Kɔ emu nsɛm afã hɔ

Kɔ emu nsɛm afã hɔ

Yehowa Adansefo

Yi kasa a wopɛ Twi

Luka 10:1-42

10  Eyinom akyi no, Awurade paw afoforo aduɔson+ somaa wɔn baanu baanu+ dii n’anim kɔɔ kurow biara ne baabiara a na ɔno ankasa rebɛkɔ no.  Afei ɔka kyerɛɛ wɔn sɛ: “Nokwarem ni, otwa adwuma+ no sõ, nanso adwumayɛfo+ no sua. Enti monsrɛ+ otwa Wura no na ɔnsoma adwumayɛfo+ mmra ne twa no mu.  Monkɔ. Hwɛ! meresoma mo sɛ nguammaa+ akɔ mpataku mu.  Mommfa sika kotoku, anaa aduan bɔtɔ,+ anaa mpaboa, na munnnyina nnkyia+ obiara wɔ kwan so.  Baabiara a mobɛhyɛn ofie bi mu no, munni kan nka sɛ, ‘Asomdwoe mmra ofie yi so.’+  Na sɛ asomdwoe nipa bi wɔ hɔ a, mo asomdwoe bɛtena no so.+ Nanso sɛ ebi nni hɔ a, ɛbɛsan aba mo so.+  Enti montena saa ofie no mu,+ na munni na monnom nea wɔde bɛma no,+ efisɛ odwumayɛni akatua sɛ no.+ Munntu mmfi ofie mu nnkɔ ofie mu.+  “Afei nso, bere biara a mobɛhyɛn kurow bi mu na wogye mo no, munni nea wɔde besi mo anim no,  na monsa+ emu ayarefo no yare, na monkɔ so nka nkyerɛ wɔn sɛ, ‘Onyankopɔn ahenni+ no abɛn mo.’ 10  Nanso bere biara a mobɛhyɛn kurow bi mu a wonnye mo no,+ mumfi adi nkɔ n’atempɔn so na monka sɛ, 11  ‘Mo kurow yi mu mfutuma mpo a eguu yɛn nan ho no, yɛporoporow gu mo so.+ Nanso, momma ɛntena mo adwene mu sɛ Onyankopɔn ahenni no abɛn.’ 12  Mise mo sɛ saa da no ɛbɛyɛ mmerɛw ama Sodom+ asen saa kurow no. 13  “Due Korasin!+ Due Betsaida!+ efisɛ ahoɔdenne a wɔayɛ wɔ wo mu no, sɛ wɔyɛe wɔ Tiro ne Sidon a, anka wɔsakra tenaa atweaatam ne nsõ mu akyɛ.+ 14  Enti ɛbɛyɛ mmerɛw ama Tiro ne Sidon wɔ atemmu no mu asen mo.+ 15  Na wo Kapernaum, wɔbɛma wo so akɔ soro anaa?+ Adamoa*+ mu na wubesian akɔ! 16  “Nea otie+ mo no tie me nso. Na nea obu mo animtiaa no bu me nso animtiaa. Afei nso, nea obu me animtiaa no bu+ nea ɔsomaa me no nso animtiaa.” 17  Na aduɔson no de anigye san bae bɛkae sɛ: “Awurade, wo din a yɛde yɛ adwuma nti adaemone mpo brɛ wɔn ho ase+ ma yɛn.” 18  Ɛnna ɔka kyerɛɛ wɔn sɛ: “Mahu sɛ Satan fi soro ahwe ase+ dedaw sɛ anyinam. 19  Hwɛ! mama mo tumi a mode betiatia awɔ+ ne nkekantwɛre+ so, ne nea mode bedi ɔtamfo+ no tumi nyinaa so, na bɔne biara rento mo. 20  Nanso munnni eyi ho ahurusi, sɛ ahonhom abrɛ wɔn ho ase ama mo, na mmom munni ahurusi efisɛ wɔakyerɛw mo din+ wɔ soro.” 21  Ɛdɔn no ara mu no, anigye+ hyɛɛ no mã denam honhom kronkron so, na ɔkae sɛ: “Agya, ɔsoro ne asase Wura, miyi wo ayɛ wɔ baguam, efisɛ wode eyinom asie anyansafo+ ne animdefo, na woayi no adi akyerɛ nkokoaa. Yiw, O Agya, efisɛ na eyi ne ɔkwan a ɛsɔ w’ani. 22  M’Agya de nneɛma nyinaa ahyɛ me nsa,+ na obiara nnim onii a Ɔba no yɛ, gye Agya+ no; na obiara nnim onii a Agya no yɛ, gye Ɔba+ no ne nea ɔba no pɛ sɛ ɔda no adi kyerɛ no.” 23  Afei ɔdan ne ho kyerɛɛ n’asuafo no kae sɛ: “Anigye ne ani a ehu nneɛma a seesei muhu yi.