Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Exodus 32:1-35

32  Bere a nkurɔfo no hui sɛ Mose akyɛ wɔ bepɔw no so+ no, wopiaa wɔn ho kɔɔ Aaron nkyɛn kɔka kyerɛɛ no sɛ: “Sɔre yɛ onyame ma yɛn na onni yɛn anim,+ na Mose yi a odii yɛn anim fii Egypt asase so+ no de, yennim nea ato no.”  Ɛnna Aaron ka kyerɛɛ wɔn sɛ: “Munyiyi sika asomuade+ a ɛhyehyɛ mo yerenom ne mo mmabarima ne mo mmabea asom no mfa mmrɛ me.”  Enti obiara yii sika asomuade a ɛhyɛ n’aso no de brɛɛ Aaron.  Ogye fii wɔn hɔ na ɔnan de adwinnade yɛɛ+ nantwi ba honi a wɔagu.+ Afei wɔkae sɛ: “Israel man, mo Nyankopɔn ni. Ɔno na odii mo anim fii Egypt asase so.”+  Bere a Aaron huu eyi no, ɔyɛɛ afɔremuka de sii ohoni no anim, na ɔkae sɛ: “Ɔkyena yɛ Yehowa afahyɛ.”  Ade kyee no, wɔsɔree ntɛm bɔɔ ɔhyew afɔre ne asomdwoe afɔre. Afei nkurɔfo no tenaa ase didi nomee, na wɔsɔre gyee wɔn ani.+  Ɛbaa saa no, Yehowa ka kyerɛɛ Mose sɛ: “Yɛ ntɛm kɔ, efisɛ nkurɔfo a wudii wɔn anim fii Egypt asase so no asɛe wɔn ho.+  Wɔaman afi ɔkwan a mekyerɛe sɛ wɔmfa so no so,+ wɔantwentwɛn wɔn nan ase koraa. Wɔayɛ nantwi ba honi, na wɔkotow no bɔ afɔre ma no, na wɔka sɛ: ‘Israel man, mo Nyankopɔn ni. Ɔno na odii mo anim fii Egypt asase so.’”+  Afei Yehowa ka kyerɛɛ Mose sɛ: “Mahwɛ ahu sɛ nkurɔfo yi kɔn asen.+ 10  Ma minyi m’abufuw adi na mentɔre wɔn ase+ na menyɛ wo ɔman kɛse.”+ 11  Ɛnna Mose bɔɔ mmɔden sɛ obedwudwo Yehowa, ne Nyankopɔn, bo+ sɛ: “Yehowa, adɛn na wo bo afuw+ wo nkurɔfo a wode tumi kɛse ne nsa a ɛyɛ den yii wɔn fii Egypt asase so yi? 12  Adɛn na ɛsɛ sɛ woma kwan ma Egyptfo+ ka sɛ, ‘Adwemmɔne na ɔde yii wɔn; na ɔpɛ sɛ okunkum wɔn wɔ bepɔw no so na ɔtɔre wɔn ase fi asase so’?+ Ma wo bo nnwo+ na sesa w’adwene+ wɔ bɔne a worebɛyɛ wo man yi ho. 13  Kae w’akoa Abraham ne Isak ne Israel a wokaa wɔn ntam+ sɛ, ‘Mɛma mo asefo adɔɔso sɛ ɔsoro nsoromma+ na mede asase a mekyerɛɛ mo no nyinaa bɛma mo asefo,+ na ɛbɛyɛ wɔn agyapade daa’+ no.” 14  Afei Yehowa gyaee nea ɔkae sɛ ɔbɛyɛ ne nkurɔfo no.+ 15  Ɛno akyi no, Mose sian fii bepɔw no+ so. Ɔreba no na Adanse apon abien+ a wɔakyerɛw n’afanu nyinaa, ɛha ne ha, kura no. 16  Onyankopɔn ankasa na ɔyɛɛ abopon no, na ɔno na ɔkyerɛw so.