Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Hosea 5:1-15

5  “Asɔfo, muntie;+ Israel fie, monhwɛ; ɔhene fiefo,+ monyɛ aso, na mo so na atemmu bɛba, efisɛ moadan afiri+ wɔ Mispa, na moayɛ sɛ atena a wɔatrɛw mu agu Tabor so.+  Akunkumakunkum* adi wɔn a wɔaman no ti,+ nanso mitu wɔn nyinaa fo daa.+  Minim Efraim,+ na Israel nso nhintaw me.+ Nanso afei, Efraim, wo ne mmea ayɛ adapaade sɛ nguaman,+ na Israel agu ne ho fĩ.+  Wɔn nneyɛe mma wontumi nsan mma wɔn Nyankopɔn nkyɛn,+ efisɛ aguamammɔ honhom+ wɔ wɔn mu, na wonnim Yehowa.+  Afei Israel ahantan adi adanse wɔ n’anim,+ na Israel ne Efraim bɔne ama wɔawatiriw.+ Na Yuda nso awatiriw te sɛ wɔn ara.+  Wɔde wɔn nguan ne wɔn anantwi kɔhwehwɛɛ Yehowa, nanso wɔanhu no,+ efisɛ na watwe ne ho afi wɔn ho.  Wɔatwa Yehowa nkontompo,+ na wɔawowo mma ananafo.+ Enti ɔsram biako bɛmene wɔne wɔn agyapade nyinaa.+  “Monhyɛn abɛn+ wɔ Gibea,+ monhyɛn torobɛnto wɔ Rama! Monteɛm wɔ Bet-Awen;+ O Benyamin,+ ɛwɔ w’akyi!  O Efraim, da a wɔbɛka w’anim no,+ wobɛyɛ ahodwiriwde. Mama Israel mmusuakuw ahu wɔn ho nokwasɛm.+ 10  Yuda abirɛmpɔn te sɛ wɔn a wɔtwe ɔhye kɔ akyi;+ wɔn so na mehwie m’abufuw agu te sɛ nsu. 11  Wɔahyɛ Efraim so, na wɔabu no atɛn ama wabubu,+ efisɛ wakodi ne tamfo akyi.+ 12  Na meyɛe sɛ nwewee+ maa Efraim ne ɔporɔw maa Yuda fie. 13  “Efraim huu ne yare, na Yuda huu ne kuru.+ Na Efraim kɔɔ Asiria+ na ɔsoma kɔɔ ɔhenkɛse bi nkyɛn.+ Nanso wantumi ansa mo yare,+ na wannya mo kuru no ano aduru.+ 14  Na mɛyɛ sɛ gyata ama Efraim+ ne gyatanini ama Yuda fie. Na m’ankasa mɛtetew wɔn mu na mede wɔn akɔ a ogyefo biara nni hɔ.+ 15  Mɛkɔ, mɛsan akɔ me tenabea kosi sɛ wɔbɛsoa wɔn bɔne;+ na wɔbɛba abɛhwehwɛ me.+ Sɛ ɛkã wɔn ani a,+ wɔbɛhwehwɛ m’akyi kwan.”+

Ase Hɔ Nsɛm

Ebetumi akyerɛ mmoa anaa nnipa a wokunkum wɔn.