Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Asomafo Nnwuma 16:1-40

16  Enti okoduu Derbe ne Listra.+ Na hwɛ! osuani bi wɔ hɔ a ne din de Timoteo+ a ɔyɛ Yudani bea gyidini bi ba, na ne papa yɛ Helani,  na anuanom a wɔwɔ Listra ne Ikoniom no kaa ne ho asɛm pa.  Paulo pɛe sɛ ɔne saa ɔbarima yi kɔ, na esiane Yudafo a wɔwɔ hɔ no nti, ɔfaa no twaa no twetia,+ efisɛ na wɔn nyinaa nim sɛ ne papa yɛ Helani.  Afei bere a wɔnam nkurow no so no, wɔde mmara a asomafo no ne mpanyimfo a wɔwɔ Yerusalem asi ho gyinae no maa wɔn sɛ wonni so.+  Enti asafo ahorow no kɔɔ so yɛɛ den gyidi mu+ na wɔn dodow kɔɔ anim daa.  Afei, wɔkɔfaa Frigia ne Galatia+ asase so, efisɛ honhom kronkron no baraa wɔn sɛ wɔnnka asɛm no wɔ Asia mantam mu.  Na bere a woduu Misia no, wɔbɔɔ mmɔden sɛ wɔbɛkɔ Bitinia,+ nanso Yesu honhom no amma wɔn kwan.  Enti wotwaam wɔ Misia kɔɔ Troa.+  Na eduu anadwo no, Paulo nyaa anisoadehu+ bi: na ɔbarima bi a ofi Makedonia gyina hɔ resrɛ no sɛ: “Twa bra Makedonia bɛboa yɛn.” 10  Na onyaa anisoadehu no ara pɛ no, yesiim sɛ yɛrekɔ Makedonia,+ efisɛ yehui sɛ Onyankopɔn na afrɛ yɛn sɛ yɛnkɔka asɛmpa no nkyerɛ wɔn. 11  Enti yɛfaa nsu so fii Troa baa Samotrake tẽẽ, na ade kyee no, yɛkɔɔ Neapoli, 12  na yefii hɔ no yɛkɔɔ Filipi+ a ɛyɛ atubrafo kurow titiriw wɔ Makedonia mantam no mu.+ Yedii nna kakra wɔ saa kurow yi mu. 13  Na homeda dui no, yepue faa kurow no pon ano kɔɔ asubɔnten bi ho, faako a na yesusuw sɛ yebenya baabi a wɔbɔ mpae; na yɛtenaa ase kasa kyerɛɛ mmea a na wɔahyiam wɔ hɔ no. 14  Ɔbea bi a wɔfrɛ no Lidia a ɔtɔn ntama kɔkɔɔ a ofi Tiatira+ na ɔsom Onyankopɔn no tiei, na Yehowa buee ne koma mu+ fann ma ɔyɛɛ asõ maa nsɛm a Paulo kae no. 15  Afei bere a wɔbɔɔ ɔne ne fiefo asu+ no, ɔde nkotɔsrɛ kae sɛ: “Sɛ moabu me sɛ ɔnokwafo ama Yehowa a, mommɛtena me fie.”+ Na ɔyɛe ara ma yɛkɔɔ hɔ.+ 16  Na ɛbae sɛ yɛrekɔ baabi a wɔbɔ mpae no, abaawa bi a ɔwɔ akɔm honhom+ ne yɛn hyiae. Ná ɔka daakye nsɛm ma ne wuranom nya mfaso+ pii. 17  Abeawa yi dii yɛne Paulo akyi teɛteɛɛm+ sɛ: “Nnipa yi yɛ Ɔsorosoro Nyankopɔn no nkoa a wɔreka nkwagye kwan no ho asɛm akyerɛ mo.” 18  Ɔyɛɛ saa nna pii. Afei ɛyɛɛ Paulo ahometew+ na ɔdan ne ho ka kyerɛɛ honhom no sɛ: “Mehyɛ wo Yesu Kristo din mu sɛ fi ne mu fi.”+ Na ofii ne mu dɔn no ara.