+ 24  Na mise mo sɛ, adiyifo ne ahene bebree pɛe sɛ wohu+ nneɛma a seesei muhu yi nanso wɔanhu, wɔpɛe sɛ wɔte nsɛm a mote yi nanso wɔante.” 25  Afei, hwɛ! ɔbarima bi a onim Mmara+ no sɔree sɛ ɔresɔ no ahwɛ, na ɔkae sɛ: “Ɔkyerɛkyerɛfo, dɛn na sɛ meyɛ a menya daa nkwa?”+ 26  Ɔka kyerɛɛ no sɛ: “Dɛn na wɔakyerɛw wɔ Mmara no mu?+ Wokenkan no dɛn?” 27  Obuae sɛ: “‘Ɛsɛ sɛ wode wo koma nyinaa ne wo kra nyinaa ne w’adwene nyinaa dɔ Yehowa wo Nyankopɔn,’+ ne ‘wo yɔnko sɛ wo ho.’”+ 28  Ɔka kyerɛɛ no sɛ: “Woabua no yiye; ‘kɔ so yɛ eyi na wubenya nkwa.’”+ 29  Nanso, ɔbarima no pɛe sɛ obu ne ho bem nti, obisaa Yesu sɛ: “Hena paa ne me yɔnko?”+ 30  Yesu buae sɛ: “Ná ɔbarima bi fi Yerusalem resian akɔ Yeriko, na ɔkɔtɔɔ adwowtwafo mu ma wɔworɔw ne ho ntade bobɔɔ no, gyaw no hɔ kɔe a na watɔ beraw. 31  Afei, ɛbae sɛ na ɔsɔfo bi retwam saa kwan no so, nanso bere a ohuu no no, ɔfaa ɔkwan no fã baabi kɔe.+ 32  Saa ara na bere a Lewini bi nso duu hɔ a ohuu no no, ɔfaa ɔkwan no fã baabi kɔe.+ 33  Afei Samariani+ bi a ɔnam kwan no so retu kwan bɛtoo no, na ohuu no no, ɔyɛɛ no mmɔbɔ. 34  Enti ɔbɛn no kyekyeree n’akuru no hwiee ngo ne nsa guu so.+ Afei ɔde no tenaa n’ankasa aboa so de no kɔɔ ahɔhodan mu kɔhwɛɛ no. 35  Na ade kyee no oyii denare abien de maa ahɔhodan sohwɛfo no kae sɛ, ‘Hwɛ no, na ɛka biara a wobɛbɔ wɔ eyi akyi no, mesan ba a metua ama wo.’ 36  Baasa yi mu hena na wususuw sɛ wada ne ho adi sɛ ɔbarima a ɔkɔtɔɔ adwowtwafo mu no yɔnko?”+ 37  Ɔkae sɛ: “Nea ohuu no mmɔbɔ+ no.” Ɛnna Yesu ka kyerɛɛ no sɛ: “Kɔ na wo nso kɔyɛ+ saa ara.” 38  Afei bere a wɔrekɔ no, ɔkɔɔ akuraa bi ase. Ɛha na ɔbea bi a wɔfrɛ no Marta+ gyee no kɔɔ fie sɛ ɔhɔho. 39  Ná saa ɔbea yi wɔ onuabea bi nso a wɔfrɛ no Maria, na ɔno de ɔtenaa Awurade nan ase+ tiee n’asɛm no ara. 40  Nanso Marta de, na nnwuma bebree agye n’adwene.+ Enti ɔba bɛkae sɛ: “Awurade, wunhu sɛ me nuabea no agyaw me nkutoo na mereyɛ ade?+ Enti ka kyerɛ no na ɔmmɛka me ho mmoa me.” 41  Awurade bua see no sɛ: “Marta, Marta, wudwinnwen+ bebree na wode nneɛma pii haw wo ho.+ 42  Nanso, nneɛma kakraa bi+ na ehia, anaasɛ biako pɛ. Maria de, wapaw nea ɛyɛ papa,+ na wɔrennye mfi ne nsam.”

Ase Hɔ Nsɛm

Anaa “Hades.” Nea ɛkyerɛ ne adesamma adamoa. Hwɛ Nkekaho 4.