Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Genesis 41:1-57

41  Na mfe abien akyi no, Farao soo dae+ sɛ ogyina Nil asubɔnten ho.  Na ohui sɛ anantwi ason a wɔn ho yɛ fɛ na wɔadɔ srade apue afi Nil asubɔnten no mu, na na wɔrewe sare a ɛwɔ Nil ho no.+  Akyiri yi anantwi ason foforo a wɔn ho yɛ tan na wɔafomfɔn+ nso fi Nil asubɔnten no mu bae, na wobegyinagyinaa anantwi a wodi kan no nkyɛn wɔ Nil asubɔnten no ho.  Afei anantwi a wɔn ho yɛ tan na wɔafomfɔn no memenee anantwi ason a wɔn ho yɛ fɛ na wɔadɔ srade no.+ Ɛhɔ ara na Farao ani tewee.+  Ɔsan dae na ɔsoo dae a ɛto so abien. Na ohui sɛ awi mmɛtem akɛse a ɛyɛ fɛ ason repuepue dua koro ho.+  Afei awi mmɛtem ason foforo nteaanteaa a apuei mframa+ ama atwintwam nso dii akyi bae.+  Na awi mmɛtem nteaanteaa no memenee awi mmɛtem akɛse ason a ɛyɛ fɛ no.+ Afei Farao ani tewee, na ohui sɛ ɛyɛ dae.  Ade kyee anɔpa no, na ne ho yeraw no.+ Enti ɔsoma kɔfrɛɛ Egypt akɔmfo+ ne anyansafo nyinaa bae,+ na Farao kaa ne dae no kyerɛɛ wɔn.+ Nanso wɔn mu biara antumi ankyerɛ Farao ase.  Ɛhɔ na nsahyɛfo panyin no ka kyerɛɛ Farao+ sɛ: “Makae me bɔne nnɛ.+ 10  Bere bi Farao bo fuw ne nkoa,+ enti ɔde me ne paanootofo panyin no koguu afiase wɔ awɛmfo panyin+ no fie. 11  Na da bi anadwo yɛn baanu nyinaa sosoo dae. Ná ɛsono obiara dae ne ne nkyerɛase.+ 12  Saa bere no na yɛne Hebrini+ aberante bi a ɔyɛ awɛmfo panyin+ no akoa na ɛwɔ hɔ. Na bere a yɛka kyerɛɛ no no,+ ofii ase kyerɛɛ yɛn ase. Ɔkyerɛɛ obiara dae ase sɛnea ɛte. 13  Na nea ɔkae no ara na ɛbaa mu. Me nsa kaa me dibea bio,+ nanso obiako no de, wɔsɛn no.”+ 14  Na Farao somae sɛ wonkoyi Yosef+ mfi afiase amoa no mu mmra ntɛm.+ Afei oyii n’abɔgyesɛ,*+ na ɔsesaa n’atade+ na ɔkɔɔ Farao anim. 15  Na Farao ka kyerɛɛ Yosef sɛ: “Maso dae bi, nanso obiara ntumi nkyerɛ ase. Na mate wo nka sɛ wo de, wote dae a, wutumi kyerɛ ase.”+ 16  Ɛnna Yosef buaa Farao sɛ: “Me de, mene hena? Onyankopɔn na ɔbɛma Farao ate asɛm a eye.”+ 17  Afei Farao ka kyerɛɛ Yosef sɛ: “Mesoo dae no, na migyina Nil asubɔnten ho. 18  Na mihui sɛ anantwi ason a wɔn ho yɛ fɛ na wɔadɔ srade apue afi Nil asubɔnten no mu, na na wɔrewe sare a ɛwɔ Nil ho no.+ 19  Afei anantwi ason foforo a wɔn ho yɛ tan na wɔafomfɔn ayɛ kanyaa nso dii wɔn akyi bae.+ Minhuu anantwi a wɔn ho yɛ tan saa da wɔ Egypt asase so ha baabiara. 