Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Exodus 3:1-22

3  Ná Mose hwɛ n’ase+ Yetro+ a ɔyɛ Midian sɔfo no nguan. Da bi a ɔde nguan no nam sare so rekɔ atɔe fam no, okopuee nokware Nyankopɔn no bepɔw+ Horeb+ ho.  Afei Yehowa bɔfo yii ne ho adi kyerɛɛ no wɔ nkyɛkyerɛ+ bi a ɛredɛw mu. Bere a ɔhwɛɛ ade no dinn no, ohui sɛ nkyɛkyerɛ no redɛw nanso ɛnhyew.  Ɛnna Mose kae sɛ: “Ma menkɔhwɛ anwonwade kɛse yi, na minhu nea enti a nkyɛkyerɛ no nhyew.”+  Bere a Yehowa hui sɛ ɔrebɛn hɔ akɔhwɛ no, ntɛm ara Onyankopɔn frɛ fii nkyɛkyerɛ no mu sɛ: “Mose! Mose!” na obuae sɛ: “Mini.”+  Na ɔkae sɛ: “Mmɛn ha. Yi wo nan ase mpaboa, na baabi a wugyina no yɛ asase kronkron.”+  Na ɔtoaa so sɛ: “Mene w’agyanom Nyankopɔn, Abraham Nyankopɔn, Isak Nyankopɔn, ne Yakob Nyankopɔn.”+ Afei Mose de n’anim hintawee, efisɛ na osuro sɛ ɔbɛhwɛ nokware Nyankopɔn no.  Yehowa de kaa ho sɛ: “Nokwarem no mahu me nkurɔfo a wɔwɔ Egypt no amanehunu, na mate apini a wosi bere a wɔhyɛ wɔn de wɔn yɛ adwuma no. Minim wɔn brɛ nyinaa.+  Mɛkɔ akogye wɔn afi Egyptfo nsam,+ na mayi wɔn afi asase no so akɔ asase a eye na ɛtrɛw so, asase a nufusu ne ɛwo sen wɔ so,+ baabi a Kanaanfo, Hitifo, Amorifo, Perisifo, Hiwifo, ne Yebusifo+ te.  Afei hwɛ! mate Israelfo no sufrɛ, na mahu ahokyere a Egyptfo de aba wɔn so no.+ 10  Enti bra na mensoma wo Farao nkyɛn na koyi me man Israelfo no fi Egypt.”+ 11  Na Mose bisaa nokware Nyankopɔn no sɛ: “Mene hena a merekɔ Farao anim sɛ merekoyi Israelfo afi Egypt?”+ 12  Ɛnna ɔkae sɛ: “Medi w’akyi,+ na nea ɛbɛkyerɛ sɛ me na masoma wo ni:+ Sɛ wunya de ɔman no fi Egypt ba a, mobɛsom nokware Nyankopɔn no wɔ bepɔw yi so.”+ 13  Na Mose bisaa nokware Nyankopɔn no sɛ: “Sɛ mekɔ Israelfo no nkyɛn kɔka kyerɛ wɔn sɛ ‘Mo agyanom Nyankopɔn asoma me mo nkyɛn’ na wobisa me sɛ, ‘Ne din de dɛn?’+ a, asɛm bɛn na menka nkyerɛ wɔn?” 14  Ɛnna Onyankopɔn ka kyerɛɛ Mose sɛ: “MƐYƐ ME HO NEA MEPƐ SƐ MEYƐ.”+ Na ɔde kaa ho sɛ: “Ka kyerɛ Israelfo no sɛ, ‘MƐYƐ na asoma me mo nkyɛn.’”+ 15  Afei Onyankopɔn ka kyerɛɛ Mose sɛ: “Ka kyerɛ Israelfo no sɛ, ‘Yehowa, mo agyanom Nyankopɔn, Abraham Nyankopɔn,+ Isak Nyankopɔn,+ ne Yakob Nyankopɔn+ na asoma me mo nkyɛn.’ Eyi ne me din de kosi daa,+ na eyi na wɔmfa nkae me awo ntoatoaso nyinaa mu.+ 16  Kɔ na kɔboa Israel mpanyimfo ano na ka kyerɛ wɔn sɛ, ‘Yehowa, mo agyanom Nyankopɔn, Abraham, Isak, ne Yakob Nyankopɔn ayi ne ho adi akyerɛ me+ sɛ, “Nea wɔde reyɛ mo wɔ Egypt nyinaa m’ani tua, na medi mo akyi.+ 17  Enti nea mereka ne sɛ, megye mo afi amanehunu+ a Egyptfo de aba mo so no mu de mo akɔ Kanaanfo, Hitifo, Amorifo,+ Perisifo, Hiwifo, ne Yebusifo+ asase so, asase a nufusu ne ɛwo sen wɔ so.”’+ 18  “Wobetie wo.+ Afei wo ne Israel mpanyimfo no nkɔ Egypt hene hɔ, na monka nkyerɛ no sɛ, ‘Yehowa, Hebrifo+ Nyankopɔn no ne yɛn akasa,+ enti yɛsrɛ wo ma yentwa nnansa kwan nkɔ sare so nkɔbɔ afɔre mma Yehowa yɛn Nyankopɔn.’+ 19  Nanso minim sɛ Egypt hene remma mo kwan gye sɛ nsa a ɛyɛ den hyɛ no ansa.+ 20  Enti mɛteɛ me nsa+ abɔ Egypt ayɛ anwonwade pii wɔ hɔ; afei ɔbɛma moakɔ.+ 21  Na mɛma ɔman yi anim aba nyam wɔ Egyptfo anim, na sɛ morefi hɔ akɔ a, morenkɔ no nsapan.+ 22  Israelni bea biara mmisa nneɛma a wɔde dwetɛ ayɛ ne nea wɔde sika ayɛ ne ntama mfi ne fipamfo ne ɔbea hɔho a ɔte ne fie no hɔ, na momfa nhyehyɛ mo mmabarima ne mo mmabea; monwerɛw Egyptfo ho.”+

Ase Hɔ Nsɛm