Kɔ emu nsɛm afã hɔ

Kɔ emu nsɛm afã hɔ

Yehowa Adansefo

Yi kasa a wopɛ Twi

Deuteronomium 28:1-68

28  “Sɛ woyɛ aso tie Yehowa wo Nyankopɔn asɛm na wudi ne mmara nsɛm a mede rema wo nnɛ yi nyinaa so a,+ Yehowa wo Nyankopɔn nso bɛma wo so asen asase so aman nyinaa.+  Woyɛ aso ma Yehowa wo Nyankopɔn asɛm a, nhyira yi nyinaa bɛba wo so na abunkam wo so:+  “Nhyira bɛka wo wɔ kurom+ na nhyira aka wo wɔ afuw mu.+  “Nhyira bɛka wo yafunum aba+ ne w’asase so aba ne w’afieboa mma+ ne w’anantwi mma ne wo nguan mma.+  “Nhyira bɛka wo kɛntɛn+ ne wo mmɔre kora.+  “Nhyira bɛka wo wo mmae mu na nhyira aka wo wo nkɔree mu.+  “W’atamfo a wɔbɛsɔre aba wo so no, Yehowa bɛma woadi wɔn so.+ Wɔbɛfa ɔkwan biako so aba wo so na wɔafa akwan ason so aguan afi w’anim.+  Yehowa behyira w’adekoradan+ ne biribiara a wobɛyɛ so,+ na obehyira wo wɔ asase a Yehowa wo Nyankopɔn de ama wo no so.  Yehowa de wo bɛyɛ ne man kronkron+ sɛnea ɔkaa wo ntam no,+ efisɛ wudi Yehowa wo Nyankopɔn mmara nsɛm so+ nantew n’akwan so. 10  Na asase so aman nyinaa behu sɛ Yehowa din da wo so,+ na wobesuro wo.+ 11  “Yehowa behyira wo ama wo yafunum aba+ adɔɔso, na w’afieboa ase atrɛw na w’afuw mu nnɔbae+ abu so wɔ asase a Yehowa kaa w’agyanom ntam sɛ ɔde bɛma wo no so.+ 12  Yehowa bebue ɔsoro adekorabea pa ama wo na watɔ osu agu w’asase so wɔ ne bere mu,+ na obehyira wo nsa ano adwuma nyinaa so.+ Na wubenya pii de afɛm aman bebree, na wo de, worenkɔfɛm hwee.+ 13  Sɛ wudi Yehowa wo Nyankopɔn mmara nsɛm+ a mede rema wo nnɛ yi nyinaa so a, Yehowa de wo bedi kan na ɛnyɛ akyi; wobɛda soro+ daa na woremma fam. 14  Enti mman mfi mmara a mede rema mo nnɛ yi ho nkɔ nifa anaa benkum+ nkodi anyame foforo akyi nkɔsom+ wɔn. 15  “Na sɛ woanyɛ aso antie Yehowa wo Nyankopɔn asɛm anni n’ahyɛde ne ne mmara a mede rema wo nnɛ yi nyinaa so a, ɛnde nnome yi nyinaa bɛba wo so na abunkam wo so:+ 16  “Nnome bɛka wo wɔ kurom+ na nnome aka wo wɔ afuw mu.+ 17  “Nnome bɛka wo kɛntɛn+ ne wo mmɔre kora.+ 18  “Nnome bɛka wo yafunum aba+ ne w’asase so nnɔbae+ ne w’anantwi mma ne wo nguan mma.+ 19  “Nnome bɛka wo wo mmae mu na nnome aka wo wo nkɔree mu.+ 20  “Esiane sɛ woayɛ Yehowa anim bɔne na woapo me nti,+ ɔde nnome+ ne ahoyeraw+ ne asotwe+ bɛba biribiara a wobɛyɛ biara so akosi sɛ ɔbɛsɛe wo ama w’ase atɔre prɛko pɛ. 21  Yehowa de ɔyaredɔm bɛfam wo ho akosi sɛ obetwa wo afi asase a worekɔ so no so.+ 22  Yehowa de nsamanwaw,+ atiridiinini, ahonhon, ahohyehye, nkrante+ ne ɔhyew+ bɛba wo so na wama yare asi w’afuw so+ akosi sɛ w’ase bɛhyew. 23  Na wim a ɛhata wo so yi bɛdan kɔbere na asase a ɛwɔ w’ase yi adan dade.+ 24  Yehowa bɛma wo mfutuma ne nsõ sɛ w’asase nsu. Ɛbɛtɔ afi soro agu wo so akosi sɛ ɔbɛtɔre w’ase. 25  Yehowa bɛma woadi nkogu wɔ w’atamfo anim.