20  Na anantwi a wɔafomfɔn na wɔn ho yɛ tan no memenee anantwi ason a wodi kan a wɔadɔ srade no.+ 21  Na wɔmemenee wɔn wiei no, na wunhu mpo sɛ biribi akɔ wɔn yafunu mu, efisɛ na wɔn ho da so ara yɛ tan.+ Afei m’ani tewee. 22  “Ɛno akyi no, mesan soo dae hui sɛ awi mmɛtem akɛse a ɛyɛ fɛ ason repuepue dua koro ho.+ 23  Afei awi mmɛtem ason foforo nteaanteaa a atwintwam a apuei mframa+ atwe mu nsu nso dii akyi bae. 24  Na awi mmɛtem nteaanteaa no memenee awi mmɛtem ason a ɛyɛ fɛ no.+ Mekaa eyinom nyinaa kyerɛɛ akɔmfo no,+ nanso wɔn mu biara antumi ankyerɛ me ase.”+ 25  Ɛnna Yosef ka kyerɛɛ Farao sɛ: “Farao dae no yɛ asɛnkoro. Nea nokware Nyankopɔn bɛyɛ no na waka akyerɛ Farao no.+ 26  Anantwi ason a wɔn ho yɛ fɛ no yɛ mfe ason. Saa ara na awi mmɛtem ason a ɛyɛ fɛ no nso yɛ mfe ason. Dae no yɛ biako. 27  Na anantwi ason a wɔafomfɔn na wɔn ho yɛ tan no yɛ mfe ason; na awi mmɛtem a ammɔ yiye na apuei mframa+ twee mu nsu no bɛyɛ mfe ason mu kɔm.+ 28  Eyi na maka akyerɛ Farao no: Nea nokware Nyankopɔn no bɛyɛ na wama Farao ahu yi.+ 29  “Mfe ason reba a aduan bebu so wɔ Egypt asase so baabiara. 30  Nanso ɛno akyi no ɔkɔm bɛba mfe ason, na nnipa renkae mpo sɛ aduan abu so wɔ Egypt asase so pɛn. Eyi bɛyɛ ɔkɔm fitaa a ɛbɛdosaw asase no nyinaa.+ 31  Na ɔkɔm a ɛbɛba no ano den nti, biribiara nni hɔ a ɛbɛkyerɛ sɛ aduan abu so pɛn wɔ asase no so. 32  Na dae no a wotĩĩ mu kyerɛɛ Farao mprenu no kyerɛ sɛ nokware Nyankopɔn asi asɛm no so dua,+ na nokware Nyankopɔn no bɛyɛ no ntɛm.+ 33  “Enti Farao nhwehwɛ ɔbarima a n’adwenem da hɔ a ɔwɔ nyansa na ɔnhwɛ Egypt+ asase so. 34  Afei Farao nyɛ ntɛm mpaw ahwɛfo wɔ asase no nyinaa so,+ na onnyigye aduan a ɛbɛba Egypt asase so no anum mu nkyem biako bere a aduan abu so mfe ason no.+ 35  Na mmere pa a ɛreba no du so a, wonnyigye aduan na wɔmmoaboa ano na Farao mfa ne nsa nto so, na wɔnkora so wɔ nkurow mu.+ 36  Afei ɔkɔm a ɛbɛba Egypt+ asase so mfe ason no ba a, wɔmfa aduan a wɔde asie no mma ɔmanfo, na ɔkɔm ansɛe asase no.”+ 37  Farao ne ne nhenkwaa nyinaa ani gyee asɛm no ho.+ 38  Enti Farao bisaa nhenkwaa no sɛ: “Onipa bɛn na yebenya no a ɔte sɛ oyi a Onyankopɔn honhom wɔ no so yi?”+ 39  Afei Farao ka kyerɛɛ Yosef sɛ: “Sɛ Onyankopɔn ama woahu eyinom nyinaa a,+ ɛnde obi foforo biara nni hɔ a n’adwenem da hɔ na ɔwɔ nyansa sɛ wo.