Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Hesekiel 23:1-49

23  Yehowa ka kyerɛɛ me+ sɛ:  “Onipa ba, ná mmea baanu bi wɔ hɔ a wɔn nyinaa fi maame biako.+  Na wɔbɔɔ aguaman wɔ Egypt,+ wɔn mmabaaberem pɛɛ.+ Ɛhɔ na womiamiaa wɔn nufu+ na wogoruu wɔn kokom, wɔn mmaabunberem.  Ɔpanyin no din de Ohola, na ne nua no de Oholiba, na wɔbɛyɛɛ me dea,+ na wɔwoo mmabarima ne mmabea.+ Edin Ohola no gyina hɔ ma Samaria,+ na Oholiba nso gyina hɔ ma Yerusalem.+  “Ohola fii m’akyi kɔbɔɔ aguaman,+ na ɔde akɔnnɔ anibere kodii n’adɔfo+ Asiriafo+ a na wɔbɛn no no akyi,  amradofo a wofurafura ntama bruu, ne asoafo a wɔn nyinaa yɛ mmerante ahoɔfɛfo, apɔnkɔsotefo a wɔtete apɔnkɔ so.  Na ɔne Asiria atitiriw nyinaa bɔɔ aguaman; na ɔde wɔn a ne kɔn dɔ wɔn nyinaa—wɔn abosom fĩ nyinaa—guu ne ho fĩ.+  Wannyae n’aguamammɔ a ɔde fii Egypt no, efisɛ wɔne no dae ne mmabaaberem, na wogoruu ne kokom, ne mmaabunberem; na wɔde wɔn aguamammɔ guaree no.+  Enti mede no hyɛɛ n’adɔfo nsa,+ Asiriafo a ɔde akɔnnɔ anibere dii wɔn akyi no.+ 10  Wɔn na woyii n’adagyaw so,+ na wɔfaa ne mmabarima ne ne mmabea kɔe,+ na ɔno nso, wɔde nkrante kum no. Ogyee dimmɔne wɔ mmea mu, na wobuu no atɛn. 11  “Bere a ne nuabea Oholiba hui no,+ n’akɔnnɔ bɔne no bɛyɛɛ hu sen no, na na n’aguamammɔ no sen ne nua no de koraa.+ 12  Ɔde akɔnnɔ bɔne dii Asiriafo akyi,+ amradofo ne asoafo a na wɔbɛn wɔn, wɔn a wofurafura ntama pa, apɔnkɔsotefo a wɔn nyinaa yɛ mmerante ahoɔfɛfo.+ 13  Bere a oguu ne ho fĩ no, mihui sɛ wɔn nyinaa nam ɔkwan koro so.+ 14  Afei n’aguamammɔ no yɛɛ kɛse koraa bere a ohuu nnipa a wɔayɛ wɔn mfonini agu ɔfasu ho,+ Kaldeafo ahoni+ a wɔde adukɔkɔɔ+ ayɛ no. 15  Ná wɔde abɔso+ akyekyere wɔn asen bobɔ abotiri atenten. Wɔn nyinaa te sɛ akofofo, te sɛ Babilonfo a wɔn ase fi Kaldea asase so. 16  N’ani bɔɔ wɔn so no, wɔn ho akɔnnɔ dɛw ne mu,+ na otuu abɔfo kɔɔ wɔn nkyɛn wɔ Kaldea.+ 17  Babilonfo baa ne nkyɛn wɔ ne dɔ mpa so, na wɔde wɔn aguamammɔ guu ne ho fĩ.+ Afei bere a wɔkɔɔ so guu ne ho fĩ no, wɔn ho fonoo no, na ne kra twee ne ho. 18  “Oyii n’adagyaw so maa n’aguamammɔ ho daa hɔ,+ enti ne ho yɛɛ me abofono na me kra twee ne ho sɛnea ne nuabea ho yɛɛ me abofono na me kra twee ne ho no.+ 19  Ɔkɔɔ so ara bɔɔ aguaman+ ma wɔkaee ne mmabaaberem+ aguamammɔ wɔ Egypt asase so.+ 20  Na akɔnnɔ donnɔn no te sɛ mmea a wɔn mpenafo dua te sɛ mfurum dua na wɔn barima te sɛ apɔnkɔnini de no.+ 21  Wo kɔn dɔɔ wo mmabaaberem ahohwibra fi bere a na wowɔ Egypt,+ sɛnea wogoruu wo kokom no, wo mmabaaberem nufu nti.+ 22  “O Oholiba, nea Awurade Tumfoɔ Yehowa aka ni, ‘Mɛma w’adɔfo a wo kra atwe ne ho afi wɔn ho no aba wo so;+ mede wɔn bɛba wo so wɔ afã nyinaa,+ 23  Babilonfo+ ne Kaldeafo+ nyinaa, ne Pekod+ ne Soa ne Koa mmarima, ne Asiriafo a wɔka wɔn ho nyinaa, mmarima ahoɔfɛfo, amradofo ne asoafo nyinaa, akofofo ne wɔn a wɔafrɛ wɔn, a wɔn nyinaa tete apɔnkɔ so. 24  Nteaseɛnam ne ntwahonan+ ne asafodɔm ne akyɛm akɛse ne nketewa ne dade kyɛw na wɔde bɛba wo so. Na wobetwa wo ho nyinaa ahyia, na mɛma wɔabu wo atɛn sɛnea wɔn atemmu te.+ 25  Mɛma m’ani abere wo so,+ na wɔne wo bedi wɔ abufuw so.