Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Asomafo Nnwuma 10:1-48

10  Ná ɔbarima bi wɔ Kaesarea a wɔfrɛ no Kornelio, a ɔyɛ nea wɔfrɛ no Italia asraafodɔm+ no mu ɔpanyin,+  ɔbarima a ɔwɔ ahofama+ na ɔne ne fiefo nyinaa suro+ Onyankopɔn, na ɔyɛ nkurɔfo adɔe+ pii na ɔde adesrɛ to Onyankopɔn anim daa.+  Bɛyɛ dɔn a ɛto so akron*+ no, ohuu Onyankopɔn bɔfo+ pefee wɔ anisoadehu mu+ sɛ waba ne nkyɛn na ɔka kyerɛɛ no sɛ: “Kornelio!”  Ɔbarima no hwɛɛ no dinn, na ehu kaa no ma obisae sɛ: “Owura, asɛm bɛn?” Ɔka kyerɛɛ no sɛ: “Wo mpaebɔ+ ne w’adɔe aforo soro sɛ nkae wɔ Onyankopɔn anim.+  Enti afei soma mmarima ma wɔnkɔ Yopa nkɔfrɛ Simon a wɔfrɛ no Petro no mmra.  Saa ɔbarima yi akɔsoɛ nhomahyɛfo bi a ɔde Simon a ne fie wɔ po no ano.”+  Bere a ɔbɔfo a ɔne no kasae no kɔe ara pɛ, ɔfrɛɛ ne fie nkoa baanu ne ɔsraani bi a ɔwɔ ahofama fii wɔn a wɔsom no daa no mu,+  na ɔkaa biribiara kyerɛɛ wɔn somaa wɔn kɔɔ Yopa.+  Ade kyee a wɔnam ɔkwan so rekɔ na wɔreyɛ adu kurow no mu no, Petro kɔɔ ɔdan no atifi+ bɛyɛ dɔn a ɛto so asia* kɔbɔɔ mpae.+ 10  Afei ɔkɔm dee no paa ma ɔpɛe sɛ odidi. Bere a wogu so reyɛ aduan no, onyaa anisoadehu+ 11  na ohui sɛ ɔsoro abue+ na ɔsɛn bi resian sɛ nwera tam kɛse bi a wɔregyaa anoano anan no aba asase so; 12  na ntɔteboa ne mmoa a wɔwea asase so ne ewim nnomaa nyinaa bi wom.+ 13  Na ɔtee nne bi sɛ: “Petro, sɔre kum bi na di!”+ 14  Nanso Petro kae sɛ: “Dabi, Awurade, efisɛ minnii biribi a ɛho agu fĩ na ɛho ntew biara da.”+ 15  Na nne no ka kyerɛɛ no ne mprenu so sɛ: “Mfrɛ nneɛma a Onyankopɔn atew ho sɛ ɛho agu fĩ.”+ 16  Eyi bae ne mprɛnsa so, na ɛhɔ ara wɔfaa ɛsɛn no kɔɔ soro.+ 17  Afei bere a Petro tirim ayɛ no keserenee wɔ nea anisoade a ohui no kyerɛ ho no, hwɛ! na mmarima a Kornelio somaa wɔn no abisabisa Simon fie kwan ma wɔabegyina ɔpon ano.+ 18  Na wɔteɛɛm bisae sɛ ebia Simon a wɔfrɛ no Petro no abɛsoɛ hɔ anaa. 19  Bere a Petro gu so redwinnwen anisoadehu no ho no, honhom+ no kae sɛ: “Hwɛ! Mmarima baasa bi rehwehwɛ wo. 20  Wo de, sɔre, si fam na kɔ wɔn nkyɛn, mma w’adwene mu nnyɛ wo naa koraa, efisɛ me na mesomaa wɔn.”+ 21  Enti Petro sii fam kɔɔ mmarima no nkyɛn kɔkae sɛ: “Hwɛ! mene nea morehwehwɛ no no. Dɛn na ɛma mobaa ha?” 22  Wɔkae sɛ: “Ɔbɔfo kronkron bi de Onyankopɔn akwankyerɛ maa ɔsraani panyin Kornelio, ɔtreneeni a osuro Onyankopɔn+ na Yuda man nyinaa bɔ no din pa+ no sɛ ɔnsoma mmɛfa wo mmra ne fie na ontie nea wowɔ ka.” 23  Enti ɔde wɔn baa mu na ɔsom wɔn hɔho. Ade kyee no, ɔsɔre ne wɔn kɔe, na na anuanom binom a wofi Yopa ka wɔn ho. 24  Da a edi hɔ no, oduu Kaesarea. Ná Kornelio nso afrɛfrɛ n’abusuafo ne ne nnamfonom nyinaa retwɛn wɔn. 25  Bere a Petro puee hɔ no, Kornelio kohyiaa no hwee ne nan ase sɔree no. 26  Nanso Petro maa no so kae sɛ: “Sɔre; me nso meyɛ onipa.”