Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Asomafo Nnwuma 14:1-28

14  Na wɔkɔɔ Yudafo hyiadan+ mu wɔ Ikoniom,+ na wɔkasa maa nnipakuw kɛse bi a wofi Yudafo ne Helafo+ mu dan gyidifo.  Na Yudafo a wɔannye anni no tutu guu+ amanaman mufo no asom ma wonyaa anuanom no ho adwemmɔne.+  Enti wɔde bere pii tenaa hɔ de Yehowa tumi kasae akokoduru so; ɔno na odii n’adom ho asɛm no ho adanse denam sɛnkyerɛnne ne anwonwade ahorow a ɔnam wɔn nsa so yɛe+ no so.  Nanso, nnipakuw a wɔwɔ kurom hɔ no mu kyɛɛ abien, na ebinom kɔɔ Yudafo no afã na afoforo nso kɔɔ asomafo no afã.  Afei bere a amanaman mufo no ne Yudafo ne wɔn sodifo no bɔɔ kirididi sɛ wɔrebɛbɔ wɔn adapaa asiw wɔn abo+  na wɔtee no, woguan+ kɔɔ Likaonia nkurow Listra ne Derbe ne asase a atwa ho ahyia so;  na wɔkɔɔ so kaa asɛmpa+ no wɔ hɔ.  Ná ɔbarima bi wɔ Listra a ɔte hɔ a ontumi nnyina ne nan so, ɔyɛ obubuafo fi ne maame yam,+ na ɔnnantewee da.  Saa ɔbarima yi tiee Paulo kasa, na bere a ɔhwɛɛ no dinn no, ohui sɛ ɔwɔ gyidi+ a ebetumi ama ne ho ayɛ no den, 10  na ɔde nne kɛse teɛɛm sɛ: “Sɔre gyina wo nan so pintinn.” Na ohuruw gyinae fii ase nantewee.+ 11  Na nnipakuw no huu nea Paulo ayɛ no, wɔmaa wɔn nne so kaa no Likaonia kasa mu sɛ: “Anyame+ ayɛ wɔn ho sɛ nnipa asian aba yɛn nkyɛn!” 12  Na wɔfrɛɛ Barnaba Seus, ne Paulo nso Hermes, efisɛ ɔno na na odi anim kasa. 13  Na Seus sɔfo a n’asɔredan wɔ kurotia no de anantwi ne nhwiren abotiri baa ɔpon no ano pɛe sɛ ɔne nnipakuw no bɔ afɔre.+ 14  Nanso, bere a asomafo Barnaba ne Paulo tee no, wosunsuan wɔn ntade nguguso mu de ahoɔhare kɔɔ nnipakuw no mu teɛteɛɛm 15  kae sɛ: “Mmarima, dɛn nti na moreyɛ eyinom? Yɛn nso yɛyɛ nnipa+ a yɛwɔ mmerɛwyɛ+ te sɛ mo ara, na yɛreka asɛmpa akyerɛ mo na ama moadan mo ho afi nneɛma hunu+ yi ho aba Onyankopɔn teasefo+ a ɔyɛɛ ɔsoro+ ne asase ne po ne nea ɛwɔ mu nyinaa no nkyɛn. 16  Awo ntoatoaso a atwam no mu no ogyaa amanaman no nyinaa ma wɔfaa wɔn ankasa kwan so,+ 17  nanso nokwarem no, wannyae ne ho adansedi efisɛ ɔyɛɛ papa,+ maa mo osu+ fii soro ne mmere a aduan ba, na ɔde aduan ne abotɔyam hyɛɛ mo koma mã.”+ 18  Nanso wɔka brɛe ansa na nnipakuw no regyae afɔre a wɔpɛe sɛ wɔbɔ ma wɔn no. 19  Na Yudafo bi fi Antiokia ne Ikoniom bae bɛdan nnipakuw no ti,+ na wosiw Paulo abo twee no kɔɔ kurow no akyi susuw sɛ wawu.+ 20  Nanso, bere a asuafo no twaa ne ho hyiae no, ɔsɔre kɔɔ kurow no mu. Na ade kyee no, ɔne Barnaba fii hɔ kɔɔ Derbe.+ 21  Na wɔkaa asɛmpa no kyerɛɛ kurow no wiei na wonyaa asuafo+ dodow bi no, wɔsan kɔɔ Listra ne Ikoniom ne Antiokia 22  kɔhyɛɛ asuafo no akra den,+ hyɛɛ wɔn nkuran sɛ wɔntena gyidi no mu, na wɔkae sɛ: “Etwa sɛ yɛfa ahohia bebree mu de kɔ Onyankopɔn ahenni mu.”+ 23  Bio nso, wɔpaw mpanyimfo+ maa wɔn wɔ asafo biara mu, na wɔde mmuada bɔɔ mpae+ de wɔn hyɛɛ Yehowa a wɔabenya ne mu gyidi no nsa.+ 24  Na wɔkɔfaa Pisidia baa Pamfilia,+ 25  na wɔkaa asɛm no wɔ Perga wiei no, wosiim kɔɔ Atalia. 26  Na wofii hɔ de po so hyɛn kɔɔ Antiokia,+ faako a bere bi wɔde wɔn hyɛɛ Onyankopɔn nsa ma ɔnam n’adom so boa ma wɔyɛɛ adwuma a wɔawie koraa no.+ 27  Bere a wɔbae na wɔfrɛɛ asafo no nyinaa boaa ano no, wɔkaa+ nneɛma pii a Onyankopɔn nam wɔn so ayɛ ne sɛnea wabue ɔpon a ɛkɔ gyidi mu ama amanaman no kyerɛe.+ 28  Enti wɔtenaa asuafo no nkyɛn kyɛe.

Ase Hɔ Nsɛm