+ Wobetwa wo hwene ne w’aso, na wo fã a ɛbɛka no bɛtɔ nkrante ano. Wɔbɛfa+ wo mmabarima ne wo mmabea+ akɔ, na wɔde ogya bɛhyew wo nneɛma a ɛbɛka nyinaa.+ 26  Wɔbɛworɔw wo ntade+ na wɔafa w’agude fɛfɛ no akɔ.+ 27  Na mɛma w’ahohwibra to atwa,+ w’aguamammɔ a wode fi Egypt bae no.+ Na woremma w’ani so nhwɛ wɔn, na worenkae Egypt bio.’ 28  “Nea Awurade Tumfoɔ Yehowa aka ni, ‘Hwɛ, mede wo bɛhyɛ wɔn a wotan wɔn no nsa, wɔn a wo kra atwe ne ho afi wɔn ho no nsa.+ 29  Wɔne wo bedi wɔ ɔtan so na wɔafa nea woabrɛ anya nyinaa, na wobegyaw wo adagyaw, kwaterekwa.+ W’aguamammɔ mu adagyaw bɛda adi na w’ahohwibra ne wo brasɛe ho ada hɔ.+ 30  Eyi na wɔde bɛyɛ wo efisɛ woyɛɛ wo ho aguaman dii amanaman no akyi,+ na wode wɔn abosom fĩ guu wo ho fĩ.+ 31  Wofaa wo nuabea no kwan so;+ enti mede ne kuruwa bɛhyɛ wo nsam.’+ 32  “Nea Awurade Tumfoɔ Yehowa aka ni, ‘Wobɛnom wo nuabea no kuruwa a emu dɔ na ɛtrɛw no ano.+ Na wɔbɛserew wo adi wo ho fɛw, efisɛ kuruwa no mu nneɛma dɔɔso.+ 33  Asabow ne awerɛhow bɛhyɛ wo mã, na wobɛnom ahodwiriw ne ɔsɛe kuruwa ano, wo nuabea Samaria kuruwa no. 34  Wobɛnom afifew mu ma asa,+ na wobɛwe ne nkyɛmfɛre na woatetew wo nufu.+ “Me na maka,” Awurade Tumfoɔ Yehowa asɛm ni.’ 35  “Enti nea Awurade Tumfoɔ Yehowa aka ni, ‘Esiane sɛ wo werɛ afi me+ na woatow me akyene w’akyi+ nti, w’ahohwibra ne w’aguamammɔ bebua wo ti so.’” 36  Na Yehowa san ka kyerɛɛ me sɛ: “Onipa ba, wubebu Ohola ne Oholiba+ atɛn+ aka wɔn abofonode akyerɛ wɔn anaa?+ 37  Wɔasɛe aware,+ na mogya wɔ wɔn nsam;+ wɔde wɔn abosom fĩ na asɛe aware.+ Afei nso, wɔde wɔn mma a wɔawo wɔn ama me no afa ogya mu ama wɔn sɛ aduan.+ 38  Nanso nea ɛsen saa no, nea wɔde yɛɛ me ni: Woguu me kronkronbea+ hɔ fĩ+ saa da no, na wohuraa me homeda ho.+ 39  Na bere a wokunkum wɔn mma maa wɔn abosom fĩ+ no wiei no, wɔsan baa me kronkronbea hɔ saa da no behuraa ho.+ Hwɛ, saa na wɔayɛ wɔ me fie mfinimfini pɛɛ.+ 40  Afei bere a wotuu abɔfo kɔɔ mmarima a wɔwɔ akyirikyiri nkyɛn no,+ wɔbae,+ na wɔn nti wuguare+ kekaa w’ani akyi,+ na wode agude hyehyɛɛ wo ho.+ 41  Wotenaa mpa fɛfɛ so,+ na wusiesiee ɔpon de sii ho,+ na wode m’aduhuam+ ne me ngo sisii so.+ 42  Afei wɔtee nnipa pii a wɔn ho adwo wɔn nne wɔ hɔ,+ na wɔde asabofo+ fii sare so bɛkaa nnipadɔm no mu mmarima ho, na wɔde nkapo guu mmea no nsa de abotiri fɛfɛ bobɔɔ wɔn ti.+ 43  “Na mekaa nea awaresɛe+ ama wagurow no ho asɛm sɛ, ‘Ɔbɛkɔ so ara abɔ aguaman, mprempren mpo.’+ 44  Na wɔbaa ne nkyɛn sɛnea obi kɔ ɔbea aguaman nkyɛn; saa kwan no so na wɔbaa mmea ahohwifo Ohola ne Oholiba nkyɛn.+ 45  Na mmarima a wɔteɛ+ no de awaresɛefo atemmu+ ne mmea mogyapɛfo atemmu bebu no atɛn,+ efisɛ wɔyɛ mmea awaresɛefo, na mogya wɔ wɔn nsam.+ 46  “Nea Awurade Tumfoɔ Yehowa aka ni, ‘Mɛma asafo bi aba wɔn so,+ na wɔbɛma wɔn ho ayɛ hu na wɔafa wɔn sɛ asade.+ 47  Na asafo no besiw wɔn abo+ de nkrante atwa wɔn akyene. Wobekunkum wɔn mmabarima ne wɔn mmabea+ de ogya ahyew wɔn afie.+ 48  Afei metu ahohwibra+ ase afi asase no so,+ na mmea nyinaa besua biribi afi mu na wɔammɔ mo ahohwibra no bi.+ 49  Na wɔde mo ahohwibra begu mo ti so+ na moasoa mo abosom fĩ no bɔne, na mubehu sɛ mene Awurade Tumfoɔ Yehowa.’”+

Ase Hɔ Nsɛm