Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Exodus 10:1-29

10  Afei Yehowa ka kyerɛɛ Mose sɛ: “Kɔ Farao nkyɛn, na mama ɔne ne nkoa apirim wɔn koma+ na mayi me nsɛnkyerɛnne yi adi wɔ n’anim.+  Mayɛ eyi na wo nso woaka ama wo ba ne wo ba ba ate nea mede yɛɛ Egypt ne nsɛnkyerɛnne a miyii no adi kyerɛɛ wɔn+ no, na mubehu ampa sɛ mene Yehowa.”+  Enti Mose ne Aaron kɔɔ Farao nkyɛn kɔka kyerɛɛ no sɛ: “Nea Hebrifo Nyankopɔn Yehowa aka ni: ‘Wobɛbɔ me so dwae akosi da bɛn?+ Ma me nkurɔfo kwan ma wɔnkɔsom me.  Na sɛ wusen wo kɔn na woamma me nkurɔfo no ankɔ a, ɛnde ɔkyena mɛma mmoadabi aba w’asase so.+  Na wɔbɛkata asase ani baabiara, na nnipa rentumi nhu asase so dɔte mpo; na biribiara a amparuwbo no ansɛe no no mmoadabi no bedi ne nyinaa ma asa, na dua biara a ɛrefefɛw wɔ mo afuw mu no, wɔbɛwe.+  Na wɔbɛhyɛ w’afie ne wo nkoa nyinaa afie ne Egyptfo nyinaa afie mã, na ɛbɛyɛ biribi a efi bere a w’agyanom ne wɔn agyanom tenaa asase so besi nnɛ no, obiara nhuu bi da.’”+ Afei ɔdan ne ho fii Farao anim kɔe.+  Ɛno akyi no, Farao nkoa ka kyerɛɛ no sɛ: “Enkosi da bɛn na saa ɔbarima yi bɛyɛ afiri ama yɛn?+ Ma nkurɔfo no nkɔsom wɔn Nyankopɔn Yehowa no. Enti Egypt asɛe yi wunhui?”+  Na wɔde Mose ne Aaron san baa Farao anim, na ɔka kyerɛɛ wɔn sɛ: “Monkɔsom mo Nyankopɔn Yehowa no.+ Na ɛhefo ankasa na wɔbɛkɔ?”  Na Mose buae sɛ: “Yɛne yɛn mmofra, yɛn nkwakoraa ne yɛn mmerewa, yɛn mmabarima ne yɛn mmabea,+ yɛn nguan ne yɛn anantwi na ɛbɛkɔ,+ efisɛ yɛrekɔhyɛ fã ama Yehowa.”+ 10  Ɛnna ɔka kyerɛɛ wɔn sɛ: “Sɛ mema mo ne mo mmofra kwan kɔ a, na mo Yehowa no di mo akyi ampa!+ Mahu sɛ mowɔ adwemmɔne bi wɔ akyi.+ 11  Dabi! Mo a moyɛ mmarima no na monkɔsom Yehowa, efisɛ ɛno na mohwehwɛ.” Ɔkaa saa no, wɔpam wɔn fii Farao anim.+ 12  Na Yehowa ka kyerɛɛ Mose sɛ: “Teɛ+ wo nsa wɔ Egypt asase so ma mmoadabi mmra Egypt asase nyinaa so, na wommedi asase no so nhaban ne afifide nyinaa, nea amparuwbo no ansɛe no biara.”+ 13  Enti Mose teɛɛ ne poma wɔ Egypt asase so, na Yehowa maa apuei mframa+ bɔ faa asase no so da no nyinaa, awia ne anadwo. Ade kyee anɔpa no, apuei mframa no soaa mmoadabi bae. 14  Afei mmoadabi no tu baa Egypt asase no nyinaa so, na wobesum asase no so baabiara.+ Ná wɔn ho yɛ ahometew+ ankasa. Ná mmoadabi a wɔte saa mmaa da, na ɛno akyi no, ebi remma saa da. 15  Wɔkataa asase no ani baabiara+ maa asase no so yɛɛ tumm;+ na wodii asase no so nhaban ne nnuaba a amparuwbo no gyawee nyinaa.+ Afei na ahaban momono biara nni nnua anaa afuw mu afifide biara so wɔ Egypt asase nyinaa so.+ 16  Ntɛm ara na Farao soma kɔfrɛɛ Mose ne Aaron bae, na ɔkae sɛ: “Mayɛ mo Nyankopɔn Yehowa no bɔne, na mo nso, mayɛ mo bɔne.+ 17  Afei mesrɛ mo momfa me bɔne yi nkyɛ me, prɛko yi;+ na monsrɛ+ mo Nyankopɔn Yehowa mma me na onyi owu yi mfi me so.” 18  Enti ofii Farao nkyɛn kɔsrɛɛ Yehowa.+ 19  Afei Yehowa maa atɔe mframa dennen bi bɔe, na ɛtwee mmoadabi no nyinaa koguu Po Kɔkɔɔ no mu. Na mmoadabi no mu biako mpo anka Egypt asase so. 20  Nanso Yehowa maa Farao pirim ne koma ara,+ na wamma Israelfo no ankɔ. 21  Afei Yehowa ka kyerɛɛ Mose sɛ: “Teɛ wo nsa kyerɛ soro+ na esum mmra Egypt asase nyinaa so, esum a woso mu a ɛbɛyɛ yiye.” 22  Ntɛm ara Mose teɛɛ ne nsa kyerɛɛ soro, na esum kabii baa Egypt asase nyinaa so nnansa.+ 23  Obiara anhu ne yɔnko anim, na wɔantumi ampue nnansa; nanso baabi a Israelfo te no de, na hann wɔ hɔ.+ 24  Ɛnna Farao frɛɛ Mose ka kyerɛɛ no sɛ: “Monkɔsom Yehowa.+ Mo nguan ne mo anantwi nko na ɛbɛka ha. Mo mma nso betumi aka mo ho akɔ.”+ 25  Nanso Mose kae sɛ: “Ma yennya mmoa a yebekum abɔ afɔre ne nea yɛde bɛbɔ ɔhyew afɔre nso na yɛde akɔbɔ afɔre ama Yehowa yɛn Nyankopɔn.+ 26  Yɛn mmoa nso bɛka yɛn ho akɔ.+ Aboa nan mpo renka ha, efisɛ wɔn mu bi na yebeyi de abɔ afɔre ama yɛn Nyankopɔn Yehowa,+ nanso yennim nea yɛde bɛsom Yehowa gye sɛ yedu hɔ ansa.”+ 27  Na Yehowa maa Farao pirim ne koma, na wampene so sɛ wɔbɛkɔ.+ 28  Enti Farao ka kyerɛɛ no sɛ: “Fi me so kɔ!+ Hwɛ wo ho yiye! Hwɛ na woansi m’anim bio, efisɛ da a wubesi m’anim no, wubewu.”+ 29  Ɛnna Mose kae sɛ: “Yoo, woaka a mate. Merensi w’anim bio.”+

Ase Hɔ Nsɛm