Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

2 Beresosɛm 21:1-20

21  Na Yehosafat ne n’agyanom kɔdae,+ na wosiee no kaa n’agyanom ho+ wɔ Dawid Kurow mu, na ne ba Yehoram+ bedii n’ade.  Ná ɔwɔ nuabarimanom a wɔyɛ Yehosafat mma: Asaria, Yehiel, Sakaria, Asaria, Mikael ne Sefatia; eyinom nyinaa yɛ Israel* hene Yehosafat mma.  Na wɔn papa kyɛɛ+ wɔn dwetɛ ne sika nneɛma ne nneɛma a ɛsom bo pii ne nkurow a ɛyɛ den wɔ Yuda;+ ahenni no de, ɔde maa Yehoram+ efisɛ ɔno ne abakan.+  Bere a Yehoram bɛtenaa ne papa ahengua so no, ɔmaa ne tumi yɛɛ den, na ɔde nkrante kunkum ne nuanom+ no nyinaa ne Israel mmapɔmma no bi.  Yehoram bedii ade no, na wadi mfe aduasa abien, na odii hene+ mfe awotwe wɔ Yerusalem.  Na ɔfaa Israel ahene akwan so+ sɛnea Ahab fiefo yɛe no; Ahab babea na ɔwaree no,+ na ɔyɛɛ Yehowa ani so bɔne.+  Yehowa ampɛ sɛ ɔsɛe Dawid fie,+ efisɛ na ɔne Dawid ayɛ apam,+ na waka sɛ ɔbɛma ɔno+ ne ne mma anya kanea daa.+  Ne nna mu no, Edom+ tew atua fii Yuda nsa ase,+ na wosii wɔn so hene.+  Enti Yehoram ne n’asahene ne nteaseɛnam a ɛka ne ho nyinaa kɔɔ hɔ. Na ɔsɔree anadwo kokunkum Edomfo a wɔatwa ɔne nteaseɛnam so asahene no ho ahyia no. 10  Ne nyinaa akyi no, Edom tew atua fii Yuda nsa ase de besi nnɛ. Saa bere no ara, Libnafo+ nso tew atua fii ne nsa ase, efisɛ na wagyaw Yehowa, n’agyanom Nyankopɔn no.+ 11  Afei nso ɔyeyɛɛ sorɔnsorɔmmea+ wɔ Yuda mmepɔw so sɛ ɔde rema Yerusalemfo abɔ aguaman+ na ɔde apam Yuda.+ 12  Akyiri yi onyaa krataa+ fii odiyifo Elia+ hɔ sɛ: “Nea Yehowa, wo nana Dawid Nyankopɔn aka ni, ‘Esiane sɛ woannantew wo papa Yehosafat+ ne Yuda hene Asa+ akwan so, 13  na woafa Israel ahene akwan so+ na woama Yuda ne Yerusalemfo abɔ aguaman+ sɛnea Ahab fiefo maa ebinom bɔɔ aguaman,+ na wo nuanom, wo papa fiefo a woye sen wo mpo, woakunkum wɔn+ nti, 14  hwɛ! Yehowa de ɔhaw kɛse+ bɛba wo man+ ne wo mma+ ne wo yerenom ne nea wowɔ nyinaa so. 15  Wobɛyareyare;+ wobɛyare wo nsono daa akosi sɛ wo yare no beyi wo nsono apue.’”+ 16  Ɛnna Yehowa hwanyan Filistifo+ ne Arabiafo+ a wɔbɛn Etiopiafo+ no honhom+ ma wɔsɔre baa Yehoram so. 17  Enti wɔbaa Yuda bɛbɔ wuraa kurow no mu, na wɔfow ɔhene no fie hɔ nneɛma a wohui nyinaa,+ na wɔfaa ne mma ne ne yerenom+ nso kɔe, na wɔannyaw ɔbabarima biara amma no sɛ ne ba kumaa Yehoahas+ nkutoo. 18  Eyinom nyinaa akyi no, Yehowa de nsono mu yare a enni sabea+ bɔɔ no. 19  Na ɛbae sɛ mfe abien bɛsen kɔe no, ne nsono+ puei ne yare no mu, na nkakrankakra, ɔyare bɔne no kum no; ne manfo anhyew+ biribiara amma no sɛnea wɔyɛ maa n’agyanom no. 20  Obedii ade no, na wadi mfe aduasa abien, na odii hene mfe awotwe wɔ Yerusalem. Ɔkɔe a anyɛ obiara yaw.+ Wosiee no Dawid Kurow+ mu, nanso ɛnyɛ ahene no amusiei na wosiee no.+

Ase Hɔ Nsɛm

Anaasɛ, “Yuda.” Wɔtaa de “Israel” gyina hɔ ma “Yuda” wɔ 2Be mu.