Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Luka 13:1-35

13  Saa bere no ara na nnipa bi a wɔwɔ hɔ kaa sɛnea Pilato de Galileafo+ bi mogya fraa wɔn afɔrebɔ mu no ho asɛm kyerɛɛ no.  Enti obua see wɔn sɛ: “So mususuw sɛ na saa Galileafo yi yɛ abɔnefo+ sen Galileafo a aka nyinaa esiane amane a wohui yi nti?  Nokwarem no, mise mo sɛ ɛnte saa; nanso sɛ moansakra a, saa ara na wɔbɛsɛe mo nyinaa.+  Anaa nnipa dunwɔtwe a Siloa aban no bu guu wɔn so kunkum wɔn no, so mususuw sɛ na wɔyɛ abɔnefo* sen nnipa a wɔtete Yerusalem nyinaa?  Nokwarem no, mise mo sɛ ɛnte saa; nanso sɛ moansakra a, wɔbɛsɛe mo nyinaa saa ara.”+  Afei ɔtoaa so kaa mfatoho yi: “Ná ɔbarima bi wɔ borɔdɔma si ne bobeturo mu,+ na ɔbae bɛhwehwɛɛ aduaba wɔ so,+ nanso wannya bi.+  Enti ɔka kyerɛɛ bobeturo hwɛfo no sɛ, ‘Mfe abiɛsa+ ni a maba abɛhwehwɛ aduaba wɔ borɔdɔma yi so, nanso mannya bi. Twa kyene!+ Dɛn nti koraa na ɛsɛ sɛ egye asase no sɛe no?’  Obua see no sɛ, ‘Owura, gyae no+ afe yi nso, kosi sɛ metutu ase na mede sumina agu ase;  na sɛ ɛsow aba daakye a ɛyɛ asɛmpa, na sɛ ansow a, ɛnde ɛsɛ sɛ wutwa kyene.’”+ 10  Afei na ɔrekyerɛkyerɛ wɔ hyiadan no biako mu homeda. 11  Na hwɛ! ɔbea bi a ɔwɔ mmerɛwyɛ honhom+ mfe dunwɔtwe wɔ hɔ, na ne mu akuntun a ontumi mma ne mu so koraa. 12  Bere a Yesu huu no no, ɔfrɛɛ no see no sɛ: “Ɔbea, wɔayi+ wo afi wo mmerɛwyɛ mu.” 13  Na ɔde ne nsa guu no so; na amonom hɔ ara ɔteɛɛ ne mu,+ na ofii ase hyɛɛ Onyankopɔn anuonyam. 14  Nanso hyiadan mu panyin a n’ani abere sɛ Yesu asa yare homeda no, bua see nnipakuw no sɛ: “Nnansia na ɛsɛ sɛ wɔde yɛ adwuma,+ ɛno mu na mommra mma wɔnsa mo yare, na ɛnyɛ homeda.”+ 15  Nanso, Awurade buaa no sɛ: “Nyaatwomfo,+ so mo mu biara nsan ne nantwi anaa afurum mfi ebuw mu homeda nkɔma no nsu nnom?+ 16  Ɛnde so ɛmfata sɛ ɔbea yi a ɔyɛ Abraham+ babea a Satan akyekyere no mfe dunwɔtwe no, wɔsan no fi mpokyerɛ yi mu homeda?” 17  Na ɔkaa eyinom no, n’atamfo no nyinaa ani wui;+ nanso nnipakuw no nyinaa fii ase dii ahurusi wɔ anuonyanne a ɔyɛe no nyinaa ho.+ 18  Ɛnna ɔtoaa so kae sɛ: “Onyankopɔn ahenni te dɛn, na dɛn ho na mede bɛto?+ 19  Ɛte sɛ sinapi aba a obi duae wɔ ne turo mu, na enyini bɛyɛɛ dua, na ɔsoro nnomaa+ tenatenaa ne mmaa so.”+ 20  Na ɔkae bio sɛ: “Dɛn ho na mede Onyankopɔn ahenni bɛto? 21  Ɛte sɛ mmɔkaw a ɔbea bi de fraa esiam susukora akɛse abiɛsa mu kosii sɛ ne nyinaa kawee.”+ 22  Na otutuu akwan kɔɔ nkurow mu ne nkuraa ase kyerɛkyerɛe na ɔtoaa n’akwantu no so kɔɔ Yerusalem.+ 23  Afei obi bisaa no sɛ: “Awurade, wɔn a wobegye wɔn no yɛ kakraa bi anaa?”+ Ɔka kyerɛɛ wɔn sɛ: 24  “Monyere+ mo ho denneennen nhyɛn ɔpon teateaa no mu,+ efisɛ mise mo sɛ nnipa pii bɛhwehwɛ sɛ wɔhyɛn mu nanso wɔrentumi;+ 25  na sɛ ofiewura no nya sɔre to pon no mu a, afei mubegyina abɔnten abɔ pon no mu aka sɛ, ‘Owura, bue yɛn.’+ Nanso obebua ase mo sɛ, ‘Minnim nea mufi.’+ 26  Na mubefi ase aka sɛ, ‘Yedidii na yɛnomee wɔ w’anim, na wokyerɛkyerɛe wɔ yɛn mmɔnten so.’+ 27  Nanso obebue n’ano aka akyerɛ mo sɛ, ‘Minnim nea mufi. Mumfi me so nkɔ, mo a moyɛ nea ɛnteɛ nyinaa!’+ 28  Ɛhɔ na mubesu na moatwɛre mo sẽ,+ bere a muhu Abraham ne Isak ne Yakob ne adiyifo no nyinaa wɔ Onyankopɔn ahenni mu,+ nanso mo de, wɔapam mo kɔ abɔnten no. 29  Bio nso, nkurɔfo befi apuei fam ne atɔe fam, atifi fam ne anafo fam aba,+ na wɔbɛtenatena adidii wɔ Onyankopɔn ahenni mu.+ 30  Na hwɛ! ebinom a wɔaka akyi bedi kan, na ebinom a wodi kan aka akyi.”+ 31  Ɛdɔn no ara mu no Farisifo bi ba bɛka kyerɛɛ no sɛ: “Fi adi fi ha kɔ, efisɛ Herode pɛ sɛ okum wo.” 32  Na ɔka kyerɛɛ wɔn sɛ: “Monkɔka nkyerɛ saa sakraman+ no sɛ, ‘Hwɛ! meretu adaemone na masa yare nnɛ ne ɔkyena, na da a ɛto so abiɛsa no mawie.’+ 33  Nanso, etwa sɛ misi kwan so nnɛ ne ɔkyena ne n’adekyee, efisɛ enni kwan sɛ wɔsɛe odiyifo bi wɔ baabiara sɛ Yerusalem.+ 34  Yerusalem, Yerusalem, nea okum+ adiyifo na osiw+ wɔn a wɔasoma wɔn ne nkyɛn abo—hwɛ mpɛn dodow ara a mepɛe sɛ meboaboa wo mma ano sɛnea akokɔbaatan boaboa ne mma ano hyɛ ne ntaban ase,+ nanso moampɛ!+ 35  Hwɛ! Wɔagyaw mo fie+ ama mo. Mise mo sɛ, morenhu me bio kosi sɛ mobɛka sɛ, ‘Nhyira ne nea ɔba Yehowa din mu!’”+

Ase Hɔ Nsɛm

Nea ɛkyerɛ ankasa ne “wɔde ka”