+ 17  Afei Yosua tee sɛ nnipa no reyɛ dede, na ɔka kyerɛɛ Mose sɛ: “Dede yi de, ɛte sɛ nea ɔko bi asi+ nsraban no mu.” 18  Na ɔkae sɛ: “Ɛnyɛ nkonimdi ho osebɔ,+ Na ɛnyɛ nkogudi ho benabɔ; Dwom foforo na mete yi.” 19  Bere a Mose bɛn nsraban no a ohuu nantwi ba+ ne asaw no, ne bo fuwii, na ogyaa abopon no mu hwee bepɔw no ase ma ebubui.+ 20  Afei ɔde ogya hyew nantwi ba a wɔayɛ no, na ɔyam no muhumuhu+ de petee nsu ani+ maa Israelfo no nomee.+ 21  Ɛno akyi no, Mose bisaa Aaron sɛ: “Dɛn na nnipa yi ayɛ wo a wode bɔne a ɛte sɛɛ aba wɔn so?” 22  Ɛnna Aaron kae sɛ: “Mma me wura bo mmfuw. W’ankasa wunim adwemmɔne a nkurɔfo yi kura.+ 23  Wɔka kyerɛɛ me sɛ, ‘Yɛ onyame ma yɛn na onni yɛn anim,+ na Mose yi a odii yɛn anim fii Egypt asase so no de, yennim nea ato no.’ 24  Enti me nso mibisaa wɔn sɛ, ‘Hena na ɔwɔ sika kɔkɔɔ? Onyi mma me.’ Afei mede guu ogya mu, na nea efii mu bae ne nantwi ba yi.” 25  Na Mose hui sɛ nnipa no yɛɛ nea wɔn ankasa pɛ, efisɛ Aaron maa wɔn kwan ma wɔyɛɛ nea wɔpɛ+ de guu wɔn anim ase wɔ wɔn atamfo anim.+ 26  Afei Mose begyinaa nsraban no kwan ano bisae sɛ: “Hena na ɔwɔ Yehowa afã? Ɔmmra mmegyina me nkyɛn!”+ Ɛnna Lewifo no nyinaa begyinaa ne nkyɛn. 27  Afei ɔka kyerɛɛ wɔn sɛ: “Nea Israel Nyankopɔn Yehowa aka ni, ‘Obiara mfa ne nkrante mmɔ n’asen. Afei momfa nsraban no apon nyinaa mu, na nea obiara behu no biara, ne nua oo, ne yɔnko oo, n’adamfo oo, onkum no.’”+ 28  Lewifo+ no yɛɛ nea Mose kae no, na wokum nnipa bɛyɛ mpem abiɛsa saa da no. 29  Mose san kae sɛ: “Monhyɛ mo nsam den mma Yehowa+ nnɛ, efisɛ mo mu biara asɔre atia n’ankasa ba ne ne nua,+ na moanya ne hɔ nhyira nnɛ.”+ 30  Afei ade kyee no, Mose ka kyerɛɛ nnipa no sɛ: “Moayɛ bɔne kɛse,+ na mɛkɔ Yehowa nkyɛn. Ebia metumi apata ama mo bɔne.”+ 31  Enti Mose kɔɔ Yehowa nkyɛn kɔka kyerɛɛ no sɛ: “Hwɛ, ɔman yi bɔne sõ, efisɛ wɔayɛ sika nyame!+ 32  Mesrɛ sɛ fa wɔn bɔne kyɛ wɔn,+ anyɛ saa a ɛnde popa me din+ fi nhoma+ a woakyerɛw no mu.” 33  Nanso Yehowa ka kyerɛɛ Mose sɛ: “Nea wayɛ me bɔne no na mɛpopa ne din afi me nhoma mu.+ 34  Afei di ɔman no anim kɔ faako a makyerɛ wo no. Hwɛ, me bɔfo bedi w’anim,+ na da no du sɛ mede asotwe ba a, wɔn bɔne nti mɛtwe wɔn aso.”+ 35  Na Yehowa twee ɔman no asõ sɛ wɔyɛɛ nantwi ba, nea Aaron yɛe no.+

Ase Hɔ Nsɛm