Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Filipifo 3:1-21

3  Afei me nuanom, monkɔ so nni ahurusi wɔ Awurade mu.+ Ɛnhaw me sɛ mɛkyerɛw ade koro no ara ho nsɛm abrɛ mo; ɛyɛ ahobammɔ ma mo mmom.  Monhwɛ mo ho yiye wɔ akraman no ho,+ monhwɛ mo ho yiye wɔ adwumayɛfo bɔne ho, monhwɛ mo ho yiye wɔ wɔn a wotwitwa ɔhonam no ho.+  Efisɛ yɛn na wɔatwa yɛn twetia ankasa+ a yɛnam Onyankopɔn honhom so resom,+ na yɛhoahoa yɛn ho wɔ Kristo Yesu mu+ a yɛmfa yɛn ho nto ɔhonam so,+  ɛwom, sɛ obi wɔ hɔ a ɔwɔ biribi a ɔde ne ho bɛto so ɔhonam mu a, anka ɛyɛ me. Sɛ onipa foforo biara te nka sɛ ɔwɔ biribi a ɔde ne ho bɛto so ɔhonam mu a, mewɔ nea ɛboro saa:+  wotwaa me twetia da a ɛto so awotwe,+ m’ase fi Israel, Benyamin abusuakuw mu,+ meyɛ Hebrini+ a Hebrifo na wɔwoo me; mmara fam no, meyɛ Farisini;+  mmɔdenbɔ fam no, metaa asafo no;+ mmara no mu trenee fam no, medaa no adi sɛ asɛm biara nni me ho.  Nanso nneɛma a na ɛyɛ mfaso ma me no, mabu no sɛ adehwere, Kristo nti.+  Hwɛ, ɛno nti na nokwarem no, mibu nneɛma nyinaa sɛ adehwere m’Awurade Kristo Yesu ho nimdeɛ a ɛkyɛn so no nti.+ Ɔno nti na mibu nneɛma nyinaa adehwere na mibu no sɛ nwura dodow,+ na matumi anya Kristo  na wɔahu me wɔ ne mu sɛ minni m’ankasa trenee a efi mmara mu akyi,+ na mmom nea ɛnam Kristo mu gyidi so,+ trenee a efi Onyankopɔn hɔ a egyina gyidi so no,+ 10  sɛnea ɛbɛyɛ a mehu no ne ne wusɔre tumi no,+ na manya n’amanehunu mu kyɛfa+ de me ho ama owu a ɛte sɛ ne de no,+ 11  ahwɛ sɛ ebia metumi anya owusɔre+ a edi kan no anaa. 12  Ɛnyɛ sɛ manya dedaw anaa mayɛ pɛ dedaw,+ na mmom merebɔ mmɔden+ ahwɛ sɛ me nsa bɛka+ nea enti a Kristo Yesu nso nsa aka+ me no. 13  Anuanom, mimmu no sɛ me nsa anya aka; na mmom ade biako ne sɛ: Mema me werɛ fi nneɛma a ɛwɔ akyi no,+ na metwe me mu du nneɛma a ɛwɔ anim no ho,+ 14  bere a mebɔ mmɔden sɛ medu botae no ho+ na manya nkonimbo+ a ɛne ɔsoro frɛ+ a efi Onyankopɔn hɔ denam Kristo Yesu so no. 15  Enti momma yɛn mu dodow a yɛn ho akokwaw+ no nnya saa adwene yi;+ na sɛ mukura adwene foforo bi a, Onyankopɔn beyi saa adwene yi akyerɛ mo. 16  Sɛnea ɛte biara no, baabi a yɛanya nkɔso akodu no, momma yɛnkɔ so nnantew pɛpɛɛpɛ+ wɔ saa kwan yi ara so. 17  Anuanom, momfa biakoyɛ nsuasua+ me, na monhwɛ wɔn a wɔnantew sɛnea yɛayɛ ho nhwɛso akyerɛ mo no.+ 18  Na nnipa bebree wɔ hɔ a na metaa bɔ wɔn din, nanso afei de mede nusu na ɛbɔ wɔn din sɛ wɔn a wɔnam sɛ Kristo asɛndua no ho atamfo,+ 19  na wɔn awiei yɛ ɔsɛe,+ na wɔn nyame ne wɔn yafunu,+ na wɔn anuonyam wɔ wɔn aniwu mu,+ na wɔde wɔn adwene asi asase so nneɛma so.+ 20  Yɛn de, yɛyɛ ɔman mma+ wɔ soro,+ na ɛhɔ nso na yɛretwɛn denneennen+ sɛ ogyefo, Awurade Yesu Kristo, befi aba,+ 21  na ɔno na ɔbɛsan ayɛ yɛn nipadua a wɔabrɛ no ase no yiye+ ma ayɛ sɛ n’anuonyam nipadua+ no sɛnea ne tumi a ɔwɔ no yɛ adwuma,+ kyerɛ sɛ, ɛbɛbrɛ nneɛma nyinaa ase+ ahyɛ n’ase.

Ase Hɔ Nsɛm