+ Wobɛfa ɔkwan biako so akɔ wɔn so na woafa akwan ason so aguan afi wɔn anim, na wo ho bɛyɛ asase so ahemman nyinaa hu.+ 26  Wo funu bɛyɛ aduan ama wim nnomaa ne wuram mmoa nyinaa, na obiara renyi wɔn hu.+ 27  “Yehowa bɛma Egypt mpɔmpɔ abobɔ wo+ na wama kooko ne ntwom ne gyatɔ ayɛ wo, na worentumi nsa. 28  Yehowa de adammɔ+ ne anifurae+ ne ayamhyehye+ bɛto wo so. 29  Na wode wo ti bɛpempem awia ketee te sɛ onifuraefo a ɔde ne ti pempem wɔ sum a ɔwom mu,+ na w’akwan rensi wo yiye. Afoforo besisi wo daa na wɔawia wo ho nneɛma, na obiara nni hɔ a obegye wo.+ 30  Wubesi ɔbea asiwa na ɔbarima foforo ato no mmonnaa.+ Wubesi fie nanso worentena mu.+ Wobɛyɛ bobeturo nanso worentew so.+ 31  Wobekum wo nantwi wɔ w’anim nanso ebi renka w’ano. Wode w’ani behu sɛ obi rewia w’afurum, na wo nsa renka bio. Wɔde wo nguan bɛma w’atamfo, na obiara nni hɔ a obegye wo.+ 32  Wode w’ani behu sɛ wɔde wo mmabarima ne wo mmabea ama ɔman foforo,+ na w’ani begyina wɔn, nanso worennya tumi biara wɔ wo nsam.+ 33  Ɔman bi a wunnim wɔn bedi w’afuw mu nnɔbae ne wo nsa ano adwuma nyinaa,+ na wobesisi wo atan w’ani daa.+ 34  Na nea wode w’ani behu no bɛma woabɔ dam.+ 35  “Yehowa bɛma mpɔmpɔ bɔne abobɔ wo nkotodwe ne wo nan abien no ho nyinaa, na obiara rentumi nsa wo yare. Ɛbɛbobɔ wo nan ase akosi wo mpampam.+ 36  Yehowa de wo+ ne ɔhene+ a wode no bedi wo so no bɛkɔ ɔman bi so, baabi a wo ne w’agyanom biara nnim. Na ɛhɔ na wobɛsom anyame a wɔde dua ne abo ayɛ.+ 37  Na Yehowa de wo kɔ aman no so a, wo ho bɛyɛ wɔn nwonwa,+ na wɔde wo bɛka asɛm+ aserew adi wo ho fɛw wɔ hɔ nyinaa. 38  “Wode aba pii bɛhyɛ fam, nanso kakraa bi na wubetwa+ efisɛ mmoadabi bɛwe.+ 39  Wobɛyɛ bobeturo adɔw ho, nanso worennya nsã biara nnom na worentwa aba biara+ efisɛ ɔsã bɛwe.+ 40  Wubehu ngodua wɔ w’asase so baabiara, nanso worennya ngo nsra efisɛ aba no bɛporow agu.+ 41  Wobɛwo mmabarima ne mmabea nanso wɔrentena wo nkyɛn nkyɛ, efisɛ wɔbɛkɔ akɔyɛ nkoa wɔ baabi.+ 42  Mmebɛw bɛfa wo nnua ne w’afuw mu nnɔbae nyinaa. 43  Ɔhɔho a wo ne no te no bɛkɔ soro asen wo, na wo de, daa wubesian aba fam.+ 44  Obenya pii de bi afɛm wo, na wo de, worennya hwee mfa mfɛm no.+ Obedi kan ama woadi akyi.+ 45  “Na nnome+ yi nyinaa betiw wo abɛto wo akosi sɛ w’ase bɛhyew,+ efisɛ woantie Yehowa wo Nyankopɔn asɛm anni n’ahyɛde ne ne mmara a ɔde ama wo yi so.+ 46  Na eyinom nyinaa bɛyɛ sɛnkyerɛnne ne anwonwade wɔ wo ne wo mma so daa,+ 47  efisɛ woamfa ahosɛpɛw ne komam anigye+ ansom Yehowa wo Nyankopɔn sɛ wama wo nneɛma pii ama abu so.+ 48  Na atamfo a Yehowa bɛsoma wɔn aba wo so no, wode ɔkɔm+ ne sukɔm ne adagyaw ne ohia bɛsom wɔn,+ na ɔde dade kɔndua bɛto wo kɔn so akosi sɛ ɔbɛtɔre w’ase koraa.+ 49  “Yehowa bɛma ɔman bi a wonte wɔn kasa+ afi asase ano akyirikyiri+ atow ahyɛ wo so sɛ ɔkɔre.