Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Leviticus 13:1-59

13  Yehowa ka kyerɛɛ Mose ne Aaron sɛ:  “Sɛ biribi besi obi honam ani na ɛhyɛ nsu anaa ne honam twintwam+ anaa ɛsoa na edidi ne honam mu ma ɛbɛyɛ sɛ kwata+ a, ɛsɛ sɛ wɔde no ba ɔsɔfo Aaron anaa ne mma asɔfo no mu biako anim.+  Ɛsɛ sɛ ɔsɔfo no hwɛ yare a ayɛ ne honam ani no.+ Sɛ nhwi a ɛwɔ beae a ɛhɔ asoa no ayɛ fitaa na ɛte sɛ nea ade a ahon no no adidi kɔ ne honam mu a, ɛnde ɛyɛ kwata. Ɔsɔfo no nhwɛ na ɔnkyerɛ sɛ ne ho ntew.  Nanso sɛ baabi a asoa no yɛ fitaa na ennidi nkɔɔ ne honam mu na ɛhɔ nhwi nyɛɛ fitaa a, ɔsɔfo no mfa ɔno nkutoo nkosie baabi+ nnanson.  Da a ɛto so ason no, ɔsɔfo no nhwɛ no na sɛ ohu sɛ ɛhɔ nhon bio a, ɛkyerɛ sɛ yare no ntrɛwee wɔ ne were mu, enti ɔsɔfo no nsan mfa no nsie+ nnanson.  “Da a ɛto so ason no, ɔsɔfo no nhwɛ no ne mprenu so, na sɛ ɛhɔ ahyew na ennidi nkɔɔ ne honam mu a, ɛnde ɔsɔfo no nkyerɛ sɛ ne ho tew. Ɛyɛ ntwintwamee bi kɛkɛ. Ɔnhoro n’atade na ne ho ntew.  Na sɛ ɔsɔfo no kyerɛ sɛ ne ho tew na akyiri yi ntwintwamee no trɛw wɔ ne honam ani a, ɔnsan mmra ɔsɔfo no anim+ ne mprenu so.  Ɔsɔfo no nhwɛ, na sɛ atrɛw honam no ani a, ɛnde ɔnkyerɛ sɛ ne ho ntew. Ɛyɛ kwata.+  “Sɛ kwata yɛ obi a, wɔmfa no mmra ɔsɔfo anim. 10  Ɔsɔfo no nhwɛ,+ na sɛ ohu sɛ nsoa fitaa bi asi ne honam ani na ɛhɔ nhwi ayɛ fitaa na ɛpae yɛ kuru+ a, 11  ɛyɛ kwatanini+ na ayɛ ne honam ani; ɔsɔfo no nkyerɛ sɛ ne ho ntew. Ɛnsɛ sɛ ɔde no kosie,+ efisɛ ne ho ntew. 12  Na sɛ ɔsɔfo no hwɛ na ohu sɛ kwata no apue afi were no mu na akata ɔyarefo no honam nyinaa, fi ne tirim kosi ne nan ase, 13  na ɔsɔfo no hu sɛ akata ne honam nyinaa a, ɛsɛ sɛ obu ɔyarefo no sɛ ne ho tew. Ne nyinaa adan fitaa, enti ne ho tew. 14  Nanso da a ebetu kuru no, ne ho ntew. 15  Ɔsɔfo no+ nhwɛ kuru no, na ɔnkyerɛ sɛ ne ho ntew. Ekuru no ho ntew. Ɛyɛ kwata.+ 16  Na sɛ kuru no wu ma hɔ yɛ fitaa a, ɔnsan nkɔ ɔsɔfo no hɔ. 17  Ɔsɔfo no nhwɛ no,+ na sɛ baabi a ɛyɛɛ kuru no adan fitaa a, ɛnde na ne ho tew, enti ɔsɔfo no mmu no sɛ ne ho tew. 18  “Na sɛ pɔmpɔ+ bɔ obi honam mu na ewu 19  na sɛ biribi fitaa bi ba pɔmpɔ no ananmu anaa ɛhɔ soa yɛ fitaa na anim dodow kakra a, ɔmfa ne ho nkɔkyerɛ ɔsɔfo no. 20  Sɛ ɔsɔfo no hwɛ+ na ɛte sɛ nea ade a ahon no no adidi kɔ ne honam mu na ɛhɔ nhwi ayɛ fitaa a, ɔsɔfo no nkyerɛ sɛ ne ho ntew. Ɛyɛ kwata na apue afi pɔmpɔ no mu. 21  Nanso sɛ ɔsɔfo no hwɛ na wanhu nhwi fitaa biara wɔ hɔ na nea ahon no no nso nnidi nkɔɔ honam no mu na ahyew a, ɔsɔfo no mfa ɔno nkutoo nkosie baabi+ nnanson. 