+ 40  Mede me fie bɛhyɛ wo nsa,+ na me manfo nyinaa betie nea wobɛka biara.+ Agua a mete so yi nkutoo na mede bɛsen wo.”+ 41  Na Farao san ka kyerɛɛ Yosef sɛ: “Hwɛ, mede wo asi Egypt asase nyinaa so.”+ 42  Afei Farao yii pɛtea+ fii ne nsa de hyɛɛ Yosef nsa, na ɔde atade a wɔde nwera ayɛ hyɛɛ no, na ɔde sika kɔnmuade guu ne kɔn mu.+ 43  Ɛno akyi no ɔma ɔtenaa ne teaseɛnam a ɛto so abien mu,+ na wɔteɛɛm dii n’anim sɛ “Awrek!” Enti ɔde no sii Egypt asase nyinaa so. 44  Na Farao ka kyerɛɛ Yosef bio sɛ: “Mene Farao, nanso wommaa kwan a, obiara ntumi mma ne nsa anaa ne nan so wɔ Egypt asase nyinaa so.”+ 45  Na Farao too Yosef din Safenat-Panea, na ɔde On+ sɔfo Potifera babea Asenat+ maa no aware. Na Yosef fii ase kyinkyinii Egypt asase so.+ 46  Yosef baa Egypt hene Farao anim no na wadi mfe aduasa.+ Afei Yosef fii Farao anim kɔfaa Egypt asase no so nyinaa. 47  Na mfe ason a wɔkyerɛ sɛ aduan bebu so no dui no, asase no maa nnɔbae bebree.+ 48  Na ɔboaboaa aduan a ɛbaa Egypt asase so wɔ mfe ason yi mu no ano, na wɔkoraa so wɔ nkurow mu.+ Ɔde nnɔbae a ɛwɔ afuw biara mu no kɔɔ kurow a ɛbɛn hɔ mu.+ 49  Afei Yosef boaboaa aduan pii ano+ te sɛ mpoano anhwea, na akyiri yi wogyaee kan, efisɛ na wontumi mmu ano.+ 50  Na ansa na ɔkɔm bere no reba no, Yosef ne On sɔfo Potifera babea Asenat woo mmabarima baanu.+ 51  Yosef frɛɛ ɔpanyin no Manase,+ efisɛ sɛnea ɔkae no, “Onyankopɔn ama me werɛ afi m’amanehunu ne me papa fie nyinaa.”+ 52  Ɔfrɛɛ nea ɔto so abien no Efraim,+ efisɛ sɛnea ɔkae no, “Onyankopɔn ama madɔ wɔ asase a mabrɛ wɔ so no so.”+ 53  Afei nkakrankakra mfe ason a aduan buu so wɔ Egypt asase so no baa awiei,+ 54  na ɔkɔm a ɛbɛba mfe ason no fii ase, sɛnea na Yosef aka no.+ Na ɔkɔm no baa nsase nyinaa so, nanso na aduan wɔ Egypt asase so baabiara.+ 55  Nkakrankakra ɔkɔm no tew sii Egypt asase nyinaa so, na nkurɔfo su guu Farao so sɛ ɔmma wɔn aduan.+ Na Farao ka kyerɛɛ Egyptfo nyinaa sɛ: “Monkɔ Yosef nkyɛn. Nea ɔbɛka akyerɛ mo biara, monyɛ.”+ 56  Ɔkɔm no baa asase nyinaa so.+ Afei bere a ɔkɔm no mu fii ase yɛɛ den wɔ Egypt asase so no, Yosef buebuee aduankora adan a ɛwɔ hɔ no nyinaa, na ɔtɔn aduan maa Egyptfo no.+ 57  Afei aman nyinaa baa Egypt bɛtɔɔ aduan fii Yosef hɔ, efisɛ na ɔkɔm no atew asi asase nyinaa so denneennen.+

Ase Hɔ Nsɛm

Hebri asɛmfua a wɔkyerɛɛ ase no betumi akyerɛ sɛ oyii ne bogyesɛ ne ne tiri nhwi.