+ 50  Ɛbɛyɛ ɔman a wɔn ani yɛ den,+ na wɔrenhwɛ akwakoraa anim na wɔrenhu aberante nso mmɔbɔ.+ 51  Wɔbɛwe w’afieboa mma na wɔadi w’asase so nnɔbae nyinaa akosi sɛ wɔbɛtɔre w’ase koraa.+ Na wɔrennyaw wo awi anaa nsã foforo anaa ngo anaa w’anantwi mma anaa wo nguan mma kosi sɛ wɔbɛsɛe wo.+ 52  Na wɔbɛka wo ahyɛ wo nkurow mu akosi sɛ w’abantenten a wode wo ho ato so no bebubu wɔ asase no nyinaa so. Nokwasɛm ni, wɔbɛka wo ahyɛ wo nkurow mu wɔ asase a Yehowa wo Nyankopɔn de ama wo no so baabiara.+ 53  Na wo tamfo bɛma wo ho akyere wo denneennen ma worennya wo ho atwaye. Enti wubedi wo yafunum aba, wo mmabarima ne wo mmabea+ a Yehowa wo Nyankopɔn de ama wo no nam. 54  “Na onipa a odwo na obu ne ho mpo ani+ bɛbere ne nua ne ne yere a ɔdɔ no ne ne mma a wɔaka, 55  na sɛ ɔrewe ne ba nam a, ɔremma wɔn mu biara bi efisɛ onni biribiara wɔ ne ho. Eyi nyinaa bɛkɔ so efisɛ wo tamfo bɛka wo ahyɛ wo nkurow no mu, na wo ho bɛkyere wo ma worennya wo ho atwaye.+ 56  Na ɔbea a obu ne ho na ne tirim yɛ no dɛ a ahokyerɛ nti ɔmpɛ sɛ ne nan bɛka fam mpo+ ani bɛbere ne kunu a ɔdɔ no ne ne mmabarima ne ne mmabea. 57  Ne kɔn bɛdɔ n’awode a afi ne nan ntam aba ne ne mma a wawo wɔn no mpo,+ na ɔbɛhyɛ kokoam awe efisɛ wo tamfo bɛka wo ahyɛ wo kurom ama wo ho akyere wo.+ 58  “Sɛ woanni mmara a wɔakyerɛw wɔ nhoma yi mu nyinaa so+ na woansuro Yehowa+ wo Nyankopɔn a ne din sõ+ na ɛyɛ hu+ no a, 59  Yehowa nso bɛma wo ne wo mma haw ne mo abɛbrɛsɛ mu ayɛ den na atena mo so akyɛ.+ Na ɔde ɔyare bɔne a woko a ɛnkɔ bɛbɔ mo.+ 60  Ɔde Egypt nyarewa a na wusuro no nyinaa bɛbɔ wo, na ɛbɛka wo so.+ 61  Nyarewa ne amanehunu a wɔnkyerɛw wɔ mmara nhoma yi mu nyinaa nso, Yehowa de bɛba wo so akosi sɛ w’ase bɛhyew. 62  Mo a anka modɔɔso te sɛ ɔsoro nsoromma no,+ afei de, mobɛka kakraa bi,+ efisɛ moantie Yehowa mo Nyankopɔn asɛm. 63  “Afei sɛnea Yehowa ani gyei sɛ ɔbɛyɛ mo papa na wama moadɔ no,+ saa ara na Yehowa ani begye sɛ ɔbɛsɛe mo atɔre mo ase.+ Na obetwa mo afi asase a morekɔ so no so.+ 64  “Yehowa bɛbɔ wo apete aman nyinaa so, fi asase ano kosi asase ano,+ na ɛhɔ na wobɛsom anyame a wo ne w’agyanom biara nnim wɔn, anyame a wɔde nnua ne abo ayɛ.+ 65  Wudu aman yi so a, wo ho beguan wo,+ na worennya baabi mfa wo nan nsi nhome, na Yehowa bɛma wo koma atu,+ na w’ani asɛe+ na wo kra abotow. 66  Wɔde wo nkwa begoru atɔprɛ, na anadwo oo, awia oo, ehu bɛka wo, na worenhu sɛ ade bɛkye wo anaa ɛrenkye wo.+ 67  Ade kye anɔpa a, wobɛka sɛ, ‘Minyae a, anka ɛyɛ anwummere!’ na edu anwummere nso a, wobɛka sɛ, ‘Minyae a, anka ɛyɛ anɔpa!’ efisɛ nea w’ani behu no bɛma woabɔ hu na wo koma atu.+ 68  Na Yehowa de hyɛn bɛfa wo afa ɔkwan a meka kyerɛɛ wo sɛ, ‘Worenhu bio’+ no so de wo akɔ Egypt, na mobɛtɔn mo ho ama mo atamfo sɛ nkoa ne mfenaa,+ nanso obiara rentɔ mo.”

Ase Hɔ Nsɛm