22  Na sɛ efi ase trɛw ne honam ani a, ɔsɔfo no nkyerɛ sɛ ne ho ntew. Ɛyɛ yare bɔne. 23  Nanso sɛ ɛhɔ te sɛ nea ɛte na antrɛw a, ɛnde ɛyɛ pɔmpɔ no ara na ahon.+ Ɔsɔfo no nkyerɛ sɛ ne ho tew.+ 24  “Sɛ ogya hyew obi na kuru no anwu anwie na ɛhɔ hon ma anim dodow anaa ɛho nyinaa yɛ fitaa a, 25  ɔsɔfo no nhwɛ. Sɛ ɛba sɛ ɛhɔ nhwi adan fitaa na ɛte sɛ nea ade a ahon no no adidi kɔ ne honam mu a, ɛyɛ kwata na apue afi kuru no mu. Ɔsɔfo no nkyerɛ sɛ ne ho ntew, efisɛ kwata ayɛ no. 26  Nanso sɛ ɔsɔfo no hwɛ na wanhu nhwi fitaa biara wɔ hɔ na ennidi nkɔɔ honam no mu na ahyew a, ɛnde ɔsɔfo no mfa ɔno nkutoo nkosie baabi nnanson. 27  Da a ɛto so ason no, ɔsɔfo no nhwɛ no. Sɛ ohu sɛ yare no atrɛw ne honam ani a, ɔsɔfo no nkyerɛ sɛ ne ho ntew. Ɛyɛ kwata. 28  Nanso sɛ ɛhɔ te sɛ nea ɛte na ɛntrɛwee anaa ɛnsoae bio a, ɛkyerɛ sɛ kuru no na ahon kɛkɛ. Ɔsɔfo no nkyerɛ sɛ ne ho tew, efisɛ kuru no na ahon. 29  “Sɛ biribi bɛtɔ ɔbarima anaa ɔbea bi ti ho anaa n’abogye a, 30  ɛsɛ sɛ ɔsɔfo+ no hwɛ. Sɛ ɛte sɛ nea adidi kɔ ne honam mu na ɛhɔ nhwi adodow na bebree atutu a, ɔsɔfo no nkyerɛ sɛ ne ho ntew. Ɛyɛ yare na ama nhwi no atutu.+ Ɛyɛ ti anaa abogye kwata. 31  Nanso sɛ ɔsɔfo no hwɛ baabi a ɛhɔ nhwi atutu no na ohu sɛ yare no nnidi nkɔɔ honam no mu na nhwi tuntum biara nni hɔ a, ɛnde esiane nhwi no a atutu nti, ɔsɔfo no mfa ɔno nkutoo nkosie baabi+ nnanson.+ 32  Da a ɛto so ason no, ɔsɔfo no nsan nhwɛ yare no, na sɛ ɛhɔ nhwi no ntutu nkɔɔ akyiri, na nhwi nnodowee+ mmaa hɔ, na ɔyare no nnidi nkɔɔ honam no mu a, 33  ɛnde onyi ne ti nhwi anaa n’abogyesɛ nanso onnyi baabi a yare ama ɛhɔ nhwi atutu no.+ Na ɔsɔfo no mfa nea yare no ayɛ no no nkosie baabi nnanson bio. 34  “Afei da a ɛto so ason no, ɔsɔfo no nsan nhwɛ baabi a yare no ama ɛhɔ nhwi atutu no. Sɛ yare a ama ne nhwi atutu no ntrɛwee na ennidi nkɔɔ ne honam mu a, ɛnde ɔsɔfo no nkyerɛ sɛ ne ho tew.+ Ɔnhoro n’atade na ne ho ntew. 35  Nanso sɛ ɔsɔfo no ka sɛ ne ho tew na akyiri yi yare a ɛmaa ne nhwi tutui no trɛw kɔ mmeae foforo a, 36  ɔsɔfo+ no nsan nhwɛ no. Na sɛ ohu sɛ yare no atrɛw honam no ani a, ɛho nhia sɛ ɔhwɛ sɛ nhwi a adodow wɔ hɔ; nea ɛkyerɛ ara ne sɛ ne ho ntew. 37  Na sɛ ɔhwɛ na ohu sɛ nhwi no ntutu bio na nhwi tuntum afuw wɔ hɔ a, ɛkyerɛ sɛ yare no ase ahyew. Ne ho tew, enti ɔsɔfo no nkyerɛ sɛ ne ho tew.