+ 19  Afei bere a ne wuranom hui sɛ nea wɔn ani da so a ɛbɛma wɔn mfaso no afi wɔn nsa+ no, wosusoo Paulo ne Silas mu twee wɔn kɔɔ gua so kɔmaa atumfoɔ no,+ 20  na wɔde wɔn kɔmaa ɔman mpanyimfo no kae sɛ: “Nnipa yi yɛ Yudafo a wɔrehaw+ yɛn kurow yi paa, 21  na wɔkyerɛkyerɛ amanne+ ahorow bi a mmara mma yɛn a yɛyɛ Romafo no kwan sɛ yedi akyi anaa yɛyɛ.” 22  Na nnipakuw no nyinaa sɔre kɔɔ wɔn so; na bere a ɔman no mu mpanyimfo no sunsuan wɔn ntade nguguso mu no, wɔhyɛe sɛ wɔmmɔ wɔn mmaa.+ 23  Wɔbɔɔ wɔn mmaa pii+ wiei no, wɔde wɔn koguu afiase hyɛɛ afiasehwɛfo no sɛ ɔnhwɛ wɔn so yiye.+ 24  Esiane sɛ wɔhyɛɛ no saa nti, ɔde wɔn koguu afiase a ɛhyɛ mfinimfini paa+ no mu kyekyeree wɔn anan bɔɔ dua mu.+ 25  Na bɛyɛ ɔdasum+ no, Paulo ne Silas bɔɔ mpae too dwom yii Onyankopɔn ayɛ;+ na nneduafo no tee wɔn nka. 26  Mpofirim ara asasewosow kɛse bi sii ma afiase no nnyinaso wosowee. Afei apon no nyinaa buebuei amonom hɔ ara, na wɔn nyinaa nkɔnsɔnkɔnsɔn no sansanee.+ 27  Bere a afiasehwɛfo no sɔre fii nna mu a ohui sɛ afiase apon no abuebue no, ɔtwee ne nkrante sɛ anka ɔrebekum ne ho,+ efisɛ na osusuw sɛ nneduafo no aguan.+ 28  Na Paulo de nne kɛse teɛɛm sɛ: “Nyɛ wo ho bɔne biara+ na yɛn nyinaa wɔ ha!” 29  Ɛnna okogyee kanea de mmirika bɔ wuraa hɔ, na ɔde ahopopo hwee+ Paulo ne Silas anim. 30  Na ɔde wɔn baa abɔnten kae sɛ: “Me wuranom, menyɛ dɛn+ na manya nkwa?” 31  Wɔkae sɛ: “Gye Awurade Yesu di na wobegye wo nkwa,+ wo ne wo fiefo.”+ 32  Na wɔkaa Yehowa asɛm kyerɛɛ ɔne wɔn a wɔwɔ ne fie nyinaa.+ 33  Na ɔde wɔn kɔe anadwo no ara kɔhohoroo wɔn akuru anim; na wɔbɔɔ ɔne ne ho nnipa nyinaa asu+ ntɛm ara. 34  Na ɔde wɔn baa ne fie bɛtow wɔn pon, na ɔne ne fiefo nyinaa dii ahurusi kɛse sɛ afei wabegye Onyankopɔn adi. 35  Bere a ade kyee no, ɔman mpanyimfo+ no somaa awɛmfo kɔkae sɛ: “Gyaa nnipa no ma wɔnkɔ.” 36  Ɛnna afiasehwɛfo no kaa nea wɔbɛkae no kyerɛɛ Paulo sɛ: “Mpanyimfo no asoma nnipa aba sɛ minnyaa mo. Enti afei mommɛsen nkɔ asomdwoe mu.” 37  Nanso Paulo ka kyerɛɛ wɔn sɛ: “Wɔhwee yɛn baguam bere a yenni fɔ, nnipa a yɛyɛ Romafo,+ na wɔde yɛn guu afiase; na afei de wɔreyi yɛn kodɛɛ? Dabi! mmom wɔn ankasa mmra mmeyi yɛn.” 38  Enti awɛmfo no kɔkaa nsɛm yi kyerɛɛ mpanyimfo no. Bere a wɔtee sɛ wɔyɛ Romafo no, wɔbɔɔ hu.+ 39  Enti wɔbɛpaa wɔn kyɛw, na woyii wɔn no, wɔsrɛɛ wɔn sɛ womfi kurow no mu nkɔ. 40  Na wofii afiase hɔ kɔɔ Lidia fie, na wohuu anuanom no, wɔhyɛɛ wɔn nkuran+ na wɔkɔe.

Ase Hɔ Nsɛm