+ 27  Na bere a ɔne no bɔɔ nkɔmmɔ no, ɔkɔɔ ofie no mu kohui sɛ nnipa bebree ahyiam, 28  na ɔka kyerɛɛ wɔn sɛ: “Mo ara munim pefee sɛnea mmara mma kwan sɛ Yudani ne abusua foforo muni bɛbɔ anaasɛ ɔbɛbɛn no;+ nanso Onyankopɔn akyerɛ me sɛ ɛnsɛ sɛ mefrɛ onipa biara sɛ ne ho agu fĩ anaa ne ho ntew.+ 29  Ne saa nti bere a wɔsoma bɛfrɛɛ me no, manyi ano koraa na mebae. Afei merebisa nea enti a mosoma bɛfrɛɛ me.” 30  Ɛnna Kornelio kae sɛ: “Nnanan ni, saa bere yi ara, na merebɔ mpae dɔn a ɛto so akron* no mu wɔ me fie,+ na hwɛ! ɔbarima bi a ɔhyɛ atade hyɛnhyɛn+ begyinaa m’anim 31  na ɔkae sɛ: ‘Kornelio, Onyankopɔn atie wo mpaebɔ na w’adɔe adu n’anim.+ 32  Enti soma kɔ Yopa kɔfrɛ Simon, a wɔfrɛ no Petro no.+ Saa ɔbarima yi abɛsoɛ Simon a ɔyɛ nhomahyɛfo no fie wɔ po no ano.’+ 33  Enti ntɛm ara na mesoma baa wo nkyɛn, na woabɔ mmɔden sɛ woaba ha. Ɛno nti yɛn nyinaa ahyiam Onyankopɔn anim saa bere yi sɛ yɛrebetie nea Yehowa ahyɛ wo sɛ ka nyinaa.”+ 34  Ɛnna Petro buee n’ano kae sɛ: “Nokwasɛm ni, mahu sɛ Onyankopɔn nhwɛ nnipa anim,+ 35  na mmom ɔman biara mu no, onipa a osuro no na ɔyɛ adetrenee no, ogye no tom.+ 36  Ɔde asɛm+ no kɔmaa Israel mma, na ɔkaa asomdwoe+ a ɛnam Yesu Kristo so no ho asɛmpa kyerɛɛ wɔn: Oyi ne nnipa nyinaa mu Awurade.+ 37  Munim nea wɔkaa ho asɛm wɔ Yudea nyinaa, a efii ase wɔ Galilea bere a Yohane aka asubɔ ho asɛm akyi+ no. 38  Ɛno ne sɛ, Yesu a ofi Nasaret no, Onyankopɔn de honhom kronkron ne tumi sraa no,+ na okyinkyinii asase no so yɛɛ papa, na ɔsaa wɔn a Ɔbonsam hyɛ wɔn so nyinaa yare,+ efisɛ na Onyankopɔn ka ne ho.+ 39  Na yɛyɛ nneɛma a ɔyɛe wɔ Yudafo nkurow mu ne Yerusalem no nyinaa ho adansefo; na ɔno ara nso na wɔsɛn no dua so kum no.+ 40  Oyi na da a ɛto so abiɛsa no Onyankopɔn nyan no maa no hokwan sɛ onyi ne ho adi nkyerɛ,+ 41  ɛnyɛ nnipa nyinaa, na mmom adansefo a Onyankopɔn adi kan apaw wɔn,+ yɛn a yɛne no didi nomee+ wɔ ne wusɔre akyi no. 42  Afei nso, ɔhyɛɛ yɛn sɛ yɛnka+ nkyerɛ nnipa no na yenni adanse fefeefe sɛ Oyi ne nea Onyankopɔn ahyɛ sɛ ɔbɛyɛ ateasefo ne awufo temmufo no.+ 43  Ɔno na adiyifo no nyinaa di ne ho adanse,+ sɛ obiara a ogye no di no nam ne din so benya bɔne fafiri.”+ 44  Bere a Petro gu so reka nsɛm yi no, honhom kronkron baa wɔn a wɔretie asɛm no nyinaa so.+ 45  Na ɛyɛɛ anokwafo a wofi wɔn a wɔatwa wɔn twetia mu a wɔne Petro bae no nwonwa, efisɛ wohwiee honhom kronkron dom akyɛde a wɔde ma kwa no guu amanaman mufo nso so.+ 46  Na wɔtee sɛ wɔreka kasa horow na wɔreyi Onyankopɔn ayɛ.+ Ɛnna Petro buae sɛ: 47  “Eyinom anya honhom kronkron sɛ yɛn ara, enti hena na obetumi asiw wɔn kwan sɛ yɛmmfa nsu mmmɔ wɔn asu?”+ 48  Ɛno nti ɔhyɛe sɛ wɔmmɔ wɔn asu wɔ Yesu Kristo din mu.+ Afei wɔsrɛɛ no sɛ onni nna kakra wɔ hɔ.

Ase Hɔ Nsɛm

Bɛyɛ awia nnɔn 3.
Bɛyɛ awia 12.
Bɛyɛ awia nnɔn 3.