+ 38  “Na sɛ ade mfitamfitaa bi bɛtotɔ+ ɔbarima anaa ɔbea bi ho a, 39  ɔsɔfo+ no nhwɛ. Sɛ ohu sɛ ade mfitamfitaa a atotɔ ne ho no ani dum kakra a, ɛkyerɛ sɛ nea atotɔ ne honam ani no nyɛ hu. Ne ho tew. 40  “Sɛ ɔbarima bi ti so pa+ a, ɛyɛ tipae. Ne ho tew. 41  Sɛ ne ti so apa fi ne moma so kɔ ne mpampam a, ɛyɛ mpampam tipae. Ne ho tew. 42  Nanso sɛ biribi fitaa a adodow bɛtɔ mpampam tipae no mu anaa ne moma so a, ɛyɛ kwata na apue wɔ ne mpampam anaa ne moma so. 43  Ɛsɛ sɛ ɔsɔfo+ no hwɛ no, na sɛ ohu sɛ biribi fitaa a adodow na abɛtɔ ne mpampam anaa ne moma so te sɛ kwata a ɛwɔ ne honam mu a, 44  ɔyɛ kwatani. Ne ho ntew. Ɛsɛ sɛ ɔsɔfo no kyerɛ sɛ ne ho ntew. Ne yare no wɔ ne ti so. 45  Ɛsɛ sɛ kwatani a ɔyare no wɔ ne ho no sunsuane n’atade mu+ na ogyaw ne ti nhwi basaa.+ Afei ma ɔnkata ne mfemfem so+ na ɔnteɛm sɛ, ‘Me ho ntew, me ho ntew!’+ 46  Nna a yare no wɔ ne ho nyinaa, ne ho rentew. Ne ho ntew, enti ɔno nkutoo bɛkɔ akɔtena baabi wɔ nsraban no akyi.+ 47  “Sɛ kwata no yɛ atade mu, nea wɔde aboa nhwi ayɛ anaa nea wɔde nwera ayɛ, 48  anaa asaawa*+ a wɔde nwene nwera anaa kuntu anaa aboa nhoma anaa biribi a wɔde nhoma ayɛ+ mu, 49  na biribi a ɛte sɛ akokɔsrade anaa nea ani dum yɛ atade no anaa nhoma anaa asaawa anaa nwentama anaa biribiara a wɔde nhoma ayɛ mu a, ɛyɛ kwata, na ɛsɛ sɛ wɔde kyerɛ ɔsɔfo no. 50  Na ɔsɔfo+ no nhwɛ na ɔmfa ade a yare wom no nsie+ nnanson. 51  Sɛ da a ɛto so ason no ohu sɛ yare no atrɛw wɔ atade no anaa asaawa anaa nwentama+ anaa nhoma anaa biribi a wɔde nhoma ayɛ no mu a, ɛyɛ kwata a ɛyɛ hu.+ Ɛho ntew. 52  Ɛsɛ sɛ ɔhyew atade+ anaa asaawa anaa nwentama anaa biribiara a wɔde nhoma ayɛ a yare wom no, efisɛ ɛyɛ kwata a ɛyɛ hu.+ Ɛsɛ sɛ wɔde ogya hyew. 53  “Nanso sɛ ɔsɔfo no hwɛ na ohu sɛ yare no ntrɛwee atade anaa asaawa anaa nwentama anaa biribiara a wɔde nhoma ayɛ+ no mu a, 54  ɔsɔfo no mma wɔnhoro ade a yare wom no na ɔmfa nsie nnanson bio. 55  Wɔhoro wie na akyiri yi ɔsɔfo no hwɛ na nea ɛwom no ntrɛwee nanso ɛnsakrae a, ɛho ntew. Ɛsɛ sɛ wohyew wɔ ogya mu. Ɛyɛ yare no na awewe emu anaa akyi. 56  “Na sɛ wɔhoro wie na akyiri yi ɔsɔfo no hwɛ na ohu sɛ ano abrɛ ase a, ɔntew mfi atade anaa nhoma anaa asaawa anaa nwentama no mu. 57  Nanso sɛ ɔsan hu wɔ atade anaa asaawa anaa nwentama+ anaa biribiara a wɔde nhoma ayɛ no mu a, ɛkyerɛ sɛ kwata no wom. Biribiara a wobehu yare no wom no, fa ogya hyew.+ 58  Na sɛ wɔhoro atade anaa asaawa anaa nwentama anaa biribiara a wɔde nhoma ayɛ no wie na wohu sɛ yare no afi mu a, wɔnsan nhoro bio na ama ɛho atew. 59  “Eyi ne mmara a ɛwɔ hɔ bere a kwata ayɛ atade a wɔde aboa nhwi ayɛ anaa nea wɔde nwera ayɛ,+ anaa asaawa anaa nwentama anaa biribiara a wɔde nhoma ayɛ mu no. Eyi na wɔde bɛkyerɛ sɛ ɛho tew anaa ɛho ntew.”

Ase Hɔ Nsɛm

Anaasɛ “mfa ne nsa.” Ɛkyerɛ ntama bi tenten mu anaa ne trɛw mu.