔkɔm rekum me wɔ ha yi! 18  Mɛsɔre akɔ+ me papa nkyɛn akɔka akyerɛ no sɛ: “Papa, mayɛ bɔne atia ɔsoro ne wo.+ 19  Memfata sɛ wofrɛ me wo ba bio. Yɛ me w’apaafo no mu biako.”’ 20  Enti ɔsɔree na ɔkɔɔ ne papa nkyɛn. Bere a ɔda so ara wɔ akyirikyiri no, ne papa huu no na ɔyɛɛ no mmɔbɔ, na otuu mmirika kosoo ne kɔn mu few n’ano. 21  Ɛnna ɔba no ka kyerɛɛ no sɛ, ‘Papa, mayɛ bɔne atia ɔsoro ne wo.+ Memfata sɛ wofrɛ me wo ba bio. Yɛ me w’apaafo no mu biako.’+ 22  Na papa no ka kyerɛɛ ne nkoa no sɛ, ‘Monyɛ ntɛm! momfa atade tenten a edi mu mmra mmɛhyɛ+ no, na momfa pɛtea+ nhyɛ ne nsa na momfa mpaboa nhyɛ ne nan. 23  Na momfa nantwi ba a wadɔ srade+ no mmra mmekum no mma yenni na yennye yɛn ani, 24  efisɛ me ba yi wui na wasan aba nkwa+ mu; ɔyerae na wɔahu no.’ Na wofii ase gyee wɔn ani. 25  “Saa bere yi na ne ba panyin+ no wɔ afuw mu; na ɔreba a ɔbɛn fie no ɔtee sɛ nnwom ne asaw rekɔ so. 26  Enti ɔfrɛɛ nkoa no mu biako na obisaa no nea eyinom kyerɛ. 27  Ɔka kyerɛɛ no sɛ, ‘Wo nua+ no aba, na wo papa+ akum nantwi ba a wadɔ srade no, efisɛ wanya no a ɔwɔ ahoɔden.’ 28  Na ne bo fuwii na wampɛ sɛ ɔkɔ mu. Afei ne papa pue bɛsrɛɛ no.+ 29  Obua see ne papa sɛ, ‘Mfe bebree ni na masom wo a mimmuu wo mmara so pɛnkoro mpo, nanso wommaa me abirekyi ba sɛ me ne me nnamfonom mfa nnye yɛn ani da.+ 30  Nanso wo ba+ a ɔne nguaman+ adi w’asetenade yi bae ara pɛ, woakum nantwi ba a wadɔ srade ama no.’+ 31  Ɛnna ɔka kyerɛɛ no sɛ, ‘Ɔba, wowɔ me nkyɛn bere nyinaa, na nea ɛwɔ me nyinaa yɛ wo de;+ 32  nanso ɛsɛ sɛ yɛma yɛn ani gye na yedi ahurusi, efisɛ wo nua yi wui na wasan aba nkwa mu, ɔyerae na wɔahu no.’”+

Ase